1 Jisasame kongali pii mende lao pituu, “Gotenya isingi mate doko, akali mendeme yongama wamba sakatatala, baanya waene ee dokonya kalai pyekena lao, kalai akali mendapu lanyala peamo dopale. 2 Pupala ee tange dokome, akali mendatupa yuu gii mendainya, 1 kiname yole pingili pyoo pitoana, waene eenya kalai pyakala pena lea. 3 Pena latala 9 kilokopi mendenya, maketanya pupala kandeamopa, akali mendatupa mee kateami. 4 Kateamino kandatala baame dupa lamaiyoo, 'Nambame nyakama yole pipengeli pyoo pitoana, nyakama apata nambanya waene ee dokonya kalai pyakala pupa' lea. 5 Dopa lateamopa, akali dupa kalai pyakamaiya peami. Dutupa pateaminopa, 12 kilokopi, 3 kilokopinya baame deaka maketanya pupala, kalai akali mendatupa lanyepala, waene eenya kalai pyakala pena lea. 6 Deaka 5 kilokopi mendenya pupala, baame akali mendatupa mee kateamino kandatala dupa lamaiyoo, 'Aipuma nyakama indupa gii dake, pitaka mee dakenya katalamipi?' lea. 7 Dopa leamopa, dupame yanu pyao, 'Akali mendeme naima kalai nandipyasa, naima mee katalamanona' leami. Dokopa baame dokaita lamaiyoo, 'Nyakama apata nambanya waene ee dokonya, kalai pyakala pupa' lea. 8 Yuu kuiyalanya piamopa, akali ee tange dokome, ee isingi akali doko lamaiyoo, 'Embame kalai akali dupa epena latala, yole pipi. Yole pyoo pituu, kalai akali 5 kilokonya ipamino dupa, wambao yole pima-pima pyoo, yongama wamba ipamino dutupanya tuu lapena' lea. 9 Dokopa kalai akali 5 kilokonya, kalai tee piamino dupa ipupala, 1 kina lao nyiami. 10 Dopa pyoo nyiaminosa, kalai akali yongama wamba kalai tee piamino, dupame nyakama muni mendalapo, apata wakao nyalamano lao masiaminoaka doko, nyakama apata 1 kina laowaka nyiami. 11 Dopa pyoo nyepala, akali ee tange doko imbu kaeyapala, mumu leami. 12 Dopa latala akali ee tange doko lamaiyoo, 'Kalai akali 5 kilokonya ipamino datupame, awa mendai iki kalai pimino. Naima indupa gii dake pitaka, niki yale mende tapumupa, leke-leke tao kalai pyemano doko, embame dupa naima-pipa kapa-kapa lao, yole pilino doko, auu napilyamona' leami. 13 Dopa leaminopa, akali ee tange dokome kalai akali dupanya mende lamaiyoo, 'Kaimia, nambame emba minakasala naeyalo. Emba 1 kina nyotoana lapinopa, nalimba pii lao yaki pyaa naeyalambape? 14-15 Kalai akali maitapyao ipamino dupa, emba yole pilyo dopaka pyoo, dutupa nambanya auu kaengeme yole pyoo. Nambanya muni dokome, mendita mende pitoo lao masotoli pyoo napitupi? Nambame kalai akali maitapyao ipamino dupa, nambanya kondo kaengeme, 1 kina laowaka maiyo dokonya, embame dokaita-pipa tilya nyala naenya, embanya yole doko nyoo puu' lea-pyaa. 16 Dopana, epapu endakali mendapu wambao kalyamino dupa, tanga maita pyatami. Maitapyao kalyamino dupa, tanga wambatamina” Jisasame lea.

17 Jisasa Jerusalema pao pituu, baanya 12 disaipolo dutupa iki laminao, umbisale pupala lamaiyoo, 18 “Salapape! Naima indupa Jerusalema pelyamano. Dokonya akali mendeme, Akalinya Ikiningi doko enge nyepala, pitisa mupapi, Mosesanya loo mana nyepae akalipi, dupa laitaka pitamopa, dupame baa kote latala pyao kumasina latami. 19 Dopa latala dupame baa akali kamalya katenge dupanya, kingilyaka maitaminopa, dokaitame baa kandao lamba latala, konjame pyapala, poko itanya pyao yukutami. Dopa petataminopa, yuu gii tepo dokonya, Goteme dee sakatasetana” lea.

