1 Gii dokopaka Jisasame anda doko yakinatala pao, Galilea pete lembasa petea. 2 Peteamo dokonya endakali etete longo mendapu ipao, kambu piaminosa, baa sipi mendenya pyakalyetala petea. Dokopa endakali kambu doko pitaka, endaki pete lemba dokonya kateami. 3 Kateaminopa, Jisasame kongali lao endakali dupa, mana lamaiyoo dapa lea: “Akali mendeme ee wai lyandala pea-pyaa. 4 Lyandeamopa, ee wai yangi kaitininya pea. Peamo dupa pitaka yaka dupame nyoo neami. 5 Yangi kana-kisa yuu kuki singi dupanya peamo dupa, pupae langa lea. 6 Langa leamoaka doko, pingi auu pyoo napiamosa, niki teamo dokome kumasia. 7 Yangi yuu ikililyambu nenge-nenge katapae tenge palenge, dupanya pea. Peamo dupa langa leamoaka doko, ikililyambu tambe-tambe andapala, kui pyambea. 8 Ee wai yangi lyandeamo dupa, yuu epenya pupala, andao dii mandea. Yangimi 100 mandea, yangimi 60 mandea, yangimi 30 lao dii mandea. 9 Nyakama kalekaita singi dupame, pii doko auu pyoo salapapena” lea.

10 Maitakao disaipolo dupame Jisasa kateasa ipupala, baa tipa pyoo, “Embame endakali dupa kongaliaka lao pii lamaiyoo kalyeno doko, aipuma pilipi?” leami. 11 Baame nyakamanya pii yanu pyakamaiyoo, “Gotenya isingi mate dokonya, pii tenge yalo petae palelyamo doko, nambame nyakama panao langitoo. Dopaka doko, endakali waka dupa panao lamaiya naeyato. 12 Endakali mende-kisa Gotenya pii setamo doko, baa konda pyoo maita. Dopaka doko, Gotenya pii nasingi mende-kisa kuki setamopa, sekelyamo lao masetamo doko, dutupa tange nyokonyeta. 13 Endakali dupame lengeme kandelyaminoaka doko, tenge angi doko nakandelyamino. Kaleme silyaminoaka doko, tenge angi doko nyala naelyamino. Tenge dokonya, nambame endakali dupa kongali pii lao lamaingi.* Jisasanya pii leamo doko mona katao nasingima endakali dupa eteteaka nasina latala, baame kongali pii lao lea. Baanya pii mona katao singima endakali dupame tenge doko auu pyoo tolao nyina lao, kongaliaka lea. 14 Goteme propeta Aisaiya-kisa pii dapa lea: 'Nyakamame pii kaleme setamiaka doko, tenge angi doko soo nanyetami. Nyakamame lengeme kandatamiaka doko, tenge angi doko kandao nanyetami. 15 Endakali dakaitanya mona pyakilyia dokome, kale poeyamosa pii nasoo, lenge iminjiamosa kanja naeyao pilyamino. Dee kaleme sepala, lengeme kandatala, mona tii pitamopa, mona aloo petala, namba tungi pyamili doko, nambame pyoo nyipuli. 16 Dopaka doko, nyakama nambanya pii singi dupa, Goteme auu pisimupa, nyakamame lengeme angi kandao, kaleme angi pii soaka pilyamino. 17 Nyakamame kandelyamino dupa propeta longopi, endakali tolatae longopi, dupame kandatamana lao, nea kaeyao malisiaminoaka doko, angi nakandeami. Dee dupame setamana lao, nea kaeyao malisiaminoaka doko, angi nasiamina lao, nambame nyakama kiningi langilyona” lea.

18 Jisasame dee mende lao pituu, “Akali mendeme ee wai lyandea dokonya, tenge doko dakena salapape. 19 Ee wai yangi kaitinisa peamo dopaleaka joo, endakalimi Gotenya isingi mate dokonya, pii doko sepala, tenge doko nanyilyaminopa, Sataneme ipupala, monanya nasina lao, pii doko nyoo nepenge. 20 Ee wai yangi kana-kisa pao, langa leamo dopaleaka joo, endakali yangimi wai pii epe doko sepala, auu kaeyao yapa nyingima. 21 Ee wai kana-kisa pingi napiamosa, kumiamo dopaleaka joo, endakali dupame, wai pii epe doko auu pyoo nyepelyaminopa, pii doko nyakama-kisa silyamo dokonya, pundu kendapi longo epelyamopa, wai pii epe doko pupae yakinengema. 22 Ee wai yangi yuu ikililyambu tenge palenge dupanya peamo dopaleaka joo, endakali yangi dupame wai pii epe doko singima. Singimaka doko, yuunya munipi, pinju longo nyoo setao katapu laka lao, putiti kaengepi, nea kaengepi, mana dupame, wai pii epe doko kui pilyamosa, dii namandengema. 23 Ee wai yangi lyandeamo dupa, yuu epenya peamo dopaleaka joo, wai pii epe dokonya tenge angi doko soo nyepala, endakali yangimi dii 100 mandenge, yangimi 60 mandenge, yangimi 30 lao dii mandengena” lea.

