3
Tuhan Yesus bekin bae orang, pas deng hari barenti karjá
(Mateos 12:9-14; Lukas 6:6-11)
1 Abis itu ju, Yesus kambali lai pi ruma ibadat. Di situ Dia lia ada satu orang yang dia pung tangan mati sablá.
2 Di situ ju, ada barapa orang yang cari-cari jalan ko kasi sala sang Yesus. Jadi, dong tarús lur-lur sang Dia, ko mau tau Dia mau bekin bae itu orang, pas deng hari barenti karjá, ko sonde.
3 Ju Yesus pange sang itu orang yang tangan mati sablá, bilang, “Mari ko lu badiri di muka sini.”
4 Ju Dia tanya sang itu orang dong samua, bilang, “Kalo iko kotong pung atoran agama, kotong bole bekin apa, pas deng hari barenti karjá? Kotong bekin bae, ko sonde? Kotong bekin bae orang ko, bunu bekin mati?” Ma dong samua badiam sa.
5 Tarús ju Yesus pung hati susa sakali, tagal dong lebe pusing dong pung atoran, ma sonde pusing deng itu orang yang tangan mati sablá. Ju Dia mara ko pe'e mata lia kuliling sang dong. Abis ju Dia kasi tau itu orang, bilang, “Sorong lu pung tangan suda!” Itu orang sorong dia pung tangan, ju takuju sa, dia pung tangan bae memang.
6 Ais ju, itu orang Farisi dong kaluar kasi tenga itu ruma ibadat. Ju dong pi basakongkol deng orang dari partei politik Herodes, ko cari jalan mau bunu mati sang Yesus.
Tuhan Yesus bekin bae banya orang di dano pung pinggir
7-8 Satu kali, Yesus deng Dia pung ana bua dong ondor pi di dano Galilea pung pinggir. Ma, tagal orang banya su dengar apa yang Dia su bekin, andia ko dong samua datang dari kampong-kampong ko iko sang Dia. Dong datang dari propinsi Galilea, propinsi Yudea, deng propinsi Idumea. Ada orang laen ju datang dari kota Yerusalem, kota Sidon, deng kota Tirus. Deng ada orang laen ju datang dari kali Yarden pung sablá matahari nae. Dong samua cari ko bakatumu deng Dia.
9 Tagal orang dong bagitu banya, sampe Yesus suru Dia pung ana bua dong ko sadia kasi sang Dia satu parahu. Dia mau ba'omong di atas parahu, ko dong samua dapa dengar, deng Dia sonde tapele.
10 Dolu, Dia parná bekin bae banya orang saki. Andia ko sakarang samua orang saki dong datang baseti ko mau raba sang Dia.
11 Waktu orang yang setan su maso dong dapa lia sang Dia, tarús dong jato sampe muka kaná tana di Yesus pung muka. Abis ju dong batarea, bilang, “Lu ni, memang Tuhan Allah pung Ana!”
12 Ma Dia larang karás sang dong, bilang, “Bosong jang kasi tau orang, bilang, Beta ni sapa!”
Tuhan Yesus pili ame dua blas orang jadi Dia pung ana bua
(Mateos 10:1-4; Lukas 6:12-16)
13 Abis ju Yesus nae pi atas satu gunung. Dia pange ame barapa orang yang kaná deng Dia pung hati. Ju dong datang sang Dia.
14 Tarús Dia tunju ame dua blas orang. Dia bilang sang dong, “Beta pili sang bosong ko iko tarús sang Beta, jadi Beta pung utusan. Beta ju mau suru sang bosong ko pi kasi tau Tuhan Allah pung pasán di samua orang.
15 Deng Beta mau kasi kuasa sang bosong, ko bosong bisa usir setan-setan dari orang dong.”
16-19 Itu dua blas orang dong pung nama, andia:
Simon (yang Yesus ju kasi nama, Petrus),
Yakobis,
Yohanis, (Yakobis deng dia pung adi Yohanis ni, dong dua, Sabadeus pung ana. Yesus kasi nama sang dong dua ‘Boanerges’, dia pung arti ‘sama ke guntur’.)
