1 Ang di diek yo ke Kirisi nga, ang ngan ole lomim pang di diemim kapala ben di taimim le toomim le ikenen leu nen. 2 Inbe kin lomim kalli dada dook mata yo be kayei pang di lowo, ngan be. Le kumata be di tooltool ke malala san tipa le man pombe pang yang nga, ngan lomim ponana ye di a kakap di a kaye di kala rumu kiang. Yesoo, muku ngan di tooltool kapala tikap di lowo a tiyei dada dook mata pang di, bong lodi galanga yo ben di ngan di bangabangana ke Maro, ngan tiap. 3 Inbe di diemim kapala yo titar di lo rumu dook tiap ke di talnga dikidiki lono nga, ngan ole lomim kaua urata ye di ben ang ngan kaye di kayepe gaongo ye rumu dook tiap tani. Le lomim tut di a matamim so di inbe kalon di. Inbe kumata le be di tooltool tiyei dada dook tiap sa pang di diemim kapala nga, ngan ole lomim kaua urata ye di ben ang ngan kaye di kasolo masngana yo pombe pang ye di nga. Le lomim tut di a kalon di.

4 Ngan dada yo ke kerenge in so dook mata. Le ang kerenge atu atu le imot nga, ngan kin kagarung kerenge kiang inbe kala kayei dada dook tiap yo giri leu ye Maro matana, ngan be. Yesoo, Maro ole iyemenai di tooltool yo tiyei dada dook tiap ke bauk a tikapsap ye dada ke di kerenge nga. 5 Inbe ang ngan kin katara lomim mai san ye pat ke yimoongoo so yo be ilonang ye yepongo kiang, ngan be. Bong lomim ponana ye kasin yo kakap koot nga, yesoo Maro ya taunu iwete nen;

7 Ang ngan ole lomim tut di kuto maimai kiang yo muku ngan tiyepe inbe tiwete pang ye betanga ke Maro nga. Inbe lomim kaua urata ye dada dook mata yo titoo ye yepongo kidi ngan le itar kanono dook mata nga, inbe katoo di ye lodi medana yo titaru i. 8 Yesoo, Yesu Kirisi in ipalele tiap. Ngan dada yo ki, ngan iken gaongo nen mukot, le se nookoot katai nga, inbe ole iken nen a tala.

9 Le kin kamot ye longono patomonaingi matana matana le imot yo ipa san ye betanga ke Maro nga, ole nen ngan igarungang le kayege dada moolmool yo ke Maro nga. Kakamata, di tooltool kapala tipatomonai ang ke be katoo momo kidi Yuda ye kaningi so, bong dada yo nen nga, ngan ke be ilon di pitiap yege. Bong patomonaingi yo be ilonidi dook mata in nen, be idi nga takodo le tamede ye dada yo be Maro lono paidi a iyei dada dook mata paidi ye nga. 10 Ngan idi nga kookoowoo kiidi ke paroranga so in iken, inbe paroranga kiidi la Kirisi i. Bong di tooltool ke paroranga so yo titoo dada gurunu a tiyei urata ke Maro ye badabada ke sungunu lono nga, ngan ke be tikana paroranga paunu tani tiap. 11 Le moolmool, yesoo muku ngan tool kuto mai ke paroranga so pang Maro, in ikap rara ke di asara yo be iyei paroranga ye a igiri noonoo kidi tooltool ye nga, ngan a ilo ye rumu lono yo tiwete ene ye Ni Mison Ki Taunu i. Bong asara kanono, ngan tikap a tidu ke diki ke malala, motong la tidaun a ei ikan le iyei kaua koonoo nga. 12 Ngan nen le Yesu lapau, tikauu a tidu ke diki ke koongoo ke malala mai Yerusalem, motong la isolo masngana a imata nga, a be nen ngan rara ki imati a igiri noonoo kidi tooltool le tiyei ben di tooltool yo Maro ipootoo di panga nga. 13 Nen le idi nga tayege malala i a tadu ke diki ye Yesu, inbe tatoo Yesu ye dada yo ya iyeii i. Le kumata be tipammoo idi dawa ben yo tiyei panga nga, ngan dook mata sila tiyei nen. 14 Le kin idi nga tayei nen, yesoo nookoot nga idi nga taukada malala mai moolmool yo iken ye tana i nga, bong idi nga tatar matada ye malala mai kiidi moolmool yo be pang dama ni ngan pombe mallangana i.

