18
Tigarungu Babilon
1 Le nga so tina ngan pombe a imot, motong la akamata bangabangana ke Maro san mulu in ipa ye malala ke Maro a isi. Ngan bangabangana tani in gurana ki mai san, inbe nunngana ilolo a ilangaraia tana i le imot. 2 Inbe koonoo le gurana nen,
“Malala mai Babilon in tigarungu oo.
Le moolmool, ya in tigarungu le dook tiap yege.
Le nookoot ngan malala koonoo le di so sadi leu la tiyepe ye nga.
Nen le di so sadi ke yeingi noonoo,
inbe di man yo tinidi giri leu nga,
inbe di man yo ke be takan di tiap nga,
ngan di leu la tiyepe ye nga.
3 Ngan tigarungu nen,
yesoo di tooltool ke ni mai i le imot nga,
ngan tiye tiyei gogo dada dook tiap ke bauk mata,
le dawa ben tool iyin ran medana yo ene wain in le kuton moo ye a iyei kapa nga.
Inbe di tooltool kuto maimai yo matadi kala tana maimai nga,
ngan tiye tiyei bauk lapau.
Inbe ya in taukan moomoonoo le tina kanakana ngan iyimi so yo pat ki mai san nga ye di tooltool ke yawaringi so.
Ngan nen le di tooltool tina ngan ballingadi ye so kidi tina yo iyimi nga.”
4 Motong la alongo tool san mulu kalngana ye malala ke Maro in iwete nen,
“Ai, di tooltool kiau nga, kayege malala ke garup lekelekene tani in a kapas a kasi diki,
ngan la be kayei dada dook tiap yo dawa ben ya iyei ngan tiap nga.
Ole nen ngan kayei ene ye kene yo be tikap urata moonoo masngana panga ye noonoo ki tina ngan kootoonoo ye i.
5 Ngan garup tani in noonoo ki alunu san le ben tagaun pat a budanga ki ilo ete le be lo itoko lang nga.
Nen le Maro lon tut ye dada dook tiap ki tina yo iyei nga le imot.
6 Inbe lomim tut ye dada dook tiap ki yo iyei pang nga,
a be nen ngan karau dada dook tiap ki tina ye dada gaongo leu le paru.
Muku ngan ikap ran malingene pang be kayin,
bong be karaukol ran ki nga, ngan ole kakap ran malingene gaongo leu panga a iyin le paru.
7 Ngan garup tani in iyimi so yo pat ki mai san ngan panga ya taunu be lon ponana ye.
Ngan nanga, karautoo ene le idu lopo yege,
inbe kakaua urata moonoo masngana dook tiap panga ye dada dook tiap ki yo iyei, ngan kootoonoo.
Ya in ye lono ngan ya taun ipayiti nen,
‘Au i garup kuto mai le awur ye kookoowoo kiau ke burungu a nen ngan matak kala di tooltool ke tana mai kiau i.
Inbe au i ben garup tap tiap lapau, le so sa yo be iyei au a lok modoko ye a atang, ngan tiap.’
8 Ngan tina yo iyei nen nga,
le ole so dook tiap matana matana alunu la be pombe pang ye nga, ngan ye ke ataleu.
Nen le pitolo mai ole pombe,
inbe di tooltool alunu la be timmata nga le tangini mai ole pombe lapau.
Inbe ei ole ikani le imot,
yesoo Tool Mai Maro yo gurana ki mai san i,
in ya la ikarata betanga ki i.
9 “Nen le ye kene yo ei ikana malala tani le kutana ikut a ilo pang ete ye in nga, ngan di tooltool kuto maimai yo matadi kala tana maimai kapala nga, ngan ole tikamata le lodi modoko ye. Di tooltool tina ngan tiye tiyei dada dook tiap ke bauk, inbe tiye tiyimi so yo pat ki mai san ngan pang di tapdi lapau. Ngan nen le di tooltool tina ole lodi modoko a titang ye. 10 Bong di tooltool kuto maimai tina ngan ole tila potai ye tiap, yesoo titattadai, inbe lodi imassingi ye so yo pombe pang ye nga. Nen le ole tikodo manga mooloo ye, inbe tiwete nen,
‘Atoo! Atoo, Babilon ong in malala mai,
inbe gurana kiong mai san lapau.
Bong ye manga modono kasin leu nga,* Ngan manga modono kasin in dawa ben ‘aua’ atu leu.
ngan la le urata dook tiap ke noonoo kiong ngan kootoonoo pombe pang yong koot nga.’
11 “Ngan di tooltool ke tana yo tiyawar so a be tikap pat ye nga, ngan ole lodi modoko ye Babilon inbe titang ye, yesoo tool sa mulu be iyimi so kidi yo ke be tiyawar a tikap pat ye, ngan tiap. 12 Ngan so kidi tina yo tiyawar nga, ngan pat yo gol le silba nga, inbe pat matana matana yo isallin dook mata nga, inbe pat ke gomo yo sallinene ngan lapau. Inbe tiyawar wam yo puspusngana nga, inbe wam san yo yoongoonoo be kooroonoo yo pat ki mai san nga, inbe wam yo tinini ilappus nga. Inbe tiyawar kai medana yo ene sitron nga, inbe so yo tikarata ye asara yo ene elepen in dongana nga, inbe so kapala yo tikarata ye baras le so san medana yo ene ain i, inbe pat san yo tinini rorngana i. 13 Inbe so kidi kapala yo tiyawar nga, ngan kai kulini yo kini ki dook mata nga, inbe so ben laki ke kaningi, inbe so yo tidauni ngan kutana ikini dook mata nga, inbe kai yo ene mir in surunu nga, inbe so dawa ben matuk gorengana yo kini ki dook mata nga. Inbe tiyawar ran medana yo ene wain nga, inbe kai olip surunu, inbe dingding patunu yo maroana nga, inbe dingding patunu yo ene wit nga. Inbe tiyawar asara yo edi bulumakau le sipsip nga, inbe oos tipa ye koror kidi, inbe di poranga le di tooltool kapala yo tiyepe mauredi nga, ngan lapau. Bong tool sa mulu be iyimi so kidi yo be tiyawar a tikap pat ye, ngan tiap.
