1 Ang di diemam nga, am nga amwete pang ye dada dook mata yo Maro lono be katoo ngan oo. Le moolmool, ang ngan katoo dada dook mata tina ngan. Bong nookoot nga, amwete le koomam mede pang ye Tool Mai Yesu ene nen, be kayepe ngan katoo dada tani in le ikenen leu. 2 Ang ngan lomim galanga ye betanga tina le imot yo amwete pang ye Tool Mai Yesu ene ngan oo.

3 Ngan Maro lono nen, be kayepe ben di tooltool yo ipootoo di panga ya taunu nga, inbe kasur dada dook tiap tina yo ke yeingi bauk nga. 4 Inbe ang atu atu kakap tutang dook leu a be nen ngan kayepe le taukamim busunu ben di tooltool yo Maro ipootoo di panga ya taunu nga, inbe di tooltool ole tikamatang ben dada kiang yo kayei nga, ngan dook mata ye matadi. 5 Nen le kin katoo di tooltool gok yo tinidi iyolo di be la tiyei dada dook tiap matana matana ke bauk, ngan be. Di ngan lodi galanga ye Maro tiap. 6 Ngan nen le kin kayei dada dook tiap pang di diede kapala yo titara lodi medana pang Yesu nga, inbe kakaua lungunu ye di a kayei dada yo nen ngan pang di rimadi be. Muku ngan amwete betanga medana pang nen, be di tooltool yo tiyei dada nen nga, ngan ole Tool Mai iyemenai di le imot. 7 Ngan ole iyei nen, yesoo Maro ikiu idi be man tatoo dada yo giri leu ye matana ngan tiap, bong ikiu idi be man tayepe le taukada busunu ben di tooltool yo ipootoo di panga ya taunu nga. 8 Ngan nanga, kumata tooltool be lono pang betanga tina ngan tiap le iwala murini panga nga, ngan iwala murini pang betanga ke di tooltool tiap, bong iwala murini pang betanga ke Maro yo ikaua Amunu Silene pang i.

9 Am nga taukamam betanga be amwode pang ye dada yo be lomim pang di diemim ye mai san i. Yesoo, dada yo ngan Maro ipatomonai ang ye oo. 10 Moolmool, ang ngan lomim mai san pang di tooltool yo titara lodi medana pang Yesu a tiyepe ye malala tina yo iken ye tana mai Masedonia ngan oo. Bong ang di diemam nga, am nga lomam be ampamadit lomim mulu a be nen ngan lomim pang di diemim mai le mai san.

11 Nen le kin kakapye be kagarung burungu le urata ke di diemim be. Bong dook mata ngan nen, kayepe moonoombe, inbe kayei urata kiang tapmim ye baemim dawa ben muku ngan amwete pang nga. 12 Kumata le be kayei nen nga, ngan o ke be matamim saraia tool atu sa be ilonang ye so yo kamaka ye, ngan tiap. Inbe di tooltool yo titara lodi medana pang Kirisi tiao nga, ngan ole lodi ponana ye dada kiang yo kayeii i.

13 Ang di diemam nga, am nga lomam be lomim galanga dook ye soo so yo be pombe pang ye di tooltool yo titara lodi medana a timmata koot nga. Ole nen ngan lomim modoko mata dawa ben di tooltool kapala yo titara lodi medana pang Maro tiap nga. Ngan di ngan titar matadi pang Maro inbe tinamu be iyeie dada dook mata sa pang di ngan tiap, le lodi modoko mai san. 14 Bong idi nga tatara lodo medana nen, be Yesu imata, motong la imadit mulu ye ni ke matenge nga. Ngan nen le idi nga tatara lodo medana lapau nen, be Maro ole ipamadit di tooltool ke Kirisi yo timmata koot nga, a timadit mulu le lo tiye Yesu tiyepe. 15 Nen le am nga amwete pang ye betanga yo Tool Mai ya taunu ipatomonai am ye nga. Ngan nen, ye kene yo Tool Mai tani be imulu a isi ye in nga, ngan idi tooltool yo tayepe matada rrene go nga, ngan o ke be tamuku pang di tooltool yo timatamata koot, ngan tiap. 16 Bong ole Tool Mai iwete le kalngana mai, inbe bangabangana ke Maro yo imuku pang di diene kapala i, in ole koonoo le mai, inbe tauru ke Maro ole itang. Ngan la be Tool Mai tani iyege malala ke Maro a isi, inbe di tooltool yo titara lodi medana pang Yesu a timmata koot nga, ngan ole di la be timadit muku ye ni ke matenge nga. 17 Lo ngan be idi tooltool yo tatara lodo medana a tayepe matada rrene go nga, ngan ole taye di tooltool tina ngan tagaua a tapa ye eng tene a talo pang ete a lo taye Tool Mai tani in tagaua nango la lang katene ngo. Inbe ole taye tayepe ye ke tina yo kanakana nga le imot. 18 Nen le ang ngan kawete betanga tani i pang di tooltool kapala ke Maro nga, a be nen ngan kapamede lodi ye.