16
Tuhan Allah pung mara tapo'a pi di bumi
1 Ais beta dengar ada satu suara karás kaluar dari Ruma Sambayang ko parenta sang itu tuju ana bua dong, bilang, “Pi su! Angka bawa itu bokor dong ko po'a buang Tuhan pung mara pi bumi su.”
2 Dengar bagitu, ju ana bua yang partama po'a buang dia pung bokor pung isi pi bumi. Takuju sa, calaka kaná samua orang yang parná tarima itu binatang buas pung cap, deng orang yang songgo dia pung patong tu. Dong kaná luka puruk yang saki mo mati.
3 Ais, ana bua nomer dua po'a buang dia pung bokor pung isi pi laut. Takuju sa, aer di laut jadi dara baboo busuk, sama ke orang mati pung dara. Ju samua yang idop di laut, mati abis.
4 Ais, ana bua nomer tiga po'a buang dia pung bokor pung isi pi kali deng mata aer dong. Ju itu aer samua jadi dara.
5 Ais beta dengar ana bua satu dari sorga, yang urus samua aer di bumi. Dia puji sang Tuhan Allah bilang,
“O Tuhan!
Tuhan yang barisi!
Tuhan yang sonde parná sala!
Tuhan su ada dari mula-mula,
Deng Tuhan nanti ada sampe salamanya.
Tuhan su putus parkara deng batúl.
Tuhan su kasi jato hukum yang pas.
6 Orang dong su kasi tumpa
Tuhan pung orang pung dara.
Orang dong su bunu mati
Tuhan pung jubir dong.
Andia ko, Tuhan su paksa ko dong ju minum dara.
Andia ko, Tuhan su balas deng kasi hukum yang batúl.”
7 Ais itu, beta dengar satu suara kaluar dari meja korban, yang manyao, bilang,
“Batúl! Tuhan Allah yang paling kuasa.
Batúl! Tuhan Allah yang paling hebat.
Tuhan yang putus parkara deng batúl.
Tuhan yang kasi jato hukum yang pas.”
8 Ais ju, ana bua nomer ampa po'a buang dia pung bokor pung isi pi matahari. Takuju sa matahari jadi talalu panas, sampe manusia dong tabakar.
9 Samua manusia yang kaná bakar tu, dong kutuk Tuhan Allah pung nama, tagal Dia yang suru kirim itu calaka kasi sang dong. Biar bagitu, ma sonde ada satu orang ju yang tobat, ais bale kambali pi Tuhan, ko angka puji sang Dia.
10 Ais, itu ana bua nomer lima po'a buang dia pung bokor pung isi pi di itu binatang buas pung korsi parenta. Takuju sa ju, galáp gulita tutu ame samua orang yang songgo sang dia, sampe dong makan gigi, ko biar dong bisa tahan sangsara.
11 Dong ju kutuk sang Tuhan Allah di sorga, tagal dong pung luka tu, saki mo mati. Biar bagitu, ma sonde ada satu ju yang barenti bekin jahat, ais bale ko iko sang Tuhan.
12 Ais ana bua nomer anam po'a buang dia pung bokor pung isi pi di itu kali bésar, nama Efrat. Ju itu kali pung aer karíng memang. Ais dong bekin jalan di situ kasi raja-raja deng tantara dong yang nanti datang dari sablá timur.
13 Ju beta dapa lia tiga setan yang jahat. Dong pung model sama ke katak. Satu kaluar dari itu ular naga pung mulu. Satu kaluar dari itu binatang buas pung mulu. Deng satu lai kaluar dari itu ular naga pung jubir tukang putar-balek pung mulu.
14 Itu tiga setan dong ada pung kuasa ko bekin tanda heran macam-macam. Dong kaluar ko pi katumu samua raja di dunya, ais dong bajanji satu waktu ko mau pi baparáng lawan Tuhan Allah yang paling kuasa. Ma itu waktu yang dong su bajanji tu, andia Tuhan Allah pung waktu yang Dia su pili ame ko bekin kala Dia pung musu samua.
15-16 Itu tampa yang nanti dong bakumpul ko baparáng tu, bahasa Ibrani, bilang, Armagedon.
Yesus Kristus ju omong, bilang, “Inga bae-bae! Takuju sa, te Beta datang sama ke pancuri yang orang sonde sangka-sangka. Orang yang mete jaga deng pake pakean langkáp dong paling ontong. Te nanti kalo Beta datang, dia sonde dapa malu, tagal orang sonde dapa lia dia pung talanjang.”
17 Ais, ana bua nomer tuju po'a buang dia pung bokor pung isi pi di angin. Ju Tuhan Allah omong deng suara bésar dari Dia pung korsi parenta di Ruma Sambayang, bilang, “Su abis! Beta pung mara su tapo'a abis samua!”
18 Tarús ada kilat yang basambar, deng guntur yang babunyi bésar basambung. Deng tana goyang yang paling bésar yang balóm parná jadi di bumi, ju datang.
19 Itu waktu, Tuhan Allah sonde lupa kota Babel pung jahat. Dia pake itu tana goyang luar biasa, sampe itu kota hebat tabalá bagi tiga. Dia bekin bagitu, ko biar orang Babel dong rasa Dia pung mara. Kota-kota laen di dunya ju rubu buang.
20 Itu waktu pulo-pulo dong tanggalám bagitu sa, deng gunung-gunung dong ju ilang buang samua.
21 Ada ju ujan es batu yang bésar-bésar jato dari langit ko tendes ame manusia. Itu es batu dong pung barát, ada yang sampe ampa pulu kilo. Tagal itu ujan es yang bekin sangsara sang dong, andia ko manusia dong kutuk sang Tuhan Allah.