20
Abraham putar-balek sang raja Abimelek
1 Ais itu, Abraham pinda dari Mamre, pi di tana Negeb yang di sablá salatan, deng dia tenga di kampong Kades deng kampong Syur pung teng-tenga. Ma sonde lama, ju dia pinda lai pi di kampong Gerar.
2 Ju dia kasi tau orang-orang di sana bilang, Sara tu, dia pung adi. Andia ko Abimelek, raja Gerar, suru dia pung orang-orang dong pi minta sang Sara, ais bawa sang dia pi di raja pung ruma jabatan.
3 Satu malam, Tuhan Allah kasi tunju Diri sang raja dalam mimpi. Dia omong, bilang, “Lu su mau mati, andia ni! Te lu ada ame orang pung bini na.”
4-5 Ma Abimelek manyao, bilang, “Tuhan! Beta balóm sonto itu parampuan. Deng beta ju sonde sala. Abraham sandiri yang bilang, itu parampuan, dia pung adi! Deng itu parampuan ju mangaku bagitu. Tagal itu, beta suru pi ame sang dia deng hati barisi. Jadi, Tuhan jang kasi sala sang beta!”
6 Ju Tuhan manyao, bilang, “Memang Beta tau lu pung hati barisi. Deng Beta yang tahan, ko lu jang sonto itu parampuan. Deng bagitu, lu ju sonde bekin sala sang Beta.
7 Sakarang, lu kirim pulang itu parampuan pi dia pung laki. Dia tu, Beta pung jubir. Jadi, minta sang dia ko sambayang kasi sang lu, ko biar lu jang mati. Ma kalo lu sonde kasi kambali itu parampuan, lu inga bae-bae! Te lu, deng lu pung orang samua, nanti mati andia tu.”
8 Beso papagi, ju raja pange dia pung pagawe samua, ais carita dia pung mimpi. Ju dong samua jadi taku.
9 Ais raja pange sang Abraham, ju dia tanya, bilang, “Beta ada bekin sala apa sang lu, sampe lu bekin calaka sang beta, deng beta pung rakyat dong bagini? Lu sonde bole bekin hal yang tar bae bagini.
10 Lu pikir apa, sampe lu bekin bagini?”
11 Ju Abraham manyao, bilang, “Bapa raja! Beta pikir bosong samua orang yang sonde kanál sang Tuhan Allah. Jadi, tantu ada yang mau bunu sang beta, ko biar bisa ame beta pung bini.
12 Beta memang omong batúl, bilang, beta pung adi sang dia. Te botong dua satu bapa, ma laen mama. Andia ko botong ba'ame jadi laki-bini.
13 Jadi, waktu Tuhan Allah suru botong pi maranto, beta kasi tau beta pung bini bilang, ‘Kalo kotong pi di mana-mana, ais ada orang tanya kotong dua pung hubungan, deng kalo lu sayang sang beta, na, manyao, bilang, botong dua bakaka-adi.’ ”
14-16 Ais ju raja Abimelek kasi pulang sang Sara. Ju dia omong deng Sara, bilang, “Sakarang, beta bayar kasi lu pung kaka saribu doi perak, ko jadi bukti bilang, beta sonde bekin sala apa-apa deng lu. Biar samua orang tau bagitu!”
Ais raja omong deng Abraham, bilang, “Abraham! Beta pung negrí ni, tabuka buat lu. Lu mau pi tenga di mana sa, bole.” Ais dia ju kasi sang Abraham, sapi deng kambing-domba. Dia ju kasi hamba laki-laki deng parampuan.
17-18 Mula-mula TUHAN su tutu tampa ana dari samua parampuan yang tenga di Abimelek pung da'era, tagal dia su rampas ame Abraham pung bini. Ma waktu raja kasi pulang Sara pi di dia pung laki, ju Abraham sambayang, ko Tuhan buka ulang lai itu parampuan dong pung tampa ana. Ju dong bisa barana lai.