10
1 Sodara dong! Beta kapingin apa, kasi sang orang Isra'el dong? Beta sambayang ko dong kasi biar Tuhan kasi salamat sang dong dari dong pung sala-sala. Kalo jadi bagitu, baru beta pung hati sanáng!
2 Beta bisa kasi tau so'al ini orang dong pung sifat: dong rajin ko mau iko sang Tuhan. Biar dong rajin bagitu, ma dong sonde mangarti jalan yang batúl.
3 Tagal dong sonde mangarti jalan idop yang batúl, yang bekin orang bisa babae deng Tuhan, andia ko dong buka dong pung jalan sandiri ko mau coba-coba babae deng Dia. Deng bagitu, dong sonde mau dengar sang Dia.
4 Kalo orang cuma bekin iko Atoran sa, ko biar Tuhan tarima sang dong, na, itu sonde cukup. Andia ko Kristus su bekin ganáp samua, ko biar kotong bisa babae deng Tuhan. Ais sakarang, samua orang yang parcaya sang Kristus bisa babae deng Tuhan Allah.
Tuhan mau kasi salamat sang samua orang dari dong pung sala-sala
5 Naa, dolu ba'i Musa su kasi tunju jalan di Tulisan Barisi, ko orang bisa babae deng Tuhan, asal dong bekin iko Tuhan pung Atoran samua-samua. Dia tulis, bilang, “Orang yang bekin iko ini Atoran samua-samua, nanti dong dapa idop yang batúl.”
6 Ma Tuhan pung Tulisan Barisi ju ada kasi tunju jalan laen, bilang, orang bisa babae deng Tuhan asal dong parcaya sang Kristus. Ada tatulis, bilang, “Sonde usa tanya, bilang, ‘Sapa yang bisa nae pi sorga?’ ” (Itu tingka ke orang mau nae pi kasi tau sang Kristus, bilang, kotong manusia ada kapingin ko Dia turun datang ko kasi salamat sang kotong.)
7 Tulisan Barisi ju ada tatulis, bilang, “Sonde usa tanya, bilang, ‘Sapa yang mau turun pi Lobang Naraka, di tampa orang mati dong?’ ” (Itu tingka ke orang mau turun pi ko bawa nae sang Kristus kambali dari Dia pung mati ko Dia kasi salamat sang kotong.)
8 Sonde usa bagitu! Te di Tuhan pung Tulisan Barisi ju ada tulis, bilang, “Tuhan pung pasán su ada di lu pung muka-idong! Te itu pasán ada di lu pung mulu deng lu pung hati.” Itu pasán yang kotong su kasi tau orang tu, bilang, “Kalo lu mau cari salamat, na, lu musti parcaya sang Kristus!”
9 Kalo lu mangaku pake lu pung mulu sandiri, bilang, “Yesus tu, beta pung Bos,” deng lu parcaya dalam lu pung hati, bilang, Tuhan Allah su kasi idop kambali sang Yesus Kristus dari Dia pung mati, na, Tuhan kasi salamat sang lu dari lu pung sala-sala.
10 Te kalo lu pake lu pung hati ko parcaya sang Kristus, Tuhan cap sang lu, bilang, orang hati lurus yang babae deng Dia. Deng kalo lu pake lu pung mulu ko mangaku, bilang, Yesus jadi lu pung Bos, Tuhan mau kasi salamat sang lu dari lu pung sala dong.
11 Di Tuhan pung Tulisan Barisi ada tatulis, bilang, “Orang yang parcaya sang Tuhan Allah, nanti sonde dapa malu, te Tuhan mau bekin jadi, samua hal yang Dia su omong.”
12 Orang Yahudi, deng orang bukan Yahudi dong, sama. Sonde ada beda. Te cuma ada satu Bos, deng Dia jadi Bos kasi samua bangsa. Dia mau kasi tunju Dia pung hati bae bam-banya kasi samua orang yang minta Dia tolong sang dong.
13 Te di Tulisan Barisi ada tulis, bilang, “Samua orang yang minta tolong sang Tuhan, nanti Dia kasi salamat sang dong dari dong pung sala-sala.”
14 Ma karmana orang bisa minta tolong sang satu orang, kalo dong balóm parcaya sang dia? Deng karmana dong bisa parcaya sang dia, kalo dong sonde parná dengar so'al dia? Karmana dong bisa dengar so'al dia, kalo sonde ada orang yang kasi tau sang dong?
15 Karmana dong bisa kasi tau orang, kalo sonde ada yang utus sang dong bagitu? Di Tulisan Barisi ada tulis, bilang, “Kalo orang bawa datang kabar bae, dong pung datang tu, talalu bagus!”
16 Ma bosong su tau, bilang, ada orang Isra'el saparu yang sonde mau dengar-dengar Tuhan pung Kabar Bae. Te Tuhan pung jubir Yesaya ada tulis, bilang,
“Bos, é!
Orang dong sonde mau parcaya pasán
yang dong su dengar dari botong!”
17 Jadi, kalo mau parcaya sang Tuhan, na, musti dengar Dia pung Kata-kata dolo. Deng kalo dong mau dengar Tuhan pung pasán, na, musti dengar so'al Kristus dolo.
18 Beta tanya coba, bagini: mangkali bosong ada pikir, bilang, orang Isra'el dong sonde parná dengar so'al Kristus, ko? Tantu dong su dengar! Sama ke ada tatulis dalam Tuhan pung Tulisan Barisi dari dolu, bilang,
“Tuhan pung jubir dong pung pasán so'al Tuhan
su tasiar pi di anteru dunya;
Dong pung kata-kata
su sampe di dunya pung huk-huk.”
19 Beta mau tanya lai satu hal, bilang, “Orang Isra'el dong sonde mangarti Tuhan pung jalan, ko?” Ba'i Musa tu, orang partama yang tulis so'al itu hal, bilang, Tuhan kasi tau orang Isra'el bagini:
“Beta mau bekin satu hal
kasi orang bangsa laen dong.
Itu hal nanti bekin bosong iri hati.
Deng Beta mau bekin satu hal,
kasi orang yang bosong anggap ke otak kea.
Itu hal nanti bekin bosong makan gigi.”
20 Dari balakang, ba'i Yesaya tulis taráng-taráng so'al orang bukan Yahudi, bilang,
“Ada orang yang dolu sonde cari-cari sang Beta,
ma dong su dapa katumu sang Beta.
Ada orang yang dolu sonde minta ko lia sang Beta,
ma Beta su kasi tunju diri sang dong.”
21 Ma so'al orang Isra'el, Tuhan su kasi tau bagini:
“Siang-malam, Beta buka Beta pung tangan lebar-lebar,
ko tunggu-tunggu orang Isra'el dong datang di Beta.
Ma dong sonde mau dengar sang Beta,
deng dong ju suka bamalawan sang Beta.”