2
Alu Aotage Avamula amakaite elavi-maine.
1 Yisasia ago falitegeya sevenia (7) sota maiteya vitimo afulea kanahe muse haya imu kiya kanafina mukia Yisasi veala nago nopi alitalu huya mainae. 2 Mainageno aupaa ikapinagati ala age neaino ala yasimoma huhu huhu nehia kava huno age neaino anima mainaya nopina me hiya humaine. 3 Hiya higeya agayana atamo anefe kana yamoa hamaote hamaote amaugafale mo kamaemaine. 4 Mo kamae-mainegeno Alu Aotage Avamumoa eno mukiamogami amakupina me hiya higeya amakaya aepa heya Alu Aotage Avamumo hamapaigeya amaku amakesafiti nohaviya kea alu ke alu ke humainae. 5 Nehageya ani yupa kasagoya Anumaya Koti kema nehaviya Yuta vayayaga mukia kotegati eya Yelusalemu melitalu humainae. 6 Ani vayamoya ikapinagatima ala agegefa aigeya haviteya melitalu huya haviyana ani nopima mainaya veamoya alu ke alu ke maiya nehageya alu kotegatima emainaya veamoya mage hae “Nagai ke nehie. Nagai ke nehie.” huya tusia amamayo aimainae. 7-8 Amamayo neaiya amakesa havi havi huya mage hae “Mani kema nehaya vayamoya Kalili vaya mainayanagi hanaa huya tagaiti itatimoya nelafaya nehageta nehavuna kefitila hageta nehavune. 9-11 Tagaya ma kumayagaleti emainone Patiaene Mitiaene Elamiene Mesopotemiaene Yutiaene Kapatosiene Potusiene Esiaene Filigiaene Pamafiliaene Isipiene Sailinia aupaale Lipia kotegatiene Lomuene Kalitiene Alepiaene naa kotegati emainonagi Yuta vayaene Yuta vayamogami Anumaya Kotiamimo ke havilinaya vayaene emainonagi tahaote tahaote ketifiti Anumaya Koti tokiyaleti humainea kavafe tahapai-mainae.” huya hae. 12-13 Hageya mukia veamoya tusia amamayo neaiya tusia amakesa nehaviya nagoa veamoya mage huya hae “Ani kavamona aepaa naane?” huya hayanagi nagoa veamoya havigu ke nehuya mage hae “Amakaya havilina vaini nofi alagamo timaa neteya aneginagi nehae.” huya humainae.
Pitaa ke huhaleno humaine.
14 Pitaa alevenia (11) Aposolo vayaene heti-maineno ala kefiti mage huno humaine Yuta nafunaganagatamaene Yelusalemuma mainaya veanene nago ke tamahapaigahugi haviho. 15 Tamakaya tamakesa haviyana mani veamoya havilina vaini li neya aneginagi nehae hutama nehafi? Aao menia natekefa naeni kiloki nehigi havilina onenae. 16 Onenagi menima agaya yafena nayona Anumaya Koti aune kanomoa Yoelima humainea kemoa mage huno humaineane.
17 Anumaya Kotia mage huno humaine “Mani kanamoa aupaama hano hugahema hisia kanafina nagaya Alu Aotage Avamunimona mukia veanemogamina amamigahue. Amamisugeya tamakai nafanemoene munanemoene Anumayamo avayafiti hamapai-mainea kea hisageya neyavetamimoya himona kana yayaga feluga neagesageya kosunatamimoya himona agegahae. 18 He, nagaya Alu Aotage Avamula aliya veanimogamina vene anene amamisugeya Anumayamo avayafitima hamapai-mainea kea tamahapaigahae. 19 Nagaya ikateene ma mopafiene tokiya avameyama hisua yana kolaene ataene halinaene tamaveligahue. 20 Tamavelitesugeno yagemoa ayesu hinageno ikamoa kolamaage hisigeno Anumayamoma esia kanafina tusia tokiyaaene hale yamaaene efalote hugahie. 21 Efalotema hinageya mukia veamoya Anumayamo agi neayeya ‘Kalagi ailato.’ huya nehisageno Anumaya Kotia amaku amamena aligatigahie.” huno kae-maleneane.
22 Isaleli vayamogatama nago kea tamahapaigahugi haviho “Nasaleti Yisasie, Anumaya Kotitegati emainea kano maine.” hutama havisaya yafe Anumaya Kotia aya higeno tusia tokiya avame yana tamakaipina ago ali falote higetama age-mainae. 23 Agayanagi Anumaya Kotia nayona havino “Naa maa hugahue.” huno haya kimaleteno tamayapi ategetama Anumaya Kotia hutenea kava hutama ani kanoa, Yisasina, kefo vayaene yafaga yosalela nilia hetama asaitetama hayageno fali-maine. 24 Falimaineanagi falimainea yamoa atafa huno atakalo ohune. Anumaya Kotia anima agata yama alino falimainea yapitila kalu heno ali hetitene. 25 Nayona Tevitia Yisasima falimainesifitima alino heti-tesia yafena mage huno humaineane
“Mukia kanafina Anumayaniamoa nagaiene maineno tamaga nayategama mainea yafena kolia ohugahue. 26 Nagaienema nemaiya yafena nagu nafanemoa tusia muse nehigena agia alisaga nehue. Yoka falitena hetigahue huna nametitia nehue. 27 Anumaya Kotigae ‘Alu aotage kanoe.’ huka hunatenana kanomonia naugafa kasalisia yafe fali-mainaya veane mainaya kumatela natalesanagena ovisua yafe nametitia nehue. 28 Kagaya agola maige maige hisua kana ago navelinagena age-mainoafe kagaienema maisua yafena aluya huna musena hugahue.” Teviti mani kea humaineane.
