18
Tiga orang datang katumu deng Abraham
1 Satu waktu, Abraham ada tenga deka pohon-pohon bésar di Mamre. TUHAN datang kasi tunju Diri sang dia di situ. Dia pung carita bagini: Itu hari panas sakali, jadi Abraham dudu cari angin di muka tenda.
2 Waktu Abraham angka muka, ju dia dapa lia ada tiga orang badiri di sana. Ju dia lari pi sambut sang dong capát-capát. Dia tikam lutut,
3 ais bilang, “Bapa-bapa dong! Kalo bisa, na, bapa dong singga tahan di beta pung tenda dolo. Biar cuma minum aer kosong sa, ju bae.
4 Bapa dong barenti cape di bawa sombar. Nanti ana-ana dong ame aer ko datang cuci bapa dong pung kaki.
5 Nanti beta pi sadia makan kasi bapa dong, ko dapa kuat sadiki, baru bapa dong jalan tarús. Te beta sanáng bisa layani sang bapa dong.”
Ais ju dong manyao, bilang, “Itu bae. Tarima kasi. Botong singga.”
6 Ais Abraham lari pi tenda, deng kasi tau sang Sara, bilang, “Capát! Ame tarigu yang paling bae, satu sak, ko bekin roti.”
7 Ais dia lari pi di dia pung sapi dong, ko dia pili ame ana sapi gumuk satu. Ais dia suru dia pung hamba ko potong itu sapi, deng masa dia pung daging.
8 Tarús Abraham pi ame susu, keju, deng daging yang baru masa tu, ais dia bawa kasi itu tamu dong. Waktu dong makan, dia badiri di bawa pohon ko layani sang dong.
9 Lantas dong tanya sang dia, bilang, “Abraham! Lu pung bini, Sara, di mana?”
Ais dia manyao, bilang, “Di dalam tenda.”
10 Ju satu dari dong tiga omong, bilang, “Kira-kira taon datang, Beta kambali. Itu waktu, lu pung bini Sara su barana satu ana laki-laki.”
Waktu dong omong bagitu, Sara ada dengar dari balakang pintu.
11 Itu waktu, Abraham deng Sara memang su tua sakali, deng Sara ju su barenti datang bulan.
12 Dengar dong omong bagitu, ju Sara katawa dalam hati. Deng dia pikir, bilang, “Awee! Beta su tua kakaluk bagini, deng beta pung laki su mamalek. Mana ko botong masi kapingin jadi panganten baru, ko cari ana lai?”
13 Ais TUHAN tanya sang Abraham, bilang, “Akurang ko Sara katawa? Dia pikir apa yang Beta omong ni, sonde bisa jadi, tagal dia su tua, ko?
14 Beta ni, TUHAN! Sonde ada yang Beta sonde bisa bekin! Inga bae-bae, é! Nanti kalo Beta kambali di sini taon datang, Sara su barana ame satu ana laki-laki.”
15 Dengar bagitu, ju Sara taku. Ais dia manyangkal, bilang, “Beta sonde katawa, ma!”
Ma Tuhan manyao, bilang, “Lu tadi memang katawa, ma.”
Abraham kokoe ame sang Tuhan ko jang hukum orang Sodom dong
16 Ais, itu tiga tamu dong barangkat mau pi di kota Sodom. Ju Abraham antar sang dong sampe di tenga jalan. Dari situ, dong bisa dapa lia kota Sodom.
17 Ais TUHAN omong dalam hati, bilang, “Lebe bae, Beta carita kasi Abraham, bilang, Beta mau kasi ancor kota Sodom.
18 Te dia pung turunan nanti tamba banya, deng jadi bangsa yang hebat. Deng dia ju nanti jadi berkat kasi sang samua bangsa di dunya.
19 Beta su pili sang dia, ko ajar dia pung ana-ana deng orang laen dong, iko tarús TUHAN pung jalan, ko dong idop lurus deng jujur. Kalo dong bekin bagitu, Beta bekin jadi, Beta pung janji deng Abraham.”
20 Lantas TUHAN kasi tau Abraham, bilang, “Bagini! Beta su dengar orang banya dong mangomek so'al orang dari kota Sodom deng Gomora. Dong pung jahat tu, su talalu kalewat.
21 Andia ko Beta turun, ko mau pareksa sandiri, samua yang Beta su dengar tu, batúl ko sonde. Kalo sonde, nanti Beta musti dapa tau.”
22 Waktu TUHAN masi ba'omong deng Abraham, itu dua tamu dong jalan tarús pi kota Sodom.
23 Abraham pi deka-deka sang Tuhan, ais kokoe, bilang, “Karmana? Bapa mau kasi ancor orang bae deng orang jahat sama-sama, ko?
24 Kalo ada 50 orang bae di dalam itu kota, Bapa masi mau kasi ancor sang dong samua ju? Ko Bapa sonde kasi ancor itu kota, tagal dong.
25 Bapa jang bekin bagitu! Jang sampe itu orang bae dong ju iko mati, tagal Bapa mau kasi ancor orang jahat dong. Bapa yang jadi Hakim di ini langit deng bumi. Deng Bapa sandiri su tau yang itu sonde adil.”
26 TUHAN manyao, bilang, “Kalo Beta dapa 50 orang bae di kota Sodom, Beta sonde hukum itu kota, tagal dong.”
27 Tarús Abraham omong lai, bilang, “Bapa, minta ampon, kalo beta bisa omong sadiki lai. Beta ni, cuma manusia bodo, yang sonde tau apa-apa.
28 Andekata sonde sampe 50 orang bae, ma cuma dapa 45 sa, karmana? Kalo kurang lima orang sa, Bapa masi mau bekin ancor itu kota, ko?”
Tuhan manyao, bilang, “Kalo Beta dapa 45 orang bae di situ, na, Beta sonde bekin ancor itu kota.”
29 Ais Abraham kokoe lai, bilang, “Kalo cuma dapa 40 orang sa, karmana, Bapa?”
Ju Dia manyao, bilang, “Kalo Beta dapa 40, Beta sonde hukum sang dong.”
30 Abraham kokoe tarús lai, bilang, “Bapa jang mara, ma, andekata cuma 30 orang bae sa, karmana?”
Dia manyao, bilang, “Kalo Beta dapa 30, Beta sonde jadi hukum sang dong.”
31 Ais Abraham tawar lai, bilang, “Bapa jang mara kalo beta tanya lai sadiki. Kalo cuma dapa 20 orang sa, karmana?”
Ju Dia manyao lai, bilang, “Kalo dapa 20, Beta sonde akan kasi ancor itu kota.”
32 Ju Abraham konci dia pung omong, bilang, “Bapa! Beta omong satu kali lai, ma jang mara sang beta, ó! Karmana kalo cuma dapa 10 orang bae sa?”
Ju Dia manyao, bilang, “Kalo Beta dapa 10 orang bae di situ, Beta sonde kasi ancor itu kota.”
33 Ba'omong abis bagitu, TUHAN jalan tarús, ju Abraham pulang.