1 Jisasame lotuu anda andake, kame doko yakinatala peamopa, disaipolo dupame ipupala baa lamaiyoo, “Lotuu anda andake dakenya makisa, anda auu petae kalyamo datupa kanda” leami. 2 Dopa leaminopa, baame dokaita lamaiyoo, “Anda kana soo namba-namba pyoo petae kalyamo, kandelyamino datupa, tanga dopaka petae nakatata. Pitaka pyao kaluo nepatamina” lea.

3 Jisasa Olipimanda peteamopa, disaipolo dupa elyakalao ipupala baa tipa pyoo, “Embame laleno dutupa, gii andukupa dopa pitape? Gii etatamo dokopi, emba ipateno gii dokopi, dolaponya kongali aipale mende pitamopa kandatamape? Naima langi” leami. 4 Dopa leaminopa, Jisasame yanu pyao, “Endakali mendeme nyakama minao kyakasetana, kandao kalyepape. 5 Endakali longome nambanya kengenya ipupala, 'Namba Kraisa dokona' lao, endakali longo minao kyakasetami. 6 Yanda pilyamino lapaepi, yanda ingingi lapaepi, dupa sepala, nyakama walu nalalapape. Kenda pipae andake dopale dupa pitaka ipatamoaka doko, yuu etapenge gii doko maitapyao ipata. 7 Kantri mendeme kantri mende yanda pimaita, kiŋi mendeme kiŋi mende yanda pimaita pitami. Dee yuu wakale-wakale dupanya, titiwali dupa minata, lopo andake dupa sepa pita. 8 Dopa pitamo doko, enda wane manjanya maita pingi dopale joo pita.

9 “Gii dokopa nyakama namba tata joo katataminosa, akali tata dupa pitakame, nyakama etete imbu kaengitami. Dopa petala, nyakama anjetala, pyao tanda ditala kumasetami. 10 Dokopa endakali longome, namba tungi pingima doko yakinatala, nyakamalapo imbu kaeyao pyaloo petala, mende enge nyaa-nyaa pitami. 11 Dee sambo propeta longo mendapuame ipupala, endakali longo dupa minao kyakasetami. 12 Luiyao koo pingi mana doko andatamopa, endakali longo dupame, endakali yango auu kaenge mana doko yakinatami. 13 Dopa pitaminopapi, endakali mende kyeto joo katao etatamo doko, baa Goteme pyoo nyeta. 14 Gotenya isingi mate dokonya lao, wai pii epe doko endakali dupa pitaka, sina lao lamaitami. Endakali dupa pitaka pii lamaiyoo kapa petataminopa, yuu etapenge gii doko ipatana” lea.

15-16 Jisasame dee mende lao pituu, “'Gii mendepa akali mendeme myuku pipae mende, lotuu anda andake andakote nyoo setatamopa kandatala, endakali dupame lotuu anda andake doko yakinatami. Dokonya lao wamba propeta Danieleme leamo doko, angi jetamo kandatala, endakali Judia katatamino dupa, paka yuu manda dupanya pupenge jetana” lea. (Pii dake itaki pyateno dokome, tenge doko kutao nyepe.) 17 Gii dokopa endakali mende, baanya anda patakisa katatamo dokome, baanya oapi andakote setamo dupa nyalanya, andakote pupenge nanjeta. 18 Dee endakali mende eesa katatamo dokome, baanya yonge pee ketae pingi doko nyalanya, pilyala naeyapengeaka jeta. 19 Enda wane tongatapi, enda wane andu nengepi, dupa gii dokopa etete kondo pita. 20 Koo kana palitamopapi, Sambata gii palitamopapi, paka napataminopana, nyakama loma soo kalyepape. 21 Goteme yuu kaitipi wasiamo dokonya pituu, indupa tuu lao, kenda pipae epelyamo dupa pitaka, kenda pipae ene ipatamo dokome ita minata. Dee kenda pipae dopale mende tanga tangapi naipata. 22 Goteme yuu gii dupa muu pisala naeyatamo doko, endakali mendaipi mende nakatata. Dopaka doko, baanya endakali yapao nyepae dupa lao masetala, kenda pipaepi, yuu giipi, dupa minao muu piseta. 23-24 Gii dokopa Gotenya yapao nyepae endakali dupa lanyoo, lemba pyalanya, sambo Kraisa mane-mane pipaepi, sambo propetapi, dupame ipupala, kongalipi, mirakolo kalaipi, dupa pitami. Dopana, endakali mendeme nyakama langyoo, 'Kraisa doko asa kalyamo kanjepa, amasa kalyamo kanjepa' lea kandeno doko, kiningi lelyamona lao masala naeyalapape. 25 Nambame enesa tanga pitamo dupa langilyona, nyakama kandao kalyepape. 26-27 Paa mendai, yuu-wapaka pilyamopa, tii pipae doko niki pyakaengesa pituu, niki pambengesa tuu lenge. Dopa pilyamopa, endakali dupa pitakame kandengema. Dopaka pyoo, Akalinya Ikiningi doko ipatamopa, endakali pitakame kandatami. Dopana, endakali mendeme nyakama langyoo, 'Kraisa doko endakali napalenge yuu dokonya kalyamona, kanja pupa' lea kandeno doko, kanja napupape. Dee endakali mendeme, 'Kraisa doko anda dakenya andakote pilyamona' lea kandeno doko, kiningi lelyamona lao masala naeyalapape. 28 Yaka lakepame buu minilyamopa, konaiyapi mende kumapae salame-lamo lao kandengema. Dopaka pyoo, kenda pipae dopale dupa ipatamopa, Akalinya Ikiningi doko ipanya tengesa pilyamona lao, kandatamina” lea.* Dopaka pyoo, kenda pipae dopale dupa ipatamopa, Akalinya Ikiningi doko ipanya tengesa pilyamona lao kandatami. Pii datupa buku Baibolo Giriki piimi pyatae dokonya nakalyamoaka doko, tenge doko yalo petae palelyamo.

