20
Paulus dong pi kambali di propinsi Makedonia
1 Waktu orang su sonde bakaco-balo lai, itu kota Efesus tanáng kambali sama ke biasa. Ais Paulus kumpul ame orang parcaya dong di situ, ko kasi kuat dong pung hati. Ais itu, dia minta parmisi, ju dia barangkat pi di propinsi Makedonia.
2 Di situ, dia kuliling samua kampong-kampong, ko kasi kuat orang parcaya dong pung hati. Dia bekin bagitu, sampe dia maso di negrí Yunani.
3 Di situ, dia tenga sampe tiga bulan. Abis, dia siap-siap ko mau balayar pi di propinsi Siria, ma dia dapa dengar, bilang, orang Yahudi dong ada basakongkol ko mau bunu bekin mati sang dia. Dengar bagitu, ju dia sonde mau balayar langsung pi di propinsi Siria. Jadi, dia jalan kambali lewat propinsi Makedonia sa.
4 Ada satu rombongan kici yang iko sang Paulus. Andia, Timotius; bapa Pirus pung ana Sopater dari kota Berea; dua orang dari kota Tesalonika, nama Aristarkus deng Sekundus; satu orang dari kota Derbe, nama Gayus; deng dua orang dari propinsi Asia, andia Tikikus, deng Trofimus.
5-6 Abis ju, beta (andia Lukas yang tulis ini surat), katumu ulang deng Paulus di kota Filipi di propinsi Makedonia. Ju Paulus pung ana bua dong barangkat lebe dolo, ko dong tunggu sang botong di kota Troas di laut pung sablá. Waktu orang Yahudi pung hari-hari bésar Paska su lewat, botong dua nae kapal, ais balayar pi di kota Troas. Itu waktu, botong balayar lima hari. Waktu botong sampe di Troas, botong turun dari kapal. Ais botong katumu ulang deng tamán laen dong, ju botong tenga di situ satu minggu.
Nyong Yutikus jato dari jandela di kota Troas
7 Itu hari, kaná hari Minggu. Paulus su putus, bilang, “Sodara dong. Beso beta mau jalan tarús.” Jadi botong, orang parcaya samua, bakumpul ko mau bekin makan-makan. Tagal Paulus su mau jalan, jadi dia omong deng botong sampe tenga malam.
8 Botong ada bakumpul di satu ruma pung lante tiga. Itu malam dong bakar lampu bam-banya.
9 Itu waktu, ada satu nyong, nama Yutikus, yang dudu di jandela. Dia ju iko dengar sang Paulus. Ma lama-lama dia pung mata barát, ju dia tatidor sonu. Takuju sa, dia jato dari itu jandela. Ju dia mati memang.
10 Ais Paulus turun, ju paló ame itu nyong. Ais dia omong, bilang, “Sonde usa taku. Dia idop.”
11-12 Botong samua sanáng, tagal itu nyong idop. Ais dong bawa pulang sang dia pi dia pung ruma. Ju botong samua nae ulang pi lante atas, ko dudu makan sama-sama. Tarús Paulus sambung dia pung omong sampe pagi. Waktu matahari kaluar, ju botong minta parmisi, ko su mau barangkat.
Dari kota Troas pi di kota Miletus
13 Abis itu, botong ba'akór ko babagi jalan sampe botong bakatumu lai di satu kota, nama Asos. Ju botong nae kapal ko balayar pi di Asos. Ma Paulus jalan kaki sa pi sana.
14 Waktu botong katumu sang Paulus di Asos, ju dia nae di atas kapal, abis botong balayar tarús pi di kota Metilene.
15 Dari Metilene, botong balayar tarús. Ais dia pung beso, botong balayar deka-deka deng satu pulo, nama Kios. Dia pung lusa, botong mangada pi pulo Samos. Dia pung tula, ju botong sampe di kota Miletus.
16 Ma Paulus su rindu ko capát-capát sampe di Yerusalem, ko dia bisa iko hari bésar Pentakosta di sana. Ais, dia sonde mau buang waktu ko jalan nae pi di kota Efesus, tagal dia su sonde ada waktu lai.
Paulus ba'omong deng tua-tua Kristen di kota Efesus
17 Jadi, di Miletus, Paulus kirim kabar kasi sang tua-tua Kristen di Efesus, ko dong datang bakatumu deng dia.
18 Waktu dong datang sampe, ju Paulus kasi tau sang dong, bilang, “Sodara dong samua. Bosong su tau beta pung cara idop, mulai dari hari partama beta inja kaki di propinsi Asia, sampe sakarang.
19 Bosong ju tau beta karjá banting tulang di teng-tenga bosong, ma beta sonde parná angka-angka diri. Dalam beta pung karjá ni, beta tumpa aer mata banya, deng pikol susa sonde sadiki. Beta ju dapa sangsara banya dari orang Yahudi dong pung niat jahat.
20 Waktu beta ajar sang bosong, beta kasi kaluar samua yang bae, yang beta tau, kasi sang bosong. Deng beta ju ajar sang bosong di muka-muka. Beta ju pi di orang dong pung ruma satu-satu, ko kasi inga sang dong Tuhan pung mau.
