1 Kagrira Kraisi'ene fripinti Anumzamo'a kazeri otinegu, kagu'a monafinka me'nea zantaminte anto, Kraisi'ma Anumzamofo azantamaga kazigama mani'nere. 2 Monare zanku tamagesa areare nehuta, mopafi zankura tamagesa arerera osiho. 3 Tamagra frizageno, tamasimumo'a Kraisi ene frakino Anumzamofompi me'ne. 4 Kraisi'a tagri tasimu maninemo eama hania zupa, tagranena Kraisi'ene hanavenetake masazama'afi e'ama hugahane.

5 Tamagripima ama mopafi kefo tamavutamava me'nesiana ahefriho. Ana avu'avara monko avu'avazama, agru osu avu'avazama, rumofo zantema kenunu hu'zama, havi agu'agesa antahizama, agraguke antahi avu'avazama, e'inahu avu'avazamo'a havi anumzante mono hunteakna hu'neanki atreho. 6 Na'ankure e'inahu avu'avama nehaza vahete Anumzamofo rimpahezamo'a egahie. 7 Tamagra korapara anahukna kante vono nehutma, ana avu'avazampi mani'nazane. 8 Hianagi menina mika havi avu'avazana eritreho, havi asivazi'zama rimpahe'zama, havizama rumokizmi huzmante'zama, urinkema hu'zana atreho. 9 Korapa tamavufgamofo havi avu'avazana ko atrenazanki, orevatga arevatga osiho. 10 Hagi menina magoke magoke'motma kasefa vahe nemanitma, troma huramante'nea nekna maka kna nehutma, mago'ene agrira antahi ama hugahaze. 11 Amafina Griki vahera omanigeno Jiu vahera omanigeno, avufga tga hu'nea vahero, avufga taga osu vahero, Sinti'ene vahero, Barberien vahero, kazokzo eri'za vahero, kina osu vahero, Kraisi'a ana miko'za mani'neankino, Kraisi mikamotafina mani'ne.

12 E'ina hu'negu Anumzamo'ma huhampri ramantegeta ruotge hazageno'a, Agra tusiza huno avesiramantenegu, tamagra rumokizmia tamasunku huzmanteta zmazeri so'e nehutma, vahe'mofo knare tamavu'tamava hunezmanteta, anteramita nemanita, agazone tamavutamava nehuta, akoheno avega anteno mani tamavutmavara kukena hiaza hiho. 13 Mago'moma havizama hugantenesigenka ana knazana e'nerinka, Ramo'ma kumika'a atreganteneaza hunka ana havizama hugantenesimofona, havizama'a atrento. 14 Avesimantezamo ana miko avu'avara agaterenegu, rumokizmi zamavesizamanteho. Avesi'ante avu'vazamo ana miko knare avu'avazana azeri manumanu hu'ne. 15 Kraisi rimpa fruzana atrenkeno tamagu'afina kegva hurmanteno, na'ankure tamarimpa fru huta manisazegu kehigetma mago avufga mani'nazanki, miko zupa Anumzamofona susu hunteho.

16 Atrenkeno Kraisi nanekemo'a tamagu'afina mevitenena, miko knare antahintahireti rempi hunezamita zmazeri fatgo nehutma, Anumzamofo avontafepi zgamera nehutma, krente zgamera nehutma, mono zgamera hutma Anumzamofona tamagu'areti susu huntegahaze. 17 Kegaga hanampino, eri'za erisampina, Rantimofo Jisasi agifi makazana huo. Jisasimpi Anumza Nafatimofona susu huntegahune.

18 A'nemotma neramave agorga'a anteramitma maniho, e'inama hanazana Ramofo avurera knare hu'ne. 19 Venenemota a'netamimofona zmavesinezamanteta, tamarimpa haviza huozmanteho. 20 Mofavre'mota mika zupa neramarera tamafa ke amage anteho, na'ankure Ramo'a muse hugahie. 21 Zamafaheta mofavre nagamokizmia zamarimpa knama erizamizana osiho, ru zamagra knarera osu'none hu'za antahigahaze.

22 Kazokzo eri'za vahe'motma maka'zama hanafina ama mopare kva vahe'mofo agorga'a mani'netma hakare'a zama hanafina kva vahe tamimo tamavesi tamantesia kazigati, zamavureke eri'zana e'oriho. Hianagi Ranka'amofo ra agi nemitma, tamagu'areti hutma kva tamimofo erizana eriho. 23 Ana miko erizama erisanana, kagu'areti hunka Ramofo eri'za e'nerinanki erio. Ama mopafi kva vahekamofo eri'zankera e'norine. 24 Kagra Ramofontegatima musezana erisintiharegahane hu'nea zana erisana zankura ko antahinane. E'i Ramofo Kraisi erizama enerinane. 25 Hianagi iza'o hazenkema hanimofona, Anumzamo'a hazenkema hanirera nona'a huntegahie, hagi magomofonkuke hu Anumzana omani'ne.