24 Jisasame dee kongali pii mende dokaita lamaiyoo, “Gotenya isingi mate doko, akali mendeme baanya eenya wita wai epe lyandeamo dopale. 25 Kuka gii mendepa, endakali dupa pitaka palipiaminopa, akali dokonya yandapipi mendeme ipupala, wita wai lyandatae kaina dupanya, wita jepae koo tanu mende lyandatala pea. 26 Maitakao wita dupa langa latala, andao dii manjanya piamopa, koo tanu dupa apata kateamo kandeami. 27 Dokopa akali ee tange dokonya, kalai akali dupame baa peteasa ipupala, tipa pyoo, 'Akali andake, embame embanya ee dokonya wita wai epe lyandeno doko, koo tanu kalyamo dupa anja-tae kalyape?' leami. 28 Dopa leaminopa, baame dokaita lamaiyoo, 'Doko akali yandapipi mendeme lyandao piana' lea. Dopa leamopa, kalai akali dupame baa lamaiyoo, 'Naimame dupa yukuo nepala pumili lao masilipi?' leami. 29-30 Dopa leaminopa, baame dokaita lamaiyoo, 'Daana, koo tanu dupa yukuatiti, wita dupa apata yukutamina, lapota pyasoo andena kaeyalapa. Wambu pitamo gii dokopa, nambame nee mandyuu mau pingi akali dupa lamaiyoo, “Wambao nyakamame koo tanu dupa, itatenya soo yangapengena, yukuo yaki pyepape. Dopa petala wita dupa elyambu petala, nambanya nee setenge anda dokonya, setalapape” latona' leana,” Jisasame lea.

31 Jisasame dee kongali pii mende dokaita lamaiyoo, “Gotenya isingi mate doko, akali mendeme ee wai mastet lenge mende, baanya eenya lyandeamo dopale. 32 Ee wai dupa pitakanya mastet wai doko, etete yakaneaka doko, lyandataesa langa latala andao, ee wai pokatae waka dupa pitaka ita miningi. Andao yale jilyamopa, wangya dupanya yaka dupame ipao anda pingimana” lea.

33 Jisasame dee kongali pii mende dokaita lamaiyoo, “Gotenya isingi mate doko, yisa mendalapo enda mendeme nyoo, palao longo-pipa pyasoo endaki minilyamopa, yisa dokome palao doko pitakanya taeyapala, andasingi dopalena” lea.

34 Jisasame endakali kambu andake doko, pii lamaiyamo dutupa pitakanya, mende mee lamaiya naeyao, kongaliaka lao lamaiya. 35 Baame kongaliaka lao lamaiyamo dokome, wamba Goteme propeta mende-kisa, “Yuupi kaitipi tee piamo dokonya pituu, indupa tuu lao, yalo petae dupa nambame kongaliaka lao, endakali dupa lamaituna” leamo doko angi jia.

