5
Idop basayang deng idop barisi
1 Bosong ni, Tuhan Allah pung ana sayang. Tagal itu, bosong musti idop iko Dia pung mau.
2 Deng bosong musti idop basayang satu deng satu, sama ke Kristus sayang sang bosong. Te Dia su sarakan Dia pung diri ko mati ganti sang kotong. Deng bagitu, Dia jadi korban yang baboo wangi, ko bekin sanáng sang Tuhan Allah.
3 Bosong ni, ju Tuhan Allah pung orang barisi. Jadi, jang idop kamomos! Pikir hal kamomos ju, jang! Jang maen serong deng orang yang bukan lu pung laki, ko lu pung bini! Jang saraka!
4 Jang omong kotor! Jang putar-balek! Deng jang omong sambarang! Te Tuhan pung orang sonde pantas omong bagitu. Lebe bae bosong omong yang bae sa, deng minta tarima kasi sang Tuhan.
5 Inga bae-bae! Te Tuhan Allah sonde tarima orang yang idop kamomos, deng orang yang maen serong deng orang yang bukan dia pung laki, ko dia pung bini! Dong sonde bisa maso jadi Kristus pung orang, deng Tuhan Allah sonde jadi dong pung Raja. Tuhan Allah ju sonde tarima orang saraka, tagal dong seti buang sang Dia, deng angka tinggi-tinggi hal laen dong.
Idop dalam taráng
6 Jang kaná bodo deng orang yang omong kosong, bilang, “Sonde usa idop barisi!” Te Tuhan Allah pasti mara sang orang yang sonde idop iko Dia pung mau.
7 Tagal itu, bosong jang ba'ika diri deng orang model bagitu.
8 Dolu, bosong sama ke orang yang idop dalam galáp, tagal bosong sonde kanál sang Tuhan Allah. Ma sakarang, Dia su kasi turun Dia pung taráng ko bekin bosong jadi Dia pung ana-ana dong. Andia ko, bosong musti idop dalam Dia pung taráng tu.
9 Te orang yang idop tarús dalam taráng, dia bekin hal bae, dia idop lurus, deng dia omong jujur.
10 Cari-cari jalan ko bekin sanáng Tuhan Allah pung hati, tagal Dia tu, kotong pung Bos.
11 Jang ba'ika diri deng orang yang idop dalam galáp. Te dong pung bekin-bekin tu, sonde ada pung guna apa-apa ju. Jadi bosong musti togor sang dong, deng buka kasi tunju dong pung sala-sala.
12 Te apa yang dong bekin deng sambunyi-sambunyi tu, kotor talalu, sampe kotong ni rasa malu kalo mau ba'omong.
13 Beta kasi conto bagini: kalo orang kasi taráng barang-barang dalam galáp, pasti orang dapa lia itu barang deng taráng-taráng.
14 Bagitu ju, kalo kotong kasi taráng hal jahat yang orang bekin, dia bisa mangarti, bilang, itu hal yang dia bekin tu, jahat. Ada lagu satu bilang,
“Woi! Bosong yang tidor, bangun su!
Bosong yang mati, idop kambali su!
Te Kristus mau kasi taráng sang bosong.”
Idop satu hati deng Tuhan pung Roh
15 Tagal itu, lia bae-bae bosong pung idop, ko bosong jang sama ke orang bodo. Lebe bae pake akal bae-bae.
16 Sakarang ni, banya orang bekin hal-hal jahat tarús. Jadi, kalo ada waktu bekin hal-hal bae, na bekin su. Jang tunggu-tunggu lai!
17 Pikir bae-bae ko mangarti sang kotong pung Bos pung mau, ko bosong jang bodo.
18 Jang mabo, te nanti itu minuman yang ator sang bosong. Ma buka bosong pung hati ko biar Tuhan Allah pung Roh Barisi yang ator sang bosong.
19 Ba'omong satu deng satu pake kata-kata dari Tuhan Allah pung Tulisan Barisi, dari lagu yang puji-puji sang Dia, deng dari lagu-lagu yang bosong dapa dari Dia pung Roh Barisi. Deng kalo manyanyi, jang di bibir sa. Ma puji sang Tuhan Allah deng batúl.
20 Te Yesus Kristus jadi kotong pung Bos, deng Allah Bapa su bekin banya hal kasi kotong. Andia ko kotong minta tarima kasi tarús-tarús sang Dia.
Samua orang parcaya musti dengar-dengar satu deng satu
21 Bosong samua musti dengar-dengar satu deng satu. Te deng bagitu, bosong kasi tunju hormat sang Yesus Kristus.
Conto ke: laki-bini dong
22 Bini dong! Bosong musti dengar-dengar sang bosong pung laki dong, sama ke bosong dengar-dengar sang bosong pung Bos Yesus Kristus.
23 Te laki tu, sama ke bini pung kapala. Deng Kristus ju Kapala kasi Dia pung orang dong. Te Dia yang buka jalan ko dong salamat.
24 Andia ko Kristus pung orang dong musti dengar-dengar sang Dia. Bagitu ju, bini dong musti dengar-dengar sang dong pung laki dalam samua hal.
25 Bagitu ju, laki dong! Bosong musti sayang sang bosong pung bini dong, sama ke Kristus sayang sang Dia pung orang dong, sampe Dia sarakan Dia pung diri, ko mati ganti sang dong.
26 Dia bekin bagitu, ko dong jadi barisi di Tuhan Allah pung muka, tagal dong su iko Dia pung Kata-kata, deng dong su dapa sarani.
27 Yesus Kristus pung orang dong ju sama ke baroit parampuan yang su barias pung manis lai, te baroit laki-laki mau datang ame sang dia. Bagitu ju, Kristus mau datang ame sang Dia pung orang dong. Andia ko dong musti idop manis deng barisi, sampe sonde ada pung sala sadiki ju.
28 Bagitu ju, laki dong! Bosong musti sayang sang bosong pung bini dong, sama ke bosong sayang bosong pung badan sandiri. Te kalo laki sayang sang dia pung bini, dia pung arti, bilang, dia sayang dia pung badan sandiri.
29 Sonde ada orang yang binci dia pung badan sandiri. Ma dia urus deng piara bae-bae, sama ke Kristus urus bae-bae Dia pung orang dong,
30 tagal kotong ni, sama ke Dia pung badan.
31 Di Tuhan Allah pung Tulisan Barisi ada tatulis, bilang, “Tagal itu, laki-laki musti kasi tenga dia pung papa deng dia pung mama, ko pi idop satu hati deng dia pung bini, te dong dua su jadi satu.”
32 Tuhan pung Kata-kata tu, su kasi tunju dari dolu, so'al laki-bini pung sayang. Ma sakarang kotong ju tau, bilang, itu Kata-kata ju kasi tunju so'al Kristus pung sayang sang Dia pung orang dong.
33 Jadi, laki musti sayang sang dia pung bini sama ke dia sayang dia pung badan sandiri. Deng bini musti taro hormat sang dia pung laki.