29 Jisasame dee mende lao pituu, “Kenda pipae andake dupa etalu dokonya, kaitinya singi dupa pitaka ema-ema pita. Dopa pitamopa, niki doko iminjoo, kana doko tii napyoo, kaitinya bui dupa kondao isa ipao pita. 30 Dokopa Akalinya Ikiningi doko ipanya, kongali mende kaitinya pitamopa, yuunya akali tata dupa pitakame kandatala, yako lao ee latami. Dokopa Akalinya Ikiningi doko baanya pupu lapaepi, tii pipaepi, dupanya pituu kopa tambe-tambe ipata. 31 Dokopa beto mende puu lao latamopa, yuu lemba dupa pitakanya pituu, enjele dupame endakali yapao nyepae dupa pitaka, lanyoo kambu pina latana” lea.

32 Jisasame dee mende lao pituu, “Nyakamame piki ita dokonya mana mende nyalapape. Nyakamame piki ita mange popo pyoo, alulyamo doko kandatala, paina pyaanya pilyamona lengema. 33 Dokaita joo, pitamo dutupa pitaka nyakamame kandatala, Akalinya Ikiningi doko ipanya tengesa petelyamona lao masalapape. 34 Nambame nyakama kiningi langilyo: Endakali indupa palelyamino dupa, kumao etala naeyataminopa, lelyo dupa pitaka pita. 35 Yuupi kaitipi dupa pitaka, alu pitaka doko, nambanya pii doko tanga tangapi alu napitana” lea.

36 Jisasame dee mende lao pituu, “Endakali mendeme Akalinya Ikiningi ipupenge gii doko masala naengema. Kaitinya enjele dupame masala naengemaka. Ikiningi dokome apata masala naengeaka. Takange dokome iki masingi. 37 Wamba Noa kateamo gii dokopa, endakali dupame mana minao kateaminoliaka pyoo katataminopa, Akalinya Ikiningi doko dee ipata. 38 Endakimi napiamopa, endakali dupame nee endakipi dupa nao, akali dupame enda lanyoo, wanaku dupa akali nyala pena lao maiyoo kateami. Dopa pyoaka kateaminopa, Noa sipi andaka kolandeamo, gii doko epea. 39 Dupame aipa pitape lao masala naeyao nao kateaminopa, endaki andake dokome ipupala, dokaita pitaka pyambea. Dopa piana, tanga endakali dupa dopaka pyoo katataminopa, Akalinya Ikiningi doko tanda lao ipata. 40 Ipatamo gii dokopa, akali lapoma eenya katatambinopa, dolaponya mende yakinatala, mende enjele dupame lanyoo patami. 41 Dee enda lapomame palao wasalanya, wita dii takyoo indyuu pititambinopa, dolaponya mende enjele dupame yakinatala, mende lanyoo patami. 42 Dopa pitamina, nyakamanya Kamongo doko andukupa ipatape lao, masala naelyaminona, kandao isoo kalyepape. 43 Pii dake salapape: Anda tange mendeme pake nenge akali mende, andukupa ipatape lao masala naenge dokonya, baanya anda doko kalukatamina latala, kandao isoo katenge. 44 Dopaka pyoo, Akalinya Ikiningi doko andukupa ipatape lao nyakama masala naelyaminona, kandao isoo kalyepape” lea.

45 Jisasame dee mende lao pituu, “Kalai akali pii watao miningi, masepae singi mendeme, baanya akali andake dokonya pii seta. Baanya akali andake dokome kalai akali waka dupa isina latala, yuu tependa mendakaita patamopa, baame dokaita isoo katao pituu, nee napenge gii dokonya, nee mokosoo maiyoo katata. 46 Katatamopa, akali andake doko pilyetala, kalai akali dokome dopa pyoo katatamo doko kandatala, baa minao auu piseta. 47 Nambame nyakama kiningi langilyo: Akali andake dokome baanya oapi dupa pitaka, kalai akali dokomeaka isakao katena lata. 48 Dopaka doko, kalai akali koo mendeme, baanya akali andake doko tanga waka ipata-lamona lao masetala, 49 baanya kalai akali yango dupa pyapapu, bia nao, kyakao paenge dupa-pipa neepi, biapi nao katatami. 50 Dopa pyoo katao, baanya akali andake doko naipapomo lao masoo katatamo gii mendepa, walu lao ipata. 51 Ipupala akali andake dokome, kalai akali koo doko pyao indyepala, Gote watao miningi mane-mane pipae, dupa-pipa katena lao, ele panda koo dokonya watao pyandata. Dokonya, nyakama ee lao yamataka lao, nenge gilyoo katatamina” Jisasame lea.