14 “Ngan nen le di tooltool tina yo tiyawar so a tikap pat ye ngan ole tiwete nen, ‘So le imot yo muku ngan lom panga le kop nga, ngan nookoot nga ilene yong oo. Inbe balingi le moro kiong yo dook mata nga, ngan ilene a imot le ke be kupuske mulu tiap.’
15 “Di tooltool yo tiyawar so tina ye malala tani ngan le tikap welewele pat ye nga, ngan ole titattadaia masngana yo pombe pang ye malala mai tani le tikodo manga mooloo ye. Inbe ole lodi modoko a titang le mai, 16 inbe tiwete nen,
‘Atoo! Atoo, lomam pang malala mai ni koot sa,
yesoo muku ngan isousou ye sousoungu dook mata yo puspusngana nga,
inbe isousou ye sousoungu yo kooroonoo inbe yoongoonoo le dook mata san nga.
Inbe isorosoro ye gol inbe ye pat matana matana yo isallin dook mata nga,
inbe matauu ki ngan tikarata ye pat ke gomo yo sallinene nga.
17 Bong ye manga modono kasin leu nga,
ngan balingi le so ki tina yo dook mata nga, ngan ilene a imot oo.’
“Ngan di koddenge ke ookoo nga le imot, inbe di malaungu le imot yo tikooi ye ookoo a be tila pang ye malala kapala nga, inbe di loningi ke koddenge ke ookoo, inbe di tooltool ke yoosoongoo nga, ngan ole tikodo manga mooloo ye malala mai tani in. 18 Inbe ye kene yo tikamata ei tani yo ikani, in kutana nga, ngan ole titang le mai, inbe tiwete nen, ‘Atoo, ni malala sa yo dawa ben malala mai tani ni lapau?’ 19 Inbe ole tikap gauru ke tana a tikatte lo kutodi, inbe lodi modoko a titang le mai inbe tiwete nen,
‘Atoo! Atoo, lomam pang malala mai tani ni koot sa.
Ngan di tooltool le imot yo ookoo kidi tikooi tiek pono a tipayiri so matana matana ke malala mai tani a tikap pat le ballingadi ye nga,
ngan ye manga modono kasin leu nga, ngan so dook tiap pombe a igarungu malala mai tani le dook tiap oo.
20 Nen le ang di tooltool le imot yo kayepe ye malala ke Maro nga,
ngan lomim ponana ye masngana dook tiap yo pombe pang ye malala mai tani ni.
Inbe ang di tooltool ke Maro le di aposol inbe di Maro koonoo nga,
ngan ole lomim ponana lapau ye yo Maro ikarata betanga ki a be nen ngan iyemenaii ye dada dook tiap ki yo iyei pang, ngan kootoonoo nga.’ ”
21 Ngan alongo betanga tina ngan a imot, motong la bangabangana ke Maro yo gurana ki mai san i, in ikaua pat somai atu yo dawa ben pat ke raunganingi dingding patunu i, inbe ikatte a idu tiek lono a idadup le ilene. Inbe iwete nen,
“Urata dook tiap maiyoko yo pombe ye pat ni,
in la be pombe pang ye malala mai tani yo Babilon i.
Le ole tigarungu le ilene le ke be di tooltool tikamata mulu tiap.
22 Le, Babilon, kulongo!
Di tooltool ke sianga yo tipodo so dawa ben pari,
too timai kaur le tauru koongoo lono kiong nga,
ngan o ke be amlongo kalngadi yong mulu tiap.
Inbe di tooltool ke urata yo lodi galanga ye urata matana matana nga,
ngan o ke be ampuske di yong mulu tiap.
Inbe pat somai ke raunganingi dingding patunu i,
in o ke be amlongo tangini ki yong mulu tiap lapau.
23 Inbe sul nunngana yo ilangaraia ni kiong nga,
ngan o ke be ilolo yong mulu tiap.
Inbe di garup le di tamoto yo be tikere nga,
ngan o ke be amlongo betanga kidi yong mulu tiap.
Di tooltool yo man tiyawar so koongoo lono kiong a tikap pat ye nga,
ngan di tooltool edi maimai le tillos di diedi kapala yo ke tana i nga.
Inbe ong in kuyei gogo bar matana matana a be kullung di tooltool ke tana maimai nga le imot.
24 Inbe ye tana kiong tani in ampuske rara ke di Maro koonoo le ipa ye rara ke di tooltool ke Maro,
inbe di tooltool ke tana i le imot yo kuraumata di nga, ngan lapau.”