JONEME
PEPA PIAMO TEPONGE DOKO
Pii atupa wambao kandapenge
Joneme pepa teponge dake pyapala sosanya isingi akali Gayasanya pyasakamaiya-pyaa. Gayasame Kitisene longo nisiamosa Joneme tama pyoo pepa pyao pyasakamaiya-pyaa. Dee Gayasa embame akali Dayotepisa lenge doko kandao wandyuu katape leaka-pyaa.
Joneme pepa piamo teponge dokonya pii lyaa dupa:
1-4 Pii wambao pepanya piamo dupa
5-8 Gayasa tama piamo doko
9-10 Dayotepisanya mana koo dupa
11-12 Dimitiasa tama piamo doko
13-15 Joneme pii etao lasa leamo dupa
1
1 Namba* Ap 19:29; Lo 16:23; 1 Ko 1:14; 2 Jo 1 sosanya isingi akali dokome nambanya mona setenge Gayasa embanya pepa pyao peekelyo. Nambame emba kini auu kaelyo.
2 Mona setenge, embanya imambu doko auu pyoo kalyamoli pyoo emba yainapi mende nanyoo dupa pitakanya auu pyoo kalyale lao loma silyo. 3 Masoo* 2 Jo 4 miningi kaiminingi mendapuame ipao embame kiningi pii doko lao pii dokome lelyamoli pyoo paeleno leamino doko nambame sepala mona etete yaepeo. 4 Nambanya* 1 Jo 3:19 wane dupame kiningi pii doko watao minilyamino lapae doko nambame sepala nambanya mona yaepenge doko waka mendeme ita minala naenge.
Gayasame kalai auu pyoo pingi
5 Mona setenge, embame masoo miningi kaiminingi dupa nisalanya koteaka lao oapi longo pingi. Kini, kaiminingi mendapua embame nakandengeaka doko, dupa nisingi. 6 Embame* Ta 3:13 endakali auu kayao kalyenona lao sosa dupa lamaiyami. Kaiminingi dupa pena lao nisetenopa Goteme auu kayata. 7 Dupame* Mt 18:5; 1 Ko 9:12,15 netesa endakali dupa-kisa opale mende nyala nayao, Jisasanya lao lao panalanya kalai pyaa peami. 8 Dopana,* Mt 10:10,41; 1 Ti 5:18 kiningi pii lamaingi kalai doko akali dopale dupa-pipa pimana lao naimame dupa nisoo katapenge.
Dayotepisame mana koo miningi
9 Nambame sosa dokonya pepa peyo. Dopaka doko, sosa dokonya mupa joo katapu laka lao masingi akali, Dayotepisa lenge dokome naimanya pii nasingi. 10 Tenge dokonya namba nyakama katatamisa ipato kandao doko, baame pingi dupa lao panato. Baame naima pyanya palyoo pii koo lenge. Dopaka pyoo baame baanya masingi doko etasala nayao, masoo miningi kaiminingi dupa baanya andaka lanyala naenge. Dee mendeme kaiminingi mende baanya andaka lanyalanya pilyamo doko kaitini lyokatala sosanya watao pingiaka.
Dimitiasame mana epe miningi
11 Mona* 1 Jo 3:6,9-10 setenge, embame mana koo watao minala naenya epe watao minape. Mana epe watao miningi endakali doko Gotenya. Mana koo miningi endakali dokome Gote nakandenge. 12 Endakali* Jo 19:35; 21:24; 1 Jo 5:6 dupa pitakame Dimitiasa doko akali epena lengema. Kiningi pii dokome dopaka lenge. Naimame dopaka lelyamano. Naimame pii kiningi lenge doko embame masingi. 13 Nambame* 2 Jo 12 embanya pii longo pepa pyao peyakawani kaelyoaka doko, pepa pyanjolepimi iki pyao peyakala nayatoo lao masilyo. 14 Namba yapa emba katatesa ipupala nalimba enomba kandao pii lapumba laka lao masilyo. 15 Emba mona lyuu lao katape. Embanya kaita miningi dupame emba auu pyoo katape lelyamino. Nambanya kaita miningi dupa auu pyoo katena lelyona embame mendai mendai lao lamaiyakape.