4
Setan dong pung bos coba sang Tuhan Yesus
(Mateos 4:1-11; Markus 1:12-13)
1 Waktu Yohanis sarani abis sang Yesus, ju Yesus jalan kasi tenga kali Yarden. Tuhan pung Roh yang Barisi ada sama-sama deng Dia. Ais itu Roh bawa sang Dia pi tampa sunyi.
2 Yesus tenga di situ sampe ampa pulu hari. Itu waktu ju Dia sonde makan apa-apa, sampe Dia lapar mati pung. Ju, setan dong pung bos datang coba hiki sang Dia.
3 Dia omong sang Yesus, bilang, “Kalo Lu memang Tuhan Allah pung Ana, Lu ada pung kuasa. Jadi, suru ini batu dong jadi roti, ko Lu makan sang dong.”
4 Ma Yesus manyao, bilang, “Lu pung mau lai! Sonde tau, ko? Ada tulis dalam Tuhan Allah pung Tulisan Barisi, bilang,
‘Manusia tu, bukan cuma idop dari makanan to'!’ ”
5-6 Abis itu, setan dong pung bos bawa sang Dia pi di satu tampa tinggi, ju kasi tunju abis sang Dia samua pamarenta di bumi deng dong pung hebat samua. Ais dia kokoe sang Yesus, bilang, “Samua pamarenta deng dong pung kuasa tu, beta pung samua! Bagitu ju deng dia pung hebat samua! Jadi, beta ada pung hak mau kasi sapa sa yang beta suka.
7 Beta mau kasi samua sang Lu. Cuma Lu musti bekin satu hal dolo, baru beta kasi. Gampang sa! Lu cuma sémba sang beta. Itu sa!”
8 Ma Yesus manyao bale, bilang, “Dapa di mana bagitu? Te dalam Tuhan Allah pung Tulisan Barisi ada tulis, bilang,
‘Lu musti sémba sang Tuhan Allah sa.
Deng lu musti layani ame sang Dia sa.’ ”
9 Abis itu, setan dong pung bos ame bawa sang Yesus pi kota Yerusalem. Di situ, dia bawa nae sang Yesus pi Ruma Sambayang Pusat pung tampa paling tinggi. Ais dia bilang, “Kalo Lu memang Tuhan Allah pung Ana, na, Lu buang Diri pi bawa su!
10 Te ada tulis di Tuhan Allah pung Tulisan Barisi, bilang,
‘Tuhan Allah nanti suru Dia pung ana bua dari sorga,
ko jaga ame sang Lu.
11 Nanti dong datang tada sang Lu,
ko biar Lu pung kaki sonde tasonto sadiki ju di batu.’ ”
12 Ma Yesus manyao, bilang, “Jang maen paricuk deng Beta. Te ada tulis dalam Tuhan Allah pung Tulisan Barisi, bilang,
‘Jang coba Tuhan Allah!’ ”
13 Setan dong pung bos coba sang Yesus deng jalan macam-macam, ma sonde dapa ontong sang Dia. Ais dia jalan kasi tenga sang Yesus, ko tunggu waktu yang bae.
Tuhan Yesus pi di Galilea ko mulai kasi tau orang so'al Tuhan pung Kabar Bae
(Mateos 4:12-17; Markus 1:14-15)
14 Abis itu, ju Yesus kambali lai pi propinsi Galilea, te Tuhan pung Roh yang Barisi ada kasi kuasa sang Dia. Sonde lama, ju orang di itu da'era dong mulai kanál Dia pung nama.
15 Dia ajar di orang Yahudi pung ruma sambayang di mana-mana. Ju orang-orang puji sang Dia, bilang, “Yesus tu, Orang hebat, ó!”
Orang dong sonde tarima sang Tuhan Yesus di Nasaret
(Mateos 13:53-58; Markus 6:1-6)
16 Satu kali, Yesus datang di Dia pung kampong Nasaret. Pas deng orang Yahudi dong pung hari sambayang, andia ‘hari Sabat’, Dia maso pi ruma sambayang, sama ke Dia pung biasa. Ais Dia bangun badiri ko mau baca dari Tuhan Allah pung Tulisan Barisi.
17 Ju dong sorong kasi sang Dia ba'i Yesaya pung tulisan. Tarús Dia buka, ais cari ayat, ju baca, bilang,
18 “Tuhan Allah pung Roh pung kuasa ada di Beta.
Andia ko Dia tunju sang Beta,
ko kasi tau Tuhan pung Kabar Bae sang orang kasian dong.
Dia su utus sang Beta,
ko kasi tau, bilang,
yang di bui dong, nanti bebas;
yang buta dong, nanti bisa lia kambali;
yang kaná tendes dong, nanti idop bebas.
19 Te sakarang ni, Tuhan pung waktu su sampe,
ko kasi salamat Dia pung orang dong.”
20 Baca abis itu tulisan, ju Yesus gulung kambali ko sorong pi pamimpin ibadat, tarús Dia dudu. Samua orang yang ada dalam itu ruma sambayang lia tarús sang Dia.
21 Ais Dia kasi tau sang dong, bilang, “Apa yang bosong dengar dari Tuhan Allah pung Tulisan Barisi tadi tu, sakarang su jadi!”
22 Ais samua orang yang ada di situ mulai omong angka-angka sang Yesus, bilang, “Awii! Apa yang Dia omong tadi tu, pung bagus lai! Ma Dia ni, Usu pung Ana, wuang? Karmana ko bisa bagini?”