21 Beta ju kasi tau sang orang Yahudi, deng orang bukan Yahudi, bilang, dong musti barenti dari dong pung sala-sala dong, ko iko sang Tuhan Allah. Deng dong ju musti parcaya sang kotong pung Bos, andia Tuhan Yesus.
22 Naa, beta mau kasi tau bagini: sakarang, beta ni, ada mau pi Yerusalem, tagal Tuhan pung Roh ada hela bawa sang beta ko pi sana. Beta iko sa, biar beta sonde tau nanti apa yang jadi deng beta di sana.
23 Ma dari satu kota pi satu kota, Tuhan pung Roh yang Barisi su kasi tau lebe dolo sang beta, bilang, beta nanti maso bui deng pikol banya sangsara di sana.
24 Beta su tau pasti bagitu, tagal Tuhan Yesus yang mua ini karjá di beta pung bahu, ko beta pi kasi tau Kabar Bae, bilang, Tuhan ada sayang sang kotong, deng Dia pung hati ju bae sang kotong. Kalo beta sonde iko Dia pung mau, ko bekin abis Dia pung karjá ni, beta rasa beta pung idop sonde ada guna apa-apa.
25 Sakarang beta tau, bilang, bosong su sonde akan lia sang beta lai. Andia, bosong yang beta su lama ajar so'al maso jadi Tuhan pung kelu tu.
26-28 Tagal bagitu, dengar bae-bae. Beta su bekin abis beta pung karjá di bosong. Jadi sakarang, bosong sandiri yang musti karjá tarús. Kalo ada orang dari bosong yang sonde maso Tuhan pung kelu, na, bosong yang tanggong-jawab, ó! Te itu bukan beta pung sala. Inga bae-bae, ó! Beta su kasi tau memang Tuhan pung mau samua sang bosong. Sonde ada satu hal ju yang beta sambunyi sang bosong. Jadi bosong musti jaga bae-bae bosong pung idop sandiri, deng piara bae-bae samua orang yang Tuhan pung Roh yang Barisi ada suru bosong ko jaga. Jang lupa, bilang, Tuhan Yesus su mati ko bayar abis itu orang dong, deng Dia pung dara sandiri. Dia ju tunju sang bosong ko bosong lia sang dong, sama ke gambala piara dia pung domba dong.
29 Jadi sakarang, beta kasi tenga sang bosong. Ma inga, é! Nanti ada orang datang ko ajar sambarang-sambarang di bosong pung teng-tenga. Dong maso sama ke anjing jahat yang maso pi dalam domba pung kandang.
30 Ada orang putar-balek bagitu yang datang dari luar. Ma inga. Ada ju yang muncul dari bosong pung teng-tenga. Ju dong ajar sonde batúl sang bosong. Dong mau ko orang iko sang dong sa. Andia ko dong coba-coba hela orang ko jang iko sang Yesus lai.
31 Tagal bagitu, bosong musti jaga diri bae-bae. Jang lupa, te beta su tenga sama-sama deng bosong sampe tiga taon. Beta ju kasi nasiat sang bosong siang-malam, deng sonde pikir beta pung cape. Beta pung aer mata su jato bam-banya, tagal bosong.
32 Sakarang, kotong su mau bapisa. Jadi, beta sarakan sang bosong samua pi di Tuhan pung tangan, ko Dia piara sang bosong. Deng bosong musti pegang kuat-kuat samua yang beta su kasi tau sang bosong dari partama, so'al Tuhan pung hati bae. Tuhan ada pung kuasa ko bekin kuat sang bosong. Dia ju su janji ko kasi berkat sang Dia pung orang dong. Jadi, kalo bosong iko tarús sang Dia deng hati yang barisi, tantu bosong ju dapa Dia pung berkat.
33 Waktu beta karjá di bosong pung teng-tenga, beta sonde kapingin ame bosong pung barang satu apa ju. Beta sonde minta coba bosong pung barang mas, ko perak, ko pakean, ko apa sa.
34 Bosong ju tau, waktu beta tenga deng bosong, beta karjá banting tulang satenga mati ko biar beta bisa dapa idop. Bukan cuma buat beta sandiri sa, ma beta ju karjá ko kasi idop dong yang iko sang beta.
35 Jadi, deng samua hal ni, beta su kasi tunju jalan ko bosong ju iko tolong orang-orang kasian yang sonde mampu dong. Inga bae-bae Tuhan Yesus pung omong, bilang, ‘Ada lebe bae kotong kasi, daripada kotong tarima.’ ”
36 Paulus omong abis bagitu, ju dia tikam lutut, ais sambayang sama-sama deng dong, deng minta ko Tuhan jaga sang dong samua.
37-38 Ju dong samua pung hati susa, tagal Paulus su omong, bilang, nanti dong su sonde bakatumu deng dia lai. Jadi, waktu dong su mau bapisa, ju dong paló-ciom sang Paulus, deng manangis maskakeduk. Abis, ju dong antar sang botong pi di kapal.