4
Setan dong pung bos goda sang Tuhan Yesus
(Lukas 4:1-13; Markus 1:12-13)
1 Ais itu, Tuhan Allah pung Roh antar bawa sang Yesus pi tampa sunyi, ko biar setan dong pung bos bésar goda sang Dia.
2 Ju Dia puasa 40 siang deng 40 malam di situ. Ais itu ju, Dia lapar mati pung.
3 Waktu Dia su lapar bagitu, ju setan dong pung bos bésar datang goda sang Dia, bilang, “Lu ni, batúl-batúl Tuhan Allah pung Ana, ko? Kalo batúl, na, parenta ini batu dong ko jadi makanan su.”
4 Ma Yesus manyao, bilang, “Ada tatulis dalam Tuhan Allah pung Tulisan Barisi bilang:
‘Manusia sonde idop dari makanan sa.
Ma dong ju musti dengar Tuhan Allah pung Kata-kata,
deng bekin iko Dia pung mau.’ ”
5 Tarús, itu setan bawa sang Yesus pi kota Yerusalem, Tuhan pung kota barisi tu. Ais dia bawa nae sang Yesus pi atas Ruma Sambayang Pusat pung tampa yang paling tinggi.
6 Ju itu setan bilang, “Kalo Lu memang batúl-batúl Tuhan Allah pung Ana, na, coba Lu malompa turun pi bawa su. Te ada tatulis di Tuhan Allah pung Tulisan Barisi, bilang,
‘Nanti Tuhan Allah parenta Dia pung ana bua dari sorga dong,
ko jaga sang Lu.’
Di Tuhan Allah pung Tulisan Barisi ju ada tulis, bilang,
‘Nanti dong tada ame Lu deng dong pung tangan,
ko biar Lu pung badan sonde saki, deng lu sonde sonto batu ju.’ ”
7 Ma Yesus manyao, bilang, “Ada tatulis ju dalam Tuhan Allah pung Tulisan Barisi, bilang,
‘Tuhan Allah tu, lu pung Bos.
Jadi lu jang suru Dia pake Dia pung kuasa ko kasi bukti, bilang,
Dia tu, batúl-batúl Tuhan Allah.’ ”
8 Tarús itu setan bawa sang Yesus pi di atas satu gunung yang talalu tinggi. Ju dia kasi tunju samua negrí di dunya, deng dong pung hebat samua.
9 Kasi tunju abis itu samua, ju itu setan kasi tau, bilang, “Asal Lu tikam lutut ko sémba sang beta, nanti beta kasi itu samua-samua sang Lu.”
10 Ma Yesus masparak, bilang, “He, setan! Lu iskarobis dari sini! Te Tuhan Allah pung Tulisan Barisi ada bilang,
‘Lu musti sémba sang Tuhan Allah,
deng lu musti karjá kasi sang Dia sa.’ ”
11 Dengar bagitu, ju itu setan angka kaki kasi tenga sang Yesus. Ma Tuhan Allah pung ana bua dari sorga dong datang ko urus sang Dia.
Tuhan Yesus mulai ajar di Galilea
(Markus 1:14-15; Lukas 4:14-15)
12 Itu waktu, raja Herodes kasi maso Yohanis Tukang Sarani dalam bui. Waktu Yesus dapa dengar bagitu, ju Dia pulang pi Galilea.
13 Dia pi di Dia pung kampong Nasaret, ais Dia jalan tarús ko pi tenga di kampong Kapernaum. Itu kampong ada di dano Galilea pung pinggir, di Sebulon deng Naftali pung tana.
14 Deng bagitu, Dia bekin iko apa yang Tuhan Allah pung jubir Yesaya su tulis memang, bilang,
15 “Sebulon pung tana, deng Naftali pung tana
yang deka di dano Galilea, di kali Yarden pung sablá barat.
Orang yang bukan orang Yahudi ada tenga di situ.
16 Dong ada idop dalam galáp,
ma sakarang dong su dapa lia Taráng.
Te sakarang, Taráng su basinar
kasi samua orang yang balóm kanál sang Tuhan Allah.
17 Mulai dari itu waktu, ju Yesus mulai ajar orang bilang, “Bosong musti bale balakang deng kasi tenga bosong pung sala-sala dong, ko idop barisi su! Te sakarang samua orang su bisa maso jadi Tuhan Allah pung orang.”
Tuhan Yesus pange nalayan ampa orang ko iko sang Dia
(Markus 1:16-20; Lukas 5:1-11)
18 Satu hari, Yesus ada jalan iko dano Galilea pung pinggir. Dia nae katumu dua orang kaka-adi. Yang satu nama Simon, ma orang biasa pange sang dia, Petrus. Deng dia pung adi nama Anderias. Dong ada jala ikan di dano, tagal dong dua tu, nalayan.
19 Ju Yesus pange sang dong, bilang, “We, mari ko iko sang Beta su! Bosong biasa cari ikan, ma sakarang Beta mau ajar sang bosong, ko bosong jadi tukang cari jiwa.”
20 Dengar abis bagitu, ju dong dua kasi tenga dong pung jala, ko iko memang sang Yesus.
21 Ais itu, Yesus jalan tarús sadiki lai, ju Dia dapa lia Sabadeus pung ana. Yang kaka pung nama Yakobis, deng dia pung adi nama Yohanis. Dong dua ada ator bekin bae pukat dalam parahu sama-sama deng dong pung bapa. Ju Yesus pange sang dong dua ko iko sang Dia.
22 Dengar bagitu, ju dong jalan kasi tenga dong pung bapa deng dong pung parahu, ko dong iko memang sang Dia.
Tuhan Yesus ajar orang deng bekin bae orang saki dong
(Lukas 6:17-19)
23 Ais itu, Yesus dong bajalan kuliling propinsi Galilea, ko Dia ajar di orang Yahudi pung ruma sambayang dong. Dia ajar so'al Tuhan Allah pung Kabar Bae, deng kasi tau cara karmana ko orang bisa iko Tuhan Allah pung parenta. Deng Dia ju bekin bae samua orang dari dong pung panyaki macam-macam.
24 Sonde lama, ju kabar so'al Yesus pung bekin tu, tasiar kuliling sampe di propinsi Siria. Ais ju, orang bawa datang dong pung orang saki macam-macam, pi sang Dia. Dong ju bawa orang yang takaná setan, yang gila kambing, deng yang lumpu. Ju Dia bekin bae dong samua.
25 Itu waktu, orang bam-banya datang iko sang Dia. Dong datang dari propinsi Galilea, deng dari da'era Sapulu Kota, yang dong subu, bilang, Dekapolis. Ada laen lai yang datang dari kota Yerusalem, dari propinsi Yudea, deng dari kali Yarden pung sablá.