1 E'ina hu'negu tamagra vahe'ma azeri havizahu avu'avazane, havige hu'zane, tavrenke hu'zane, kenunu hu avu'avazane, vahe'mofo amefi ke hu'zana netretma, 2 meni kasentea mofavremo aminku avesiankna hutma Anumzamofo kegura avenesita, Anumzamofo agru hu'nea nanekea e'neritma nena hugahaze. Ana nehanageno tamagu vazinoma, tamahoke ahe'nea zampina nena hugahaze. 3 Hanki e'inama hutma Anumzamo'ma so'ema huneramantea zamofo haga'ama erisuta, Ramo'a so'e hune hutma hugahaze.

4 Kraisi'a asimu eri have mni'nemofonte tamagra Agrite neaze. Ana havea vahe'mo'za haviza hu'ne hu'za eri atrenazanagi, Anumzamo'a huhamprintegeno, Agri avurera mrerisa have me'ne. 5 Tamagranena asimu eri havegna hu'nazageno, avamupi mono nona kiaza nehigetma, avamupi ruotge prisi vahe'mofo nonkna nehutma, Anumzamo avesi'nea ofa Jisasimpi avamupina hunentaze. 6 Na'ankure anage huno avontafepina me'ne, Keho Zaioni agonarera mrerisa have huhamprintoankino, nomofo renagentete azeri hanaveti have me'ne. Hanki iza'o Agrite'ma amentinti hanimo'a, agaze osugahie hu'ne. (Ais 28:16)

7 Hanki tamagrama tamentintima haza vahe'motarera, ana havemo'a mrerisa have me'ne. Hianagi iza'zo zamentintima nosaza vahetera, Nogi vahe'mo'za zmavresara higeza atraza havemo'a, nomofo renagentepinka azeri hanaveti have fore nehuno, (Sam-Zga 118:22) 8  zmagigo zamino zmazeri tanafa nehuno, zmazeri traka hu have fore hu'ne. (Ais 8:14) Na'ankure zamagra trakama nehazana, ke'arera amagera nontazanki'za, traka hu'za haviza hugahaze.

9 Hianagi Anumzamo tamagrira huhampriramante'nea naga mni'neta, kinimofo prisi naga mni'neta, ruotge hu'nea naga mni'nazageno, Anumzamo'ma Nagri nagare huno hu'nea naga maninazankita, Anumzamo'ma hanimpintima tamagima huno, ruzahu msazama'arema tamante'nea so'ezama'agura huama hugahaze. 10 Hianagi kora tamagra Anumzamofo vahera omni'nazanagi, menina Anumzamofo vahe mani'naze. Tamagra Anumzamofo asunkuzana e'orinazanagi, menina tamagra Anumzamofo asunkuzana eri'naze.

11 Navesima neramantoa nenafugta, tamagra zoka vahe mopazmi omne vahekna hutma ama mopafina mni'naze. E'ina hu'negu, tamavufamofo havi avesizamo'ma ha'ma reneramantea zampina uofreho hu'na nagra huneramasamue. 12 Hagi maka kna tamagra megi'a vahe'mokizmi amunompima mani'netma, knare tamavutmava nehinke'za, zamagrama huhavizama huramantesu'za, knare tamavutamavaza zamagra nege'za, Anumzamo'ma refkoma hania knarera, ana tamavutamava hu'naza zankura, Agi erisaga hugahaze.

13 Tamagra Ramofonku hutma, maka kamani vahe'mofo kea amage nentetma, kini vahera ugagota hu'nagu, kezmia antahitma amage nentetma, 14 Gavana vahe'mo'zanema hanaza kea amage anteho. Hazenke hanaza vahe zmazeri fatgo nehuno, fatgoza hanaza vahe husga huzmantesagu huzmantege'za mni'naze. 15 Na'ankure e'inahu tamavutmavama hanazana Anumzamofo avesiza avaririta fatgo nehanageno, ke ontahi neginagi zmavuzmavama nehaza vahe'mo'za kea osugahaze. 16 Kina vahera omi'nazanki, fru huta mni'nagu, fru huta mni'none nehutma, ana fru tamavutamava zampina antegafita, kefo avu'avazana osutma, Anumzamofo kazokzo eriza vahe maniho. 17 Maka vaheku husga hunezmantetma, maka zamentintima nehaza tamafuhe'ina zmavesinezmantetma, Anumzamofonku kore hunentetma, kini vahe'mokizmi zmagorga maniho.

18 Eri'za vahe'motma, kegvama huramante'nesaza vahe'mokizmia kore huzmantetma zamagorga nemanitma, fru hu'za knarema huramante'naza kva vahe'mokizmi zamagorgagera omanita, havizama huramantesaza kva vahe'mokiminena zmagorga maniho. 19 Tamagrama Anumzamofontema fatgo tamagu tamagesa antahitma mni'nenageno, havigema huramante'za tamazeri havizama hanazana, Anumzamo asomu huramantegahie. 20 Tamagrama haviza hu'nenage'za, havizamofo nona hu'za tamazeri haviza hanazana, mago knare'zana e'origahaze. Hianagi tamagrama knare tamavutmazama nehanage'za, tamazeri havizama hanazana, Anumzamo'a asomu huramantegahie.

21 Na'ankure tamagrira ana knaza erisazegu tamagi hu'ne. Kraisi enena anahukna huno atazana erino huraveri hu'neankita, Agrama hu'neankna tavutava huta avaririgahune. 22  Agra kumira osuno, mago havigea agipintira osu'ne. (Ais 53:9) 23 Hanki Agri'ma huhavizama huntageno'a, zamagrira nona huno huhavizana huozmante'ne, Agri'ma azeri havizama huntageno'a, zamagrira nona huozmanteno zmazeri havizahu kea osuno, Anumzamo fatgo huno refko nehimofo antahi nemino, ana knazana Agri azampi antene. 24 Agra avufare kumiti erino rugeka zafare hantinegu, tagra kumi'ma huzampina nefrita, fatgo tavutavama huzampina, kasefa huta manigahune. Na'ankure Agri avufgama aguzama ru'nazazamo, tagrira tazeri so'e hu'ne. 25 Na'ankure tamagra sipisipi afukna hutma hazagre'nazanagi, menina tamagra rukrehe hutma sipisipi kva ne, tamagu tamemofo kva Nete e'naze.