1 A kum tistising, a nemi sur mot in nuk pas a kum tumtubundat, ra det wan tagitong o Ijip. Det rop det wan utuntudu ina du bakut, ra det rop det wan kutus a Merek na Tasi. 2 I elar nami ra di baptaiso det una du bakut ma a tasi, ma i upuaso i lena det a taro anun o Moses. 3 Det rop det wangon tagun ara utna na Nion kut, 4 ma det inum tagun ara danim na Nion kut, uni det inum tagun a wat na Nion, ra i wan tomo nam det. Ma a wat na Nion ra, i o Karisito. 5 Ikut a susut doko tagun det, o God ke gas nam det. Ra det mat nanan ma a kum minatin det det inep ororos kut una nubual kalako taro uni.

6 Ma a kum utna ri i wanpat sur in utumarong dat, sur gong a balandat i nemnem sur a kum sakino petutna, elar nama balandet i nemnem suri. 7 Gong mot lotu torom a kum torotoro na god elar nama ramano taro tagun det. Elar nami ra di sa tumus tari una Buk Tabu lenri,

11 A kum utna ra, i wanpat un det, sur in utumarong dat. Ma di sa tumus tari sur a etowo torom dat, ra dat laun una kum tintinip na bung ri. 12 Ra taio i nuki lena i tur dekdek, in tumarong, sako in puku taru una sakino petutna. 13 A kum ululam ra mot sa etorom tari, ausur mot kut mot etoromi, awu, a susut na taro kai det etoromi. Ra o God ken madek ru mot sur tu ululam in nanpat torom mot, ra in labo taun a dekdekimot. Ra tu ululam in nanpat, o God ut in waninar pas tu kisapi, sur mot in nan gisen gusuni ma mot in winim pasi. Ma asau ra o God i len in pam soti ut.

14 I mo ra a kum wakak na paspasang, gong mot lotu torom a kum torotoro na god. 15 A wasiso torom mot elar nami ra a wasiso torom a taro ra det sa mananos. Ma mot ut mot in warkurai wakak anung a wasiso ri. 16 Ra dat inum tagun a kap ra di sa watung wakak pas uni torom o God, dat takai tomo nam o Karisito, una gapino. Ma ra dat wangon tagun a beret ra dat tibiki, dat takai tomo nam o Karisito, una pinino. 17 Dat susut, ikut, dat ara pinindat uni dat wangon tagun in teken beret kut.

18 Dat in tama a taro Israel. Ra det wan a wewegua ra di sa etabor taru nami torom o God una kabulu na tuntun etabor, i dat tomo det nam o God. 19 Asau a kukuraina nung a wasiso? A utna ra di etabor taru nami torom a toktok katu utna i gas uni, ma a toktok ra di etabor toromi, i kai katu utna i gas uni. 20 A watungi tamot lena a kum utna ra a taro ra ka det nurnur det etabor nami, det etabor nami torom a kum laulau na nion, ma ausur torom o God. Ma ka nemi sur mot in lason tomo nama kum laulau na nion. 21 Ka mot in pet lar pasi sur mot in inum tagun a kap anun a Labino, ma tagun a kap kai anun a kum laulau na nion. Ma ka mot in pet lar pasi sur mot in nangon tagun a kabulu na inangon anun a Labino, ma tagun a kabulu na inangon kai anun a kum laulau na nion. 22 Pepetlai, dat nemi lena dat in ungangos a Labino, sur a nuknukino in laulau torom dat? Pepetlai, dat nuki lena a dekdekindat i labo tana dekdekino?

23 Sako taio in watungi lena, “A kum utna rop i wakak kut sur dat in pami,” ikut, ausur a kum utna rop in warut dat. “A kum utna rop i wakak kut sur dat in pami,” ikut, ausur a kum utna rop in udekdek dat. 24 Gong taio i nuk pasi ut, in nuk pas a taro gisen.

25 A kum wewegua ra di siuru i una rumu na siuru, mot in nani. Ma gong mot iting ra di sa etabor taru nami torom a toktok o awu, sur gong a nuknukimot in takun mot lena mot pam a sakino. 26 Uni a Buk Tabu i watungi lenri, “A rakrakon bual ma a kum utna rop ra det kis uni, anun a Labino.” Buk Song 24:1

27 Ra taio tagun det ra ka det nurnur i saring mot, sur mot in nangon tomo nami, ma mot nemi ut, mot in nan kut. Ma a kum utna rop ra di tabor mot nami, mot in nani kut, ma gong mot iting uni, sur gong a nuknukimot in takun mot. 28 Ikut, ra taio in watungi tamot lena, “A utna ri di sa etabor taru nami torom a kum torotoro na god,” gong mot wani, sur gong mot banlaulau a nuknukin o naro ra i inanos mot nami. 29 Ausur a wasiso una nuknukimot, awu. A wasiso un o naro ra i inanos mot ma i nuki lena mot pam a sakino.

A sa langolango. Sur asau ra a nuknukin taio in warkurai iau? 30 Ra a watung wakak pas torom o God una nga utna na inangon, sur asau ra taio in takun iau una utna ra a wani ra a sa watung wakak pas uni? 31 Lenra, ra mot wangon, o mot inum, o tu ngas na utna kai mot pami, mot in pami sur mot in ulabo pas o God nami. 32 Gong mot pam tu utna ra in upuku taio tagun a taro Juda, o tagun a taro ra ausur a taro Juda, o tagun a taro na lotu anun o God. 33 A nemi lena an ugasgas a taro rop una kum utna rop ra a ser pami. Ka pam tu utna sur in uwakak iau, awu, a pam a kum utna sur in uwakak lako susut, sur o God in ulaun pas det.