12
Garup Iye Moto Dook Tiap
1 Ngan akamata so tina ngan a imot, motong la be matak lo mulu, ngan le atakrai ye mos maiyoko san mulu yo pombe ye lang katene i. Ngan mos tani in akamata garup atu, inbe sousoungu yo isousou ye in ke matana, inbe taudu iken ke kene parmana. Inbe koomoo yo iken ye kutono i, in kanpitiki sangaul be ru iken ye lapau. 2 Inbe garup tani in kapono, bong ikapye be ipasui le nga imassingi, inbe itang le mai. 3 Motong la be matak pang nen, ngan atoo, akamata mos san mulu pombe ke lang katene, ngan le akamata moto kooroonoo somai atu.* Ngan moto tani in somai inbe malmalini lapau. Inbe moto tani tigasa be ikan di tooltool ye ei yo ipas ye koonoo i. Ngan moto tani in kutono limi be ru, inbe sipi ki sangaul. Inbe koomoo ke kutono limi be ru yo itar lo kutono nga, ngan dawa ben kidi tooltool kuto maimai yo matadi kala tana maimai nga. 4 Ngan moto tani in ini ikaruru di kanpitiki alunu san ke lang katene a ikatte di tidu tana. Ngan di kanpitiki alunu tina ngan ben tipoto di le tiyei budanga tol, motong la budanga atu in la ikatte a idu tana i. Motong la ilo ikodo dama ke garup tani yo be ipasui i, inbe inamu be le ipasuiu natunu tani in nga, ngan ole palbe leu be ikani a itona le ipa ye kerana. 5 Motong la garup tani in be ipasui ngan le ipasuiu natunu tamoto. Inbe kase tamoto tani in ole itoko so dawa ben koro medana ye baene a iyei tool kuto mai pang di tooltool ke ni mai i le imot. Bong kene yo tinana ipasuiu ye in nga, ngan le di bangabangana ke Maro tipasnaki palbe leu a ilo pang ye Maro ye ni yo kookoowoo ki ke burungu iken ye i. 6 Inbe garup in ikoo a ila la iyepe ye ni sorrakene yo Maro ikarata panga i, a be nen ngan di bangabangana ke Maro matadi kala, inbe tikapraii ye ke 1,260.
7 Ngan garup tani in ikoo a ila, motong la patokongo mai pombe ye malala ke Maro. Nen le Maikel iye di bangabangana ki la tiraua moto, inbe moto tani in iye di bangabangana ki tiportak a tiye di tipatoko lapau. 8 Bong ngan moto tani in taukan gurana, nen le iye di bangabangana ki tiyege ni kidi yo iken ye malala ke Maro i, 9 inbe Mikel iye di bangabangana ki tikatte moto tani in a idu tana. Ngan ya in moto tani yo mukot yege ngan iyepe i, inbe ya in ene la Satan i. Inbe ya la tool kuto mai kidi so sadi, inbe tool ke be ikap lungunu ye di tooltool ke tana mai i le imot i. Nen le ya la tikatte le ipa ye di bangabangana ki a tidu tana i.
10 Motong la alongo tool atu kalngana koonoo le mai ye malala ke Maro a isi inbe iwete nen,
“Nookoot nga gurana ke Maro kiidi in pombe la mallangana oo.
Ngan ye gurana ki tani in la le ikap di tooltool ki a ipamulu di ye so dook tiap yo be igarung di i,
inbe man igaua di le imot a be matan kala di.
Inbe ikaua gurana mai pang Kirisi a be nen ngan iyei tool kuto mai pang so nga le imot,
yesoo tool yo isopo koonoo pang di diede la Maro kiidi matana ye ke le bong i, in tikatte a idu tana oo.
11 Bong di diede tina ngan tikodo le timede a tillosi
ye gurana ke rara ke Sipsip Natunu yo imati ye kai palasingi i,
inbe ye betanga ki yo tiweteweta pang di tooltool i.
Di ngan lodi pang yepongo kidi ke tana in mai mata tiap,
inbe titattadai ye yo be timmata, ngan tiap lapau.
12 Ngan nen le ong malala ke Maro,
inbe ang di tooltool le imot yo kayepe ye malala tani in nga,
ngan lomim ponana.
Bong atoo, ong tana inbe ong tiek, kin kakamatang dook leu,
yesoo tool kuto mai kidi so sadi la isila pang yang in.
Ngan ya in katen malmal mai san,
yesoo lon galanga nen be lal ki in mooloo mata tiap.”
13 Yeisa be moto tani in ikamata ben ya in tikatte a idu tana nga, ngan le inini garup tani yo ipasuiu kase tamoto i. 14 Bong garup tani in tikap man kamoko balini ru panga a be nen ngan iro le ila ye ni sorrakene yo Maro ikarata panga i, a be la iyepe ni mooloo ye moto tani, inbe di bangabangana matadi kala a tikapraii ye rai kerana tol inbe rai san in kapala ki. 15 Motong la moto tani in ilunaia ran ye koonoo le dawa ben oongoo mai idu ye moolooi a itoo garup tani be du ikauu a be nen ngan idadup a imata. 16 Bong ngan tana ilono garup tani a perbe le koon panganga, inbe itono ran tani in. 17 Nen le moto tani in ikap malmal panga le ila be la ipamaditi malmal pang di natunu kapala nga le imot. Di natunu nga, ngan di tooltool tina yo titoo betanga ke Maro inbe tikodo le timede ye betanga moolmool ke Yesu nga. 18 Motong la moto tani in sila ikodo ululu pono tiek.
*12:3 Ngan moto tani in somai inbe malmalini lapau. Inbe moto tani tigasa be ikan di tooltool ye ei yo ipas ye koonoo i.