1 Mago kna egeno ana knazupa Juda'a afuhe'i zamatreno Adulami kumate Hira ome keku vu'ne. 2 Juda anantega Kenani ne' Sua'e nehza ne'mofo mofa keteno, a' erino anteno mse'ne. 3 Ana higeno amu ene huno ne' ksentegeno, agra agi'a Eri'e huno ante'ne. 4 Anante mago ene amu ene huno ne' ksenteno, Onani'e huno agi'a ante'ne. 5 Ana a'mo mago'ene ne' ksenteno Sela'e huno agi'a ante'ne, Juda'a, Kezipi mani'negeno nenaro'a ne'mofavre kse ante'ne. 6 Hanki Juda'a agonesa ne'mofavre Erina a' avre ami'ne, agi'a Tema'e. 7 Ana hianagi Judana, agonesa ne'mo Eri'a Anumza'mofo avufi haviza higeno, Ra Anumzamo ahe fri'ne. 8 Juda'a amanage huno Onani asmi'ne, Nempuka'mofo ate vunka, nefu a' eneria kna avu'ava hugeno, negfu mofavre ksenteno. 9 Hianagi Onani'a antahi'ne, kento a'mo, ksentesia mofavre'a agri mofavre omnigahiankino, nempua'mofo a' ene nemseno avufga rina, nefu mofavre antemi'zanku mopafi atre'ne. 10 E'inama agra hiazankura Ra Anumzamo musena osuno, ahe fri'ne. 11 Anante Juda'a nenofero Tema asmi'ne, Negfa nompi kento umani'negeno, ne' niamo Sela nena huteno, nehuno agesa antahi'ne, aru agranena nefu'za fri'nazaza hanigi nagra koro hue hu'ne. Higeno Tema'a vuno nefa nompi umani'ne. 12 Mago'a zgegfu evigeno Sua mofa, Juda nenaro frigeno, zamasunku huza zvi atazageno ana kna vga'retegeno, Juda'a sipisipi azoka neharerega Timna kumate mrerino vu'ne, agrane, Hira agri arone'a Adulam ne'ene vu'na'e. 13 Mago'a vahemo'za Temana ome asmi'za, konkeno negnofero'a sipisipi'a azoka hareku Timna kumate evu'ne. 14 Hanki ana a'mo kento kukena hate netreno amne kukena huno, avugosa refiteno, Enaim kuma'mofo kasante Timna vu kante emani'neno, agesa antahino keana, Sela hago ra hu'neanagi, a' ka'e huno navreno omi'ne. 15 Juda'ma ana a'ma eme negeno, monko a' mani'ne huno agesa antahi'ne, ana a'mo avugosama refiteno mani'negeno keso'e osuno'e. 16 Agra kana atreno ana a'mofonte vugantuteno amanage hu'ne, menina natresankena kagranena umasegahuo? Agra nemofo are huno ontahi'ne, Tema'a amanage huno antahige'ne. Na'a namitenka nagra'nena umasegahane? 17 Mago ve meme afuzga ni'afinti avre'na antegantegahue huno asmi'ne. Ana a'mo amanage huno asmi'ne. Knare mago avameza kmente'zana naminenka, henka'a avrente nantegahampi? 18 Ana ne'mo amanage hu'ne. Avame'zana nagra na'a kmigahue? Ana a'mo anage hu'ne, rinine, knankempi kvasese nofi ene, kazampi erinana azompa ka'ane namigahane. Ana miko'za nemino ome anteno msegeno agri'teti amu ene hu'ne. 19 Anante otino vuno avugosafi refite'neaza eri netreno, kento kukena omeri hankre'ne. 20 Juda'a rone'a Adulami ne'te, ve meme avre amigeno ana a'ma ami'neaza azampinti erinogu ome hakeana ana ara onke'ne. 21 Agra ana a'mofo kumate vahe zamantahi'geno, ina'ne Enaim vu kantega havi anumzante mono hunentazafi nemnia monko ara? Zamagra amanage hu'naze, amafina havi anumzante mono hunentazafina monko ara omni'ne. 22 Ana ne'mo ete Judante vuno, amanage hu'ne, Ana ara hakena erifore osuge'za, ana kumapi vahe'mo'za amafina monko ara omni'ne hu'naze. 23 Anante Juda'a amanage hu'ne, Aru vahe'mo'za tagiza resagi atregeno ana a'mo erino. Hago amai ve meme avre kamugenka, ana a'ra ome hakenka eri fore osane. 24 Henka 3'a ikana evutegeno, Judana asmi'za negnofero Tema'a savri nehuno, savri mofavre eririne. Juda anage hu'ne, Avre fegi atreta ana ara tevefi kre kasegeho! 25 Ana ara avazu huza fegi'a atirmizageno, nagrama namu'ene hunoana ama zamofo nefanteti mofavrea eririnoe, nehuno ana zana zamige'za eri'za nenoferonte vazageno mago'ene anage hu'ne. Muse (plis) hugantoanki ko, ama rinine, anankempi avasese'zane, azompa aza suzane? 26 Juda anazantmi keno antahino nehuno, amanage hu'ne, Tema'a nagrira nagtereno knare'za hu'ne. Haviza huna nagra nenmofo Silana avre omugeno anteno omse'ne. Juda'a ete mago'ene ana a'ene omse'ne. 27 Ana a'mo mofavre anteku nehigeno, keana kugaveza rimpafina mani'na'e. 28 Anante mofavre kasenentegeno mago'mo azana ante gamategeno, aza huno mofavre kasemi a'mo koranke osi nofi azante kinenteno, amanage hu'ne, ama mofavremo koteno e'ne. 29 Hianagi eteno azana anmagi agu'ategeno, ete mago'mo atirmine. Ana a'mo amanage hu'ne, inankna hunka kagra anafe hunka agterenka ane! Ana hunegu agi'a Peresi'e (Peresi anafe huno e'ne) huno antemi'ne. 30 Hanki amefiga'a nefu osi koranke nofima azante kintenemo atiramigeno, agi'a Zela'e huno antemi'ne.