Anderias,
Filipus,
Bartolomeos,
Mateos,
Tomas,
Yakobis (Alpius pung ana),
Tadius,
Simon (yang iko partei politik Selot),
deng Yudas Iskariot (dia ni yang nanti jual buang sang Yesus).
Guru agama dong kasi sala sang Tuhan Yesus, bilang, itu setan dong pung bos yang su kasi kuasa sang Dia
(Mateos 12:22-32; Lukas 11:14-23, 12:10)
20 Abis itu, Yesus deng Dia pung ana bua dong turun kambali dari itu gunung. Ju dong maso pi dalam ruma. Ma orang banya datang makarubu lai sang Dia, sampe Yesus dong su sonde sampat makan lai.
21 Lia bagitu ju, orang bilang, “Coba lia sang Yesus dolo. Dia su lupa urus diri.” Tagal Dia pung kelu dong su dengar orang ba'omong bagitu, andia ko dong datang mau ame bawa sang Dia.
22 Itu waktu, guru agama dong dari Yerusalem datang ko kasi tau orang di situ, bilang, “Weh! Bosong jang iko-iko sang itu Yesus. Te Dia bisa usir setan bagitu, tagal Dia dapa kuasa dari setan dong pung bos, yang orang biasa pange Balsebul.”
23 Yesus dengar bagitu, ju Dia pange ame sang dong samua, ko bilang, “Sonde maso akal! Karmana ko setan dong pung bos bisa usir dia pung diri sandiri!
24 Kalo dalam satu karaja'an, dia pung rakyat dong baku hantam, karmana ko itu karaja'an masi bisa batahan!
25 Deng kalo isi ruma dong satu bara'u deng satu, karmana ko dong masi bisa batahan!
26 Bagitu ju kalo setan dong satu bamusu deng satu, pasti dong tapica-pica. Kalo bagitu, na, dong ancor-ancor!
27 Kalo orang mau datang rampok barang di satu orang kuat pung ruma, dia musti ika mati itu orang dolo. Abis, baru dia bisa rampok itu orang pung barang.
28 Jadi, Beta kasi tau memang sang bosong: Tuhan Allah su sadia hapus buang orang dong pung sala. Deng kalo orang omong tar bae-bae kaná orang laen, Tuhan Allah masi sadia kasi ampon sang dia.
29 Ma kalo ada orang yang barani omong tar bae-bae kasi Tuhan Allah pung Roh yang Barisi tu, Tuhan Allah sonde kasi ampon lai dia pung sala tu, sampe kiamat ju!”
30 Yesus bilang bagitu, tagal dong su cap ame sang Dia, bilang, “Itu Orang su kaná setan!”
Orang yang iko Tuhan Allah pung mau, dong tu, batúl-batúl Tuhan Yesus pung kelu
(Mateos 12:46-50; Lukas 8:19-21)
31 Abis ju, Yesus pung mama deng Dia pung adi dong datang pi itu ruma, ko mau katumu deng Dia. Di sana dong badiri sa di luar ruma ko suru orang pange sang Dia.
32 Itu waktu, Yesus ada dudu ba'omong deng banya orang. Ju orang datang kasi tau, bilang, “Papa, ó! Papa pung mama deng adi-adi dong ada di luar. Dong mau katumu deng Papa.”
33 Ma Yesus manyao, bilang, “Beta pung mama deng Beta pung sodara yang batúl tu, sapa?”
34 Ais Dia lia pi itu orang yang dudu kuliling sang Dia. Ju Dia omong, bilang, “Bosong samua ni, Beta pung mama deng Beta pung sodara yang batúl.
35 Te sapa yang iko Tuhan Allah pung mau, na, dong tu, batúl-batúl Beta pung kelu.”