9
Tuhan Yesus bekin bae satu orang lumpu
(Markus 2:1-12; Lukas 5:17-26)
1 Ais itu, Yesus dong nae kambali pi dalam parahu, ko balayar pi dano pung sablá, sampe di Dia pung kampong sandiri.
2 Di situ ada orang yang dorok bawa dong pung kawan yang lumpu ko pi di Dia. Lia bagitu ju, Yesus tau dong ada parcaya sang Dia, bilang, Dia bisa bekin bae dong pung kawan tu. Ju Dia omong sang itu orang lumpu, bilang, “Ana, é! Beta su hapus buang lu pung sala dong.”
3 Ma ada barapa orang guru agama Yahudi di situ, yang dengar Yesus pung omong tu. Ju dong pung hati panas memang. Ais dong ba'omong, bilang, “Ini orang talalu barani omong bagitu, ó! Cuma Tuhan Allah sa yang bisa kasi ampon orang pung sala. Ma ini orang pung omong tu, bekin diri sama ke dia Tuhan Allah sa. Dia su hojat tu!”
4 Ma Yesus tau dong pung dalam hati. Ais Dia omong, bilang, “Akurang ko bosong pikir, kata, Beta ni, ada omong hojat?
5 Mana yang lebe gampang? Kalo Beta kasi tau sang ini orang lumpu ni, bilang, ‘Lu pung sala su dapa ampon,’ ko, Beta bilang, ‘Bangun suda, ko pulang.’
6 Kalo dia bangun memang, bosong baru lia bukti, bilang, Beta ni, Manusia Tulen. Te Beta ada hak ko kasi ampon orang pung sala.”
Ju Yesus parenta sang itu orang lumpu, bilang, “Bangun su! Angka lu pung tandu ko jalan pulang!”
7 Tarús, itu orang lumpu bangun, ju dia jalan pulang.
8 Lia bagitu ju, samua orang heran. Ais dong angka nae tinggi-tinggi Tuhan Allah pung nama, bilang, “Tuhan Allah tu, talalu hebat, ó! Dia su kasi kuasa bésar bagini sang manusia.”
Tuhan Yesus pange sang Mateos ko iko sang Dia
(Markus 2:13-17; Lukas 5:27-32)
9 Ais itu, Yesus jalan dari situ, ju Dia dapa lia satu orang tukang tagi bea yang ada karjá di kantor pajak. Dia pung nama, Mateos. Ais Yesus ajak sang dia, bilang, “Mari iko sang Beta!” Dengar bagitu, ju Mateos bangun ko iko memang sang Dia.
10 Ais itu, Mateos undang sang Yesus dong datang makan di dia pung ruma. Dia ju undang dia pung kawan-kawan tukang tagi bea, deng tamu-tamu laen dong, ko datang makan sama-sama deng dong.
11 Ma ada barapa orang dari partei Farisi, yang datang mangomek di Yesus pung ana bua dong, bilang, “Akurang ko bosong pung guru dudu makan sama-sama deng orang tar laku-laku dong, sama ke itu tukang tagi bea dong, deng dong pung kawan orang jahat dong?”
12 Ma Yesus kasi tau sang dong, bilang, “Orang yang saki memang parlú dokter. Ma orang yang su bae, sonde parlú.
13 Lebe bae bosong pulang ko pareksa bae-bae Tuhan Allah pung Kata-kata, yang dolu Dia suru Dia pung jubir Hosea tulis, bilang,
‘Beta pung mau, andia,
Beta pung orang dong basayang satu deng satu deng kasi tunju rasa kasian.
Kalo dong sonde bekin bagitu, na,
dong pung korban binatang yang dong bawa kasi Beta tu,
sonde ada pung arti apa-apa.’
Itu yang Tuhan Allah su bilang. Tagal itu, Beta sonde datang ko urus orang yang anggap diri su bae, ma Beta datang ko urus orang tar bae-bae dong.”
Orang tanya akurang ko Tuhan Yesus pung ana bua dong sonde puasa
(Markus 2:18-22; Lukas 5:33-39)
14 Ais itu, Yohanis Tukang Sarani pung ana bua dong datang sang Yesus. Dong tanya, bilang, “Botong yang iko sang Yohanis tu, biasa puasa. Orang Farisi dong ju puasa. Ma akurang ko Bapa pung ana bua dong maen makan-minum tarús? Dong tu, sonde tau puasa, ko?”
15 Ma Yesus manyao sang dong, pake umpama, bilang, “Bagini: kalo ada pesta kawin, tamu dong sonde puasa, ma dong makan kinyang. Kalo baroit laki-laki masi ada di situ, tantu dong samua makan rame-rame. Ma nanti satu kali, kalo orang laen tangkap bawa itu baroit laki-laki, ju dia pung tamán dong rasa susa dolo, baru itu sa'at dong puasa.
16 Orang sonde ame kaen baru sapo'ong, ko tempel pi di baju tua yang su tarobe. Te nanti kalo cuci itu baju, kaen tempel yang baru tu batakundur. Deng bagitu, itu baju tua tamba tarobe.
