Buku Baibolo dokonya Gotenya wai pii epe doko pyapae singi. Gotenya pii dokonya-kaita endakali dupa pitakanya koo dupa kunao nepakamaiyoo, alu napina lao pyoo nyepala, lete etete katenge doko maingi. Tenge dokonya minao, Baibolo kapilyingi dupame Gotenya pii doko etete latae singili pyoo, tenge kukipi mende nepala naeyao, nongo napyao, endakali pii tolao lengeli pyoo, kapilyoo setenge. Enga pii tolao lenge dokonya makande mende: 'kingi ita mange mendai wakyoo-kisa dee mange mendai' lenge doko kaeyapala, Baibolo kapilyetae dakenya '99' lao pyatae silyamo.

Niu Tesamene Giriki piimi piamino doko ee kana 2 tausene joo patelyamo. Olo Tesamene Ibru piipi, Aramaiki piipimi piamino doko ee kana 2 tausene yalao, omosale patelyamo. Baibolo piamino gii dokopa, akali dosa paleamino dupanya mana makandepi miningi dupa watao Baibolo piami. Naima Engamanya mana makandepi dupa wakale. Tenge dokonyana, naimame Buku Baibolo dokonya tenge dupa yapa kandao nanyingi. Dopaka doko, Gotenya pii dokome akali dokaita wamba lamaiyamo, dopaka pyoo indupa naima Enga dupa langina lao, Buku Baibolo dake kapilyetae silyamo.

King James Version, English Standard Version, New International Version, Baibolo dutupa wambatae pii latae kateali pyoo, pii lenge dii minao, kapilyetae kalyamo. Dopa pipumupa, endakali Ingilisa pii mana nyoo lenge dokaitame salanya nongo pilyamino. Contemporary English Version, Good News Translation, Baibolo dolaponya pii tenge angi doko nyepala, Ingilisa piimi kapilyoo seteami. Dopa piamino dokonya, Baibolo dolapo Ingilisa pii singili pyoo, tolao epelyamosa, salanya auu kaengema. Mendai dopaka pyoo, Baibolo wambatae piamino dokonya tenge angi doko nyepala, Enga Baibolo dake kapilyetae silyamo.

Enga Baibolo epapu kapilyetae dakenya Ingilisa piimi pyatae kalyamoli pyoo, vesa dii minao, watala naenya, pii tenge angi doko iki Enga pii lengeli pyoo, nyoo setelyamano. Make 9:49 doko makande dapa pyoo pilyamano. Vesa doko Ingilisa piimi dapa pyoo pyatae silyamo:

Pii tolao nyoo palyalanya, kalai dopale doko mee napingi. Naima Enga Baibolo kapilyilyamano dupa pii kapilyingi dokonya mana nyepala, buku waka longo dupa itaki pingi. Baibolonya mana nyepae akali dupame tenge angi dupa langyoo tolasilyaminopa, Enga pii auu pyoo sepengeli pyoo, pilyamano.

Pii akalipi, pastapi, pitisapi, dupame nyakamanya siosa dupanya Baibolo dake minao, itaki pyao, endakali dupa lamaiyepape. Ingilisa Baibolopi, Tok Pisin Baibolopi, dolaponya pii tenge doko nyalanya nongo pyatami dupa, Enga piinya nongo napyao tolao, Gotenya pii doko ipatamo setami. Yuu gii dii lao, Baibolo dake itaki pingi dupame itaki pyalapape. Itaki napingi dupame Sola-Baibolo dokonya latae palelyamo dupa salapape. Akali Andakeme nyakama nisilyamo dokonya, baa kandao mambo pyao, loma soo, pii sakamaiyoo, kalai pyakamaiyoo kalyepape.

Baibolo dake Enga pii lao, tolao kapilyetae silyamo dokonya setami dupame nongo napina, Goteme kondo leamo doko auu pyoo sepala, nyakamame endakali yango dupa auu kaeyao, kondo kaeyapala, mende nisa-nisa pyoo kalyepape. Goteme nyakama pitaka nisalapomo. Kiniaka.