23 Ju Yesus kasi tau sang dong, bilang, “Tantu bosong samua tau ada bahasa, kata, ‘We, dokter! Bekin bae lu pung diri sandiri dolo!’ Bosong ada mau pake itu bahasa ko puku bale sang Beta, bilang, ‘Akurang ko Lu sonde bekin tanda heran satu kasi botong di sini, sama ke yang Lu su bekin di kota Kapernaum sana?’
24 Dia pung batúl bagini: orang sonde mau tarima sang Tuhan pung jubir di dia pung kampong sandiri.
25-26 Ame conto dari Tuhan pung jubir, ba'i Elia. Satu kali, ujan su sonde turun tiga taon satenga. Itu waktu, ada banya janda di Isra'el. Ma Tuhan sonde kirim Elia ko tolong sang dong di Isra'el. Tuhan cuma kirim sang dia pi satu mama janda di kampong Sarfat deka deng kota Sidon. Padahal mamatua tu, bukan orang Yahudi. Ma dia parcaya Tuhan Allah pung kuasa.
27 Ame conto laen lai dari Tuhan pung jubir Elisa. Itu waktu, ada banya orang Yahudi yang saki kusta di Isra'el. Ma Tuhan sonde bekin bae sang dong. Tuhan cuma suru Elisa bekin bae satu orang kusta, nama Naaman. Padahal, dia tu, orang Siria, bukan orang Yahudi. Ma dia parcaya Tuhan Allah pung kuasa.”
28 Waktu dong dengar Yesus pung omong bagitu, ju dong samua maruak sang Dia.
29 Ais dong bangun rame-rame, ju usir buang sang Dia dari itu ruma sambayang. Tarús dong hela bawa sang Dia pi kampong pung pinggir, ko mau tola buang sang Dia pi dalam jurang di situ.
30 Ma Dia cuma jalan kaluar lewat itu orang banya dong pung teng-tenga, abis kasi tenga sang dong di situ.
Tuhan Yesus usir setan dari satu orang
(Markus 1:21-28)
31 Ais itu, Yesus turun pi kota Kapernaum di dano Galilea pung pinggir. Tiap hari sambayang Dia ajar orang dong dalam ruma sambayang.
32 Orang dong taheran-heran dengar Dia pung omong, te Dia tau batúl itu ajaran pung isi.
33 Satu kali, waktu Yesus ada mangajar di itu ruma sambayang, ada satu orang yang takaná setan mulai batarea ukur kuat pung, bilang,
34 “Woi! Yesus, Orang Nasaret! Lu ada pung urusan apa deng botong! Lu datang ko mau bekin ancor sang botong, ko? Botong kanál sang Lu. Lu ni, itu Orang Barisi yang dolu Tuhan Allah janji ko mau kirim datang.”
35 Ma Yesus masparak sang dia, bilang, “Tutu lu pung mulu! Kaluar dari itu orang!” Takuju sa, itu setan angka banting itu orang di lante di orang dong pung teng-tenga. Banting abis, ju itu setan kaluar kasi tenga itu orang, deng sonde bekin saki sang dia.
36 Orang dong samua tanganga, bilang, “Heran, é! Ini Orang pung omong tu, ada kuasa hebat! Sampe-sampe setan dong ju iko Dia pung parenta ko kaluar dari orang!”
37 Ais, carita so'al Yesus mulai tasiar di itu da'era samua.
Tuhan Yesus bekin bae Simon pung mama mantu, deng banya orang lai
(Mateos 8:14-17; Markus 1:29-34)
38 Waktu dong kaluar dari itu ruma sambayang ju, Yesus pi satu orang pung ruma. Itu orang pung nama, Simon. Simon pung mama mantu ada saki damám, jadi dia pung badan ada panas tinggi. Ais dong minta sang Yesus, bilang, “Bapa! Tolong bekin bae sang mamatua dolo!”
39 Yesus pi badiri di pinggir koi, abis usir kaluar itu damám dari mamatua. Itu sa'at ju, dia pung damám ilang memang. Ais ju dia bangun memang ko pi sadia makan kasi sang dong.
40 Itu sore, waktu matahari su mulai tanggalám, orang dong bawa datang samua orang saki pi sang Yesus. Dong pung panyaki macam-macam. Ais Dia taro tangan di orang saki dong, ju bekin bae sang dong samua.
41 Di itu orang saki dong ju, ada barapa yang takaná setan. Ais Yesus parenta sang setan dong ko kaluar dari orang. Dong kaluar deng batarea, bilang, “Lu ni, Tuhan Allah pung Ana!” Te itu setan dong tau, bilang, Dia tu, Kristus, yang Tuhan Allah su janji dari dolu ko mau kirim datang. Tagal itu, Yesus togor sang dong ko sonde bole ba'omong satu kata ju so'al Dia pung diri.
Tuhan Yesus pi kasi tau Kabar Bae di ruma-ruma sambayang dong
(Markus 1:35-39)
42 Dia pung beso amper siang, ju Yesus bangun ko pi satu tampa sunyi di luar kota. Orang dong cari sang Dia pi mana-mana. Waktu katumu, ju dong noki sang Dia, bilang, “Bapa tenga deng botong sa! Sonde usa jalan pi tampa laen!”
43 Ma Dia manyao, bilang, “Beta ju musti pi kampong laen dong, ko pi kasi tau Kabar Bae so'al Tuhan Allah pung parenta. Te Tuhan su utus sang Beta ko kasi jalan itu tugas.”
44 Ju Dia bajalan dari satu kampong pi kampong laen ko mangajar di ruma-ruma sambayang di propinsi Yudea.