17 Bagitu ju, orang sonde isi tuak baru pi dalam haik yang su lapuk. Te nanti itu haik pica, ju itu tuak malele buang. Jadi, tuak baru musti po'a pi dalam haik yang baru ko dong dua batahan bae-bae!” [Deng bagitu Yesus ajar sang dong bilang Dia pung ajaran tu, baru. Jadi, jang kasi bacampor deng ajaran lama.]
Tuhan Yesus bekin bae satu mama yang saki dara loos, deng kasi idop kambali satu ana nona
(Markus 5:21-43; Lukas 8:40-56)
18 Waktu Yesus masi ba'omong deng Yohanis pung ana bua dong, ju ada satu kapala ruma sambayang datang katumu deng Dia. Itu orang tikam lutut di Yesus pung muka, ko minta, bilang, “Bapa, é! Tolong dolo! Te beta pung ana nona baru mati. Bapa tolong datang ko taro tangan di dia dolo, ko dia bisa idop kambali.”
19 Dengar bagitu, ju Yesus deng dia pung ana bua dong iko memang sang itu orang.
20-21 Di tenga jalan, ada satu mama yang jalan iko deng dong. Dia pung datang bulan sonde tau barenti batúl su 12 taon. Dia ada pikir di dia pung hati, bilang, “Asal beta bisa raba Yesus pung baju sa, tantu beta jadi bae.” Andia ko dia pi raba Yesus pung ujung baju.
22 Yesus ada barasa, ju Dia bale muka ko lia itu mama. Tarús, Dia omong, bilang, “Ana, é! Kasi kuat lu pung hati. Te, tagal lu parcaya batúl-batúl sang Beta, andia ko lu jadi bae.” Itu waktu ju, itu mama bae memang.
23 Ais itu, Yesus dong jalan tarús pi di itu kapala ruma sambayang pung ruma. Sampe di sana ju Dia maso deng lia tukang maen musik duka, deng orang banya manangis makarereu.
24 Ma Yesus omong deng dong, bilang, “Barenti manangis, ko bosong pulang su! Te ini ana sonde mati. Dia cuma tidor sa.” Ma dong katawa bengko mulu sang Dia.
25 Ais itu, ju itu orang dong kaluar samua. Ju Yesus maso pi dalam itu ana pung kamar, deng pegang dia pung tangan. Ju itu ana idop kambali memang.
26 Lia bagitu, ju orang mulai bacarita rame kuliling dong pung da'era, so'al apa yang Yesus su bekin tu.
Tuhan Yesus bekin bae dua orang buta
27 Ais ju Yesus jalan tarús. Di tenga jalan, ada dua orang buta iko-iko sang Dia. Dong ba'eki pange, bilang, “Raja Daud pung turunan, é! Kasian sang botong dolo!”
28 Yesus maso pi dalam ruma, ju itu dua orang buta tu datang sang Dia. Ais Dia tanya sang dong, bilang, “Bosong parcaya batúl-batúl, bilang Beta ada pung kuasa ko bekin bosong bisa dapa lia?”
Ju dong manyao, bilang, “Awii! Bapa jang tanya lai, te botong su parcaya sang Bapa isi-isi.”
29 Dengar bagitu, ju Yesus raba dong pung mata, deng omong, bilang, “Kalo bagitu, na, biar jadi iko bosong pung parcaya tu!”
30 Yesus omong ais bagitu, ju dong dapa lia memang. Ma Yesus kasi inga karás sang dong, bilang, “Inga, é! Jang kasi tau satu orang ju deng apa yang su jadi ni!”
31 Ma dong sonde bisa tahan diri. Ais dong jalan kuliling itu da'era ko kasi tasiar so'al Yesus pung bekin tu.
Tuhan Yesus bekin bae orang yang sonde bisa omong
32 Itu dua orang buta kaluar abis ju, orang bawa datang satu orang laen pi di Yesus. Itu orang sonde bisa ba'omong, tagal dia takaná setan.
33 Lia bagitu ju, Yesus parenta itu setan kaluar dari itu orang. Itu setan kaluar ju, itu orang bisa ba'omong memang. Ais orang banya di situ taheran-heran. Dong bilang, “Awii! Kotong orang Yahudi balóm parná lia yang bagini ni!”
34 Ma orang Farisi dong sonde sanáng. Dong omong, bilang, “Weh! Setan dong pung bos yang kasi Dia kuasa ko Dia bisa usir kaluar setan.”
Tuhan Yesus jato kasian lia orang banya dong
35 Ais Yesus pi kuliling banya kota deng kampong, ko ajar di ruma-ruma sambayang. Dia ajar orang so'al Tuhan Allah pung Kabar Bae, deng karmana dong bisa maso jadi Dia pung orang. Dia ju bekin bae samua macam panyaki, deng samua orang yang badan sonde batúl dong.
36 Lia itu orang banya tu, ju Yesus jato kasian sang dong, tagal dong sonde tau mau bekin karmana. Te dong samua tu, sama ke domba yang sonde ada pung gambala.
37 Ais Yesus omong deng Dia pung ana bua dong, bilang, “Ini orang banya ni, sama ke kabón pung hasil. Hasil su banya, ma orang karjá sonde cukup ko koru ame itu hasil, deng simpan pi dalam gudang. Tagal itu, bosong musti minta sang kabón pung Tuan, ko Dia kirim orang karjá, ko biar dong pi kumpul ame Dia pung hasil dong.”