15 Ngan nanga, Yesu imata a rara ki imati nga, ngan be ikarata dada paidi be tala potai ye Maro. Le kumata be nen nga, ngan kanakana ngan tala ye a tayitmaka ene ben so ke paroranga dook mata yo be lon ponana ye i. Inbe idi nga ole tawete betanga yo be tayitmaka Tool Mai kiidi tani in ye nga. 16 Inbe lomim tut di diemim kapala a kayei dada yo dook mata ngan pang di. Le kumata be timaka ye so sa nga, ngan kakap so kiang pang di a kalon di ye, yesoo dada yo nen nga, ngan la ben paroranga dook mata yo be Maro lon ponana ye nga. 17 Kalongo betanga ke di kuto maimai kiang a karaua pang di le kayepe la gurana kidi parmana. Yesoo, di ngan la Maro itar di be matadi kalang nga, inbe pang dama ni ngan ole lo tikodo matana, a be nen ngan ikamata di, inbe tiwete nin urata kidi yo tiyei ngan dook, too dook tiap. Le kalongo betanga kidi a katoo, a be nen ngan lodi modoko be, bong lodi ponana, inbe tiyei urata yo kidi ngan dook. Yesoo, kumata le be lodi modoko nga, ngan ole tilonang dook tiap ye urata kidi yo tiyei nga.

18 Au i atorang be kin le kapatarau pang Maro be ilonam. Ngan am nga amyetai ben amkapsap ye dada dook mata le imot yo lomam wetewete ye be amtoo, ngan siap. Inbe lomam be dada kiam le imot yo amyei nga, ngan dook mata ye di tooltool matadi. 19 Inbe awete le kook mede ye betanga pang nga be kapatarau pang Maro, a be nen ngan ilonau a palbe leu be amulu a amala matak so ang.

20-21 Ngan au i apatarau nen, be Maro, yo ikaua lo silene ki paidi i, in ole iyei dada yo dook mata ngan pang ye so nga le imot, a be nen ngan kayei soo so yo ya lono be kayei nga. Inbe apatarau be Maro ole iyeie soo urata yo ya lon ponana ye be iyeii pang i, in ye Yesu Kirisi. Ngan Yesu tani in ya la ilonidi ben tool dook mata yo matan kala di sipsip ki le so sa ke be igarung di tiap i. Inbe ye rara ki yo imati in nga, ngan ya in iyeie betanga medana yo Maro itaru be ole iken nen le taukan motingi, inbe ikarata dada paunu yo be taye Maro tagaua le atu ye i. Ngan nen le Maro ipamaditi ye ni ke matenge. Le tayeie Yesu ene le ilo ete ke be di tooltool tipayiti ye le ikenen nen le taukan motingi. Moolmool!

22 Ang di diek nga, ngan au i awodo rau modono naii pang, le atorang be katar talngamim dook a kalongo betanga ke soo so yo be apamedang ye nga.

23 Ngan au i lok be lomim galanga nen, ede san yo Timoti i, in isi tana ye rumu dook tiap ke di talnga dikidiki oo. Le kumata be iman pombe nga, ngan ole aye ammala matamam so ang pa.

24 Kawete lo ponana kiau pang di kuto maimai kiang le imot, inbe pang di tooltool ke Maro le imot yo tiyepe nin, ngan lapau. Inbe di tooltool ke Maro yo tipa ke tana mai Itali a man tiyepe ni nga, ngan di lapau tiyawar lo ponana kidi pang.

25 Au i apatarau pang Maro nen, be lono pang a iyei dada dook mata pang ang le imot.