1 Jisasame yuu manda doko yakinatala, lanao epeamopa, endakali kambu longome baa watao epeami. 2 Dokopa akali kopetali mendeme, Jisasa kateamo dosa ipao, luma lakapala baa lamaiyoo, “Kamongo, embame nambanya yaina dake mee jakalapo lao maseteno doko, mee jakalapenona” lea. 3 Dopa leamopa, Jisasame akali doko kingimi watandatala baa lamaiyoo, “Nambame embanya yaina doko mee jipyali lao masilyona, epapu embanya yaina doko mee jekelyona” lea. Dopa leamopa yaina doko mee julu pia. 4 Dokopa Jisasame baa lamaiyoo, “Nambame embanya pyakalo doko, mende lamaiya naenya, pitisa dokome emba kandena puu. Pupala Mosesame wamba mana seteamoli pyoo, dopale mende Gote kundi maitinopa, endakali dupame embanya yaina doko, mee jipya-lamo lao kandenana” lea.

5-6 Jisasa Kapename pao pyakameamopa, yanda singi isingi akali mende ipupala, “Akali andake, nambanya kalai akali mende yainame tanda andake nao, andaka takyepae silyamona nisetepe?” lea. 7 Dopa leamopa, Jisasame baa lamaiyoo, “Nambame baa saka nyala ipatoana” lea. 8 Dopa leamopa, yanda singi isingi akali dokome, baanya pii yanu pyakamaiyoo, “Akali andake, emba nambanya andaka ipupenge, namba akali epe daana, embame piimi iki latenopa, nambanya kalai akali doko saka paapomo. 9 Nambanya isingi akali dokonya pundi-pundi namba katenge. Dee yanda singi mendapu, nambanya pundi-pundi katengemaka. Dupanya mende pena lelyopa, baa penge. Mende epena lelyopa, baa epenge. Dee nambanya kalai akali dokome, mende pina lelyopa, baame lelyoli pingina” lea. 10 Pii leamo doko walu lao sepala, Jisasame endakali baa watao epeamino dupa lamaiyoo, “Nambame nyakama kiningi langilyo: Akali dakeme namba tungi pilyamoli pyoo, Israele tange mendeme, namba tungi pyaminopa nakandapu. 11 Endakali longo niki pyakaengesa tangepi, niki pambengesa tangepi, dupa ipao Gotenya isingi mate dokonya, Abrakame, Aisake, Jekope-pipa apata nee andake nao pititami. 12 Dopaka doko, Gotenya isingi mate dokonya katatamina latae endakali dupanya mendatupa, iminjetae panda koo dokonya watao pyandata. Dopa pitamopa, dokonya katao ee lao, yamataka lao, nenge gilyoo katatamina” lea. 13 Dopa latala baame yanda singi isingi akali doko lamaiyoo, “Embame namba tungi pyatala, tee leeno dokonya, embanya kalai akali doko saka pelyamona, andaka puu” lea. Dopa leamo gii dokopaka, isingi akali dokonya kalai akali doko saka pea.

14 Jisasa Pitanya andaka peamopa, Pitanya enda imange doko yonge itaita piamopa, yaina siamo kandea. 15 Kandatala baame enda dokonya kinginya watandeamopa, yonge itaita piamo doko mee jia. Mee jeteamopa, enda dokome sakatatala, Jisasa nee nyoo nena maiya.

16 Niki landa piamopa, endakali mendapuame imambu koo paleta endakali longo dupa, Jisasa kateasa laminao epeami. Dokopa Jisasame endakali dupa-kisa, imambu koo paleamo dupa, piimi watao pyata, endakali yaina pyapae dupa, pitaka mee jakamaita pia. 17 Baame dopa piamo dokome, wamba propeta Aisaiyame lao pituu, “Baame naimanya yongenyapi, imambunyapi, yaina dupa mee jakatana” leamo doko angi jia.

18 Endakali kambu mendeme, Jisasa baa katao kakopeamino kandatala, baanya disaipolo dupa lamaiyoo, “Naima Galilea pete omotena mua” lea. 19 Dokopa Mosesanya loo mana nyepae akali mendeme, Jisasa kateasa ipupala lamaiyoo, “Mana Lenge Akali, emba paeyateli pyoo, namba watao ipatoana” lea. 20 Dopa leamopa, Jisasame baa lamaiyoo, “Yana kapu dupanya palenge yuli tombapae dupa singi. Dee yaka dupanya anda katengeaka doko, Akalinya Ikiningi dokonya palenge anda mende nakatengena” lea. 21 Dokopa dee akali waka Jisasa watao paeyamino, dupanya mendeme baa lamaiyoo, “Kamongo, nambanya takange doko malu petala, emba watao ipatoo paowape?” lea. 22 Dopa leamopa, Jisasame baa lamaiyoo, “Endakali kumapae joo kalyamino dupame, kumapae yango dupa malu pina, emba namba watao ipu” lea.

23 Dopa latala Jisasa baa sipi mendenya pyakalyiamopa, disaipolo dupa sipi dokonya apata pyakalyiami. 24 Pyakalyetala peaminopa, Jisasa luu palea. Paleamopaka, poo yale mende leamo dokome, endaki buli pyao tandyoo, sipi dokonya kolandea. 25 Dopa piamopa, disaipolo dupame baa pyale tatala, “Kamongo, naima mangalanya pilyamanona, embame naima nisepoko” leami. 26 Dopa leaminopa, Jisasame dokaita lamaiyoo, “Aipuma nyakama paka kaelyamipi? Nyakama Gote kuki tungi pingima-lamona” lea. Dokopa baame sakatatala, poo leapi, endaki buli piapi, dupa pyalanya leamopa, kuki emapi mende napia. 27 Dopa piamopa, disaipolo dupame paka kaeyapala lao pituu, “Endakipa poopa dolapome, baanya pii lapyali pilyambino doko, akali dake api laa kanjemape?” leami.

28 Jisasa Galilea pete omotena, Gadara tangemanya yuu dokaita pao pyakameamopa, akali imambu koo longo palenge lapoma, endakali malu katenge dupanya paliu ipao, Jisasa kandanyiambi. Akali dolapo kapu joo kalyambinosa, endakali mende kaitini dokonya-kaita napaengema. 29 Dokopa akali dolapome puu lao, “Gote Ikiningi, embame naima aipa piti? Embame tanda andake dipenge gii seteamo doko, ipatala naeyapumupa, embame naima tanda andake wambao dyaanya epelepe?” leambi. 30 Kuki omosale mena elyambu mendapu nao kateami. 31 Dokopa imambu koo dupame Jisasa tee lao, “Naima pupale lao pyao watateno doko, mena dokaita-kisa landa pyalapa lapoko” leami. 32 Dopa leaminopa, Jisasame dupa kandao, “Pupa” lea. Dopa leamopa, imambu koo dupame akali dolapo soo yakinatala, mena dupa-kisa pao landa piami. Landa pyateaminopa, mena elyambu doko pitaka, papatale mendenya-kaita alo pyao pao, endaki pete mendenya mangatala kumiami. 33 Dokopa mena setao katenge akali dupame, taono dokonya alo pyao pupala, akali imambu koo palenge dolapo-kisa, piamo dupa pitaka lamaiyami. 34 Dopa leaminopa, taono dokonya palenge endakali dupa pitakame, Jisasa kutao pupala kandanyiami. Kandanyetala dokaitame kyeto joo, “Embame naimanya yuu dake yakinatala puu” leami.