36 Dokopa, Jisasame endakali kambu andake doko yakinatala, baa andaka kolandateamopa, disaipolo dupa ipupala baa lamaiyoo, “Koo tanupa makande pyoo, kongali laleno dokonya tenge dupa naima langi” leami. 37 Jisasame yanu pyao, “Ee wai epe lyandeamo doko, Akalinya Ikiningi doko kandao lea. 38 Ee doko isa yuu dake kandao lea. Ee wai epe lyandeamo dupa, Gotenya isingi matenya katenge endakali dupa kandao lea. Dee koo tanu dupa, Satanenya endakali katenge dupa kandao lea. 39 Koo tanu lyandeamo yandapipi doko, Satane kandao lea. Wambu piamo gii doko, tanga gii etatamo doko kandao lea. Nee mandyuu mau pingima akali dupa, enjele dupa kandao lea. 40 Koo tanu dupa yukuo elyambu petala, itatenya soo yangeamino doko, gii etatamo dokopa, endakali koo dupa ele panda koo dokonya, soo yangata doko kandao lea. 41 Akalinya Ikiningi dokome baanya enjele dupa pena latamopa, dupame pupala koo pina lao mapisingipi, tanga lao koo pingi endakalipi, dupa baanya isingi mate dokonya nakatena lao yukuo nepatami. 42 Yukuo nepatamino dupa, itate andake dokonya soo pyandataminopa, dokonya katao endakali koo pingi dupa, ee lao nenge gilyoo yamataka latami. 43 Dokopa endakali tolatae dupa, nyakamanya Takangenya isingi mate dokonya, tii pyoo niki joo tao katatami. Nyakama kalekaita singi dupame, pii doko auu pyoo salapapena,” Jisasame lea.

44 Jisasame dee mende lao pituu, “Gotenya isingi mate doko, bokosa muni ee mendenya yalo petae kateamo dopale. Yalo petae kateamo doko akali mendeme kandasetala, dee sanga pyambea. Dopa petala baa auu kaeyao andaka pupala, baanya oapi singi dupa pitakame muni nyepala, ee doko pao sambeana” lea.

45 Jisasame dee mende lao pituu, “Gotenya isingi mate doko, akali bisnis pingi mendeme, mamaku epe mendapu sambalanya kutao paenge dopale. 46 Akali dokome mamaku eteteaka epe, muni andake pupenge mende kutao kandatala, andaka pupala, baanya oapi singi dupa pitakame muni nyepala, mamaku epe doko sambao nyingina” lea.

47 Jisasame dee mende lao pituu, “Gotenya isingi mate doko, akali dupame umbene nuu mende, endaki petenya pyandatala, pisa tata longo dupa nyingi dopale. 48 Pisa umbene nuunya tumbatelyamopa, pisa nyingi akali dupame pyalya lao lembasa nyepala, isa pituu yapengema. Yapapala epe dupa nyoo mandipala, koo dupa nepengema. 49 Dopaka pyoo, gii etatamo dokopa, enjele dupa ipupala, endakali koo pingipi, mana tolatae miningipi, dupa yapao mokosetami. 50 Endakali koo dupa, itate andake dokonya watao pyandataminopa, dokonya katao ee lao nenge gilyoo, yamataka latamina” lea.

51 Jisasame disaipolo dupa tipa pyoo, “Nyakamame pii datupanya tenge dupa nyilyamipi?” lea. Dopa leamopa, dokaitame yanu pyao, “Naimame tenge dupa nyepelyamanona” leami. 52 Dokopa baame dokaita kandao, “Anda tange mendeme baanya oapi enengepi, wambataepi, epe andaka setenge dupa, kalai pipenge jetamoli pyoo minao kalai pita. Dopaka pyoo, Mosesanya loo mana nyepae akali mendeme, Gotenya isingi mate dokonya mana nyepala, mana enenge dokopi, wambatae dokopi, lapota baame minao kalai pipenge jetamoli pyoo, pitana” lea.

53 Jisasame pii kongali dutupa lamaiyoo etapala, yuu doko yakinatala pea. 54 Baanya yuu tenge dokonya pupala, endakali dupa nyakamanya lotuu anda dokonya mana lamaiyamopa, walu latala, “Akali dakeme masepae epepi, mirakolo kalaipi, dupa pitaka anja-tae nyiape? 55 Akali dake kapenda dokonya ikiningi daape? Baanya endangi doko Maria daape? Baanya kaiminingi dupa Jemesapi, Josepepi, Saimonepi, Judasapi dutupa daape? 56 Baanya pimalenge dupa pitaka, ae naima-pipa apata napilyamape? Baame pilyamo datupa pitaka, anja mana nyiape?” leami. 57 Dopa latala dupame baa kandao, mona koo palyiami. Dopa piaminosa, Jisasame dokaita lamaiyoo, “Propeta mende yuu waka dupanya kalyamo doko, endakali dupame baa andanda semaingima. Dopaka doko, propeta mende baanya yuu tenge dokonya kalyamo doko, baanya palupi, tatapi dupame baanya pii sepala, andanda semaiya naengemana” lea. 58 Dupame baa tungi napiaminosa, baame mirakolo kalai longo yuu dokonya napia.