20 Jemesa, Jonepanya endangi dokome, Jisasa-kisa dopale mende tee latoo lao masetala, nyakamba-pipa apata ipao, Jisasanya enombanya baa luma lakea. 21 Dokopa Jisasame baa tipa pyoo, “Nambame embanya aipa pyakaowape?” lea. Dopa leamopa, enda dokome baa lamaiyoo, “Embanya isingi mate dokonya, kiŋi joo pititinopa, nambanya wane dalaponya mende, embanya kingi tolae-kaita petena lakape, mende embanya kingi koeya-kaita petena lakape” lea. 22 Dopa leamopa, Jisasame baa lamaiyoo, “Embame masala naeyao lelenona” lea. Dopa latala, wane dolapo lamaiyoo, “Nambame kenda pipae salapo-lamo doko, nyakambame kapa pao setambipi?” lea. Dokopa dolapome yanu pyao, “Nalimbame kenda pipae dupa, kapa pao setambakana” leambi. 23 Dopa leambinopa, Jisasame dolapo lamaiyoo, “Kini nyakambame kende pipae dupa setambiaka. Dopaka doko, nambanya kingi tolae-kaita petena lapengepi, koeya-kaita petena lapengepi, doko nambanya kalai daa. Nambanya Takangeme pititamina lao, yapao nyiamo endakali dupa pititamina” lea. 24 Pii doko sepala, 10-pela disaipolo dutupame Jemesa Jonepa imbu kaeyami. 25 Dopa piaminopa, Jisasame dokaita pitaka epena latala lamaiyoo, “Akali kantri waka isingi, Gote tungi napingi dupame, nyakamanya endakali isingi dupa kandanya palyetala, nyakama alyasale joo katengema, doko nyakamame kandengema. Kantri dupanya akali andake dupame, nyakamanya pii watao minekena lao kandatae paengema, mana doko nyakamame kandengemaka. 26 Nyakamame dopa napyepape. Nyakamanya mende akali andake joo katapuli lao masetamo dokome, nyakamanya kalai akali joo katapenge. 27 Dee nyakamanya mende alyasale joo katapuli lao masetamo dokome, nyakamanya kendemane joo katapenge. 28 Dopaka pyoo, Akalinya Ikiningi dokome baanya kalai pyekena lao naepea. Baame endakali longo dupa nisoo, kii tamao nyalanya, baa tangeme kumala epeana” lea.

29 Jisasa baanya disaipolo dupa-pipa, taono Jereko doko yakinatala peaminopa, endakali kambu andake mendeme baa watao peami. 30 Dokopa, akali lenge monda lapoma kaitinisa peteambi. Akali dolapome Jisasa epelyamo leamino sepala, wii lao, “Dapiti Yumbange! Kamongo! Embame nalimba kondo kaeyapoko” leambi. 31 Dopa leambinopa, endakali dupame pii kaena lao pyalanya leami. Dopa leaminoaka doko, akali dolapome dee puu lao wii lao, “Dapiti Yumbange! Kamongo! Embame nalimba kondo kaeyapoko” leambi. 32 Dopa leambinopa, Jisasa baa katapala, akali dolapo epena latala lamaiyoo pituu, “Nambame nyakambanya aipa pyakapili lao masilyambipi?” lea. 33 Dopa leamopa, akali dolapome baa lamaiyoo, “Kamongo, nalimba dee lenge tao kandambana, embame nalimba nisepoko” leambi. 34 Dopa leambinopa, Jisasame dolapo kondo kaeyapala, baanya kingimi dolaponya lengenya watandalu piamopa, nyakamba lapota lenge talu piambi. Dopa petakamaiyamopa, nyakamba baa watao peambi.