29 Pitaa nagoene mage hie “Nenafugatama hufalote huna tamahapaisue taginagomoa Tevitia ago faligeya hevaitenae. Hevaitenaya komua tagai amunopi hanegi akaiahe mani kea ohuneane. 30-31 Ohunegi Anumaya Kotia agaife mage huno hulokiya vaino kea humaineane ‘Kagai kaginagomopiti nago kanomoa hetino eteno kagai kumate veanea kava yagaimategahie.’ huno humaineane. Humaineanagi Tevitia Anumaya Koti aune kano maineanagino Kalaisia, Anumaya Kotima taugafa aligatigahe hutenea kanoa, fali-mainefiti hetigahie huno aune laga huno mage huno humaine. Kalaisife ‘Augafaa kasalisia yafe fali-mainaya veane nemaiya kumatela oategane.’ huno humaineane. 32 Ani kanoa, Yisasina, Anumaya Kotia fali-mainefiti eteno ago alino hetitegeta age-mainona yafe tamahanepaune. 33 Anumaya Kotia ali hetiteno avalesaga huno agaia tamaga aya kaiyagaa uhagote mainaya vaya mainalega ateteno ‘Tamamigahue.’ hunoma humainea kanoa, Alu Aotage Avamua, amigeno aliteno Yisasia ani Alu Aotage Avamula eteno lamigeta mani kavala hunagetama neagae. 34-35 Tevitia mage huno humaineane Anumaya Kotia Anumayaniamofena mage huno humaine ‘Tamaga nayatega uhagote mainaya vaya mainalega mopale emainesanagena kame vayakaa kaiyafi amatesugeya ani kame vayamoya kagaifena ago tagasane.’ huya hugahae.” huno humaineane.
Tevitia Yisasima humainea kava huno ikapinaga haino omainegi mani kea agaiahena ohunegi Kalaisife humaineane.
36 “Ani yafe Isaleli vayamogata havilama huta havisune. Ani Yisasina tamakayama yafaga yosalela nilia hetama asai-malenaya kanomofe Anumaya Kotia mage huno humaine ‘Ani kanomoa Anumaya maineanagi nagaya hutogeno emainea kano maine.’ huno humaine.” huno nehie. Kasagoya ve amoya amakua aiyahae hageya tina falematenae. 37 Pitama hia kemoa amakupi ayegeya haviteya Pitaene nagoa Aposolo vayaenefe mage huya hae “Nelafugatama menia hanaa hisune?” huya hae. 38 Hageno Pitaa mage huno hie “Tamakaya mukiamogatama tamakua aiyahae hutama egeta Yisasi Kalaisi agile tina falelamatano. Aniama hisagenoa Anumaya Kotia aigetamateno kefo yatamia atalelamateno Alu Aotage Avamula tamamigahie. 39 ‘Tamamigahue.’ huno humainea kea tamakaife nehigi tamakayaene nafanetamiene Yuta vea omainaya veanenefe mani kea huno mukia Anumaya Kotia kema humatesia veamogamife ‘Tamamigahue.’ humaineane.” huno Pita mani kea humaine. 40 Pitaa mani kea nehuno alu ke alu ke huno kanaye kanaye huno mage huno hie “Meni kanafima mainaya veamoya tusia kefo kava maiya nehagi havigu tamakaya kefo kava huyafenagi atalegeno Anumaya Kotia tamaku tamamena aligatino.” huno humaine. 41 Higeya nagoa veamoya tali tausenia (3,000) veamoya mani kea haviteya aliya amakupi maleya amametiti hageya ani yupa lina falematenae. Yisasife amakupi nemalaya veamoya tokaeya kanale kava nehae. 42 Lina falematageya amakaya mukia yupa nago amaku amakesa haviya Aposolo vayamogami kea haviya hameya maya kofa huya nete nete nehuya Anumayamotega muse huya nunamuna nehae. 43 Nehageya mukia veamoya tusia amamayo neaigeya Aposolo vayamoya kasagoya tokiya avame yana nehae. 44 Mukia Yisasi kema haviya amakupi maleya amametitima humainaya veamoya nagoke amaku amakesa haviya mukia yayagaamihena “Nagainige yane.” huya ohunagi “Mukia yana lagaiti ya hane.” huya nehae. 45 Mopaene afenoyaamienema hanea veamoya atalageno alu kanomoa miya higeya monea aliteya fako hute hute huya kaveamima omalenea veala amaminae. 46-47 Mukia kanafina nagoke amaku amakesa haviya ala mono nopina neuya alu nopina alu nopina uya hameya maya kofa huya kaveene nete nete nehuya muse huya Anumaya Koti agia alisaga nehageya mukia veanemoya ageteya “Kanale kava nehae.” huya nehageno Anumayamoa nago kanafina nago kanafina nagoa veanea amaku amamena aligatiteno “Nagai ke nehaviya veaene maiho.” huno humatene.