2 Timotius
Paulus pung surat yang kadua
kasi dia pung tamán Timotius
1
Salam
1-2 Timotius yang bae!
Ini surat dari beta, Paulus, yang Tuhan Allah sandiri su pili ame jadi Yesus Kristus pung utusan. Dong utus sang beta ko pi kasi tau itu idop yang batúl, yang Tuhan su janji kasi samua orang yang parcaya sang Yesus Kristus.
Timotius! Lu su sama ke beta pung ana sandiri. Jadi, beta sambayang minta ko Allah Bapa deng kotong pung Bos Yesus Kristus, sayang sang lu, kasi tunju hati bae sang lu, deng kasi lu idop aman deng dame.
Paulus minta tarima kasi sang Tuhan
3 Siang-malam, beta sambayang kasi sang lu. Beta salalu minta tarima kasi sang Tuhan Allah, tagal lu iko tarús sang Dia. Beta layani sang Dia deng hati barisi, sama ke kotong pung ba'i-ba'i dong layani sang Dia.
4 Beta inga waktu kotong bapisa dolu, lu tumpa aer mata. Andia ko beta rindu katumu lai sang lu, ko biar beta pung hati sanáng.
5 Beta inga dolu waktu lu mulai parcaya batúl-batúl sang Tuhan Yesus. Parcaya yang macam bagitu tu, su ba'akar memang di lu pung oma Luisa, deng lu pung mama Yunike pung hati. Deng beta ju yakin, bilang, parcaya macam bagitu ju ada idop di lu pung hati.
Paulus minta Timotius ko pake karunya yang Tuhan kasi
6 Dolu, waktu beta mua tangan di atas lu pung kapala, deng sambayang kasi sang lu, itu waktu Tuhan bekin sang lu ko lu mampu karjá kasi sang Dia. Jadi, sakarang, beta minta ko lu kipas kasi manyala ulang lu pung karunya tu.
7 Te Tuhan Allah pung Roh sonde bekin kotong jadi orang pana'u. Ma Dia bekin kotong jadi orang yang mampu deng parcaya diri, yang tau basayang, deng yang tau kekáng diri bae-bae.
8 Jadi, jang malu omong so'al kotong pung Bos. Deng jang malu tagal beta ni orang bui. Te beta maso bui ni, gara-gara beta layani sang Dia. Naa! Kalo lu pi kasi tau itu Kabar Bae, lu musti siap-siap ko pikol susa sama ke botong. Kalo lu dapa susa bagitu, Tuhan nanti bekin kuat sang lu.
9-10 Tagal Tuhan yang kasi salamat sang kotong dari kotong pung sala dong.
Deng Dia su pili ame sang kotong ko jadi Dia pung orang yang barisi.
Dia kasi tunju Dia pung hati bae sang kotong, tagal Dia sayang sang kotong.
Padahal, kotong sonde bekin apa-apa yang bekin kotong pantas tarima Dia pung bae.
Tuhan balóm bekin ini dunya, ma Dia su putus ko kirim Yesus Kristus datang,
ko kasi tunju Dia pung hati bae, deng kasi salamat sang kotong.
Ais Yesus Kristus su datang, deng su buka itu rancana pung isi.
Deng Dia su bekin ancor mati pung kuasa!
Ini jadi Kabar Bae!
Jadi, sapa yang parcaya sang Yesus Kristus sonde mati mampos lai, ma idop tarús deng Tuhan Allah.
11 Andia ko Tuhan Allah angka sang beta jadi Yesus Kristus pung utusan, ko beta kasi tau Dia pung Kabar Bae, deng beta ajar orang di mana-mana.
12 Itu samua bekin beta sangsara di dalam ini bui. Ma beta sonde malu! Tagal beta tau sapa yang beta parcaya, andia Tuhan Yesus. Deng beta ju tau batúl, bilang, Dia yang taro ini tugas di beta pung tangan, Dia yang mampu jaga ini tugas, deng Dia yang bekin beta mampu kasi jalan ini karjá sampe Dia datang kambali lai.
13 Jadi, iko suda conto idop dari ajaran yang batúl, yang beta su kasi tunju sang lu. Kalo lu parcaya tarús, deng sayang samua orang bagitu, itu kasi tunju, bilang, lu su jadi satu deng Yesus Kristus.
14 Tuhan Allah su taro satu harta yang mahal di lu pung tangan, andia ajaran yang batúl. Jadi, piara bae-bae itu harta, ó! Pake Tuhan Allah pung Roh yang Barisi yang ada dalam kotong pung hati, ko biar Dia bantu sang lu piara itu harta bae-bae.
Onesiforus tolong sang Paulus di bui
15 Tantu lu su dengar, bilang, Figelus deng Hermogenes, deng orang laen dari propinsi Asia dong su bale balakang kasi tenga sang beta.
16-18 Ma Onesiforus laen. Dia sonde ondor dari beta. Lu sandiri tau, dolu waktu beta masi di kota Efesus, dia maen tolong tarús sang beta. Sakarang dia su tenga di kota Roma sini. Waktu dia pung sampe, dia cari kuliling sang beta di mana-mana. Ahirnya dia dapa sang beta di bui. Ma dia sonde malu. Dia maen datang lia sang beta tarús di bui sini, ko kasi kuat beta pung hati.
Jadi, beta sambayang minta ko Tuhan Allah kasi tunju Dia pung hati bae sang Onesiforus deng dia pung kelu samua. Nanti pas deng hari kiamat, kalo Tuhan putus manusia dong pung parkara, na, beta harap ko Tuhan putus yang bae kasi sang Onesiforus dong.