15
Anumaya Kotia kahegi kemoa tototimogami kahegi kemona agase-maine.
1-2 Ani yupa nagoa Falasia vayaene kahegi kema havilinaya anagaene Yelusalemuti Yisasite eya mage huya hae “Naa higeya kagaienema tokaeya nemaiya anagamoya taginagomogami kea ali-tagaeya kavema negahena amayana sese nohae?” huya havigae. 3 Hageno Yisasia kenonaamia mage hie Naa higetama tamakinagomogami auavala akavema malaya yafe Anumaya Koti kahegi kea ago neatagayae? 4 Anumaya Kotia agaia autamafina mage huno hu-maineane.
“Tamakaya itatami afotamimogami amakia alisaga nehutama keamia veganokano ohutama amaiyaafinaga maiho. Nago kanomoga itakafokamona kamugema vaitenukahena faligane.” huno hu-maineane.
5-6 Hu-maineanagi tamakaya mage hutama nehae “Nago kanomoa itaafoamogani anaya hisia monema hanesigenoma itaafoamoganima anaya ohinunoa mage huno hisie ‘Ani monea Anumaya Kotina amisua yane huna hu-mainoe.’ huno hinunoa nefana aya huno agia alisaga ohisie.” hutama nehae. Ani ke nehutama tamakinagomogami auavala akavema malaya yafe “Anumaya Koti kea afa ya kana nehie.” nehutama alitama neatagayae. 7-8 Tamakaya vagala vaya mainae. Aisaiyaa Anumaya Koti aune kanomoa tamakaifena tamage huno Anumaya Koti autamafina mage huno hu-maineane
“Ani nofi veamoya amavayaleti nagai nagia alisaga nehagi amakuamoa aluale hanegeya ani kavala nehae. 9 Ma mopafi veamoya malenaya kahegi kehena ‘Mamona Anumaya Koti ke hanegi akave maleho.’ huya nehayanagi nagai nagia alisaga nehayanagi afa kava maiya nehae.” huno kae-maleneane.
Yisasia veamogami amakuama ali haviya nehia yafe hu-maine.
10 Yisasia agaite esae huno kasagoya veamogamifena ke higeya ageno mage huno hie “Tamakaya mani kea havilama hutama haviho. 11 Nagola tamavayafima nesaya yamoa tamakuamona alino oniyaagela ohugahigi tamavayafitima hati-lavisia yamo ali-falote hisigeno tamakuamoa oniyaagela hugahie.” huno hu-maine.
12 Higeya agaiaenema tokaeya nemaiya anagamoya Yisasife mage huya hae “Falasia vayamoya ani kea haviteya amaipa kafa he-gataya kea ago havimainano?” huya hae. 13 Hageno Yisasia mage huno hama-paiye “Ikapinaga mainea Nenafaa okalinesia yana agaia mevakaino hafuyaene tagasi hugahie. 14 Tamakaya mani vayafena tamakesa ohaviho. Amaulaga asu hu-mainea vaya mainae. Nagoma aulaga asu hu-mainea kanomoa nago aulaga asu hu-mainea afaluamona avaleno vaiyesiana tolemogania komufi asaga hu-lavigae.” huno hie. 15 Higeno Pitaa Yisasife mage hie “Kagaya mani avame kemo aepaa hugeta havimano.” huno hie. 16 Higeno Yisasia mage huno hie “Tamakaya meni kanaene havilama ohunetama nehao? 17 Tamakaya ohavinao? Mukia yama tamavayafi nageno tamakuafina ounogi tamaipafike taviteno haenagaa aifayolagafi tavino afa ya kana nehie. 18 Afa ya kana nehianagi nago yana tamavayafitima hati-lavia kemoa tamakupiti falote huno tamakuamona alino oniyaagela nehie. 19 Tamakuafinagati efalote hia yana maa huno falote nehie kanale ohu tagu tagesa nehavuna yaene vaya he-fali kavaene alu kanomo ane avayu hu yaene ane munanele kumai he yaene musufaya hu yaene havige hu-ma-te yaene kamuge vai-ma-te yaene taguafitila ali falote nehie. 20 Naama haya yafe tamakupina oniyaagela tamahau-mainegi veamoya amayama sese ohuya kavema naya yamoa amakupina oniyaagela ohugahie.” huno hu-maine.
Kenani amoa Yisasina agua amitafa hu-maine.
21 Yisasia nemaiya kumala ataleno Taiya kotegaene Saitoni kotegaene umaine. 22 Umainegeno nagola anile mainea Kenani amoa, Yuta vea omainea amoa, agaife ke huno mage me hie “Ala kanomogae, Tevitina aginagomoga, nagaila kahau hunato. Kefo Avamumoa nagai munala aguafi faleno maineno tusi havi kava hu-nea-te.” huno hie. 23 Higeno Yisasia nagola osi ke kanoa ohunegi agaiaenema tokaeya nemaiya anagamoya agaife mage me hae “Ani amoa tagai takave neeno tusiya huno keha keha nehuno tutu nehigi kagaya hu-tegeno vino.” huya hae. 24 Yisasia mage hie “Isalelima vayagi-mainea sipi sipileke Anumaya Kotia hu-na-tegena emainoe.” huno hie. 25 Higeno ani amoa Yisasi aiyafi aleya meye-maineno mage huno hie “Ala kanomogae naya huo.” huno hie. 26 Higeno Yisasia mage huno hie “Havigu nafaneyagamogami kave hama-faleya kalamogami amamisagi nagaya Isaleli veala amatalena alu vayane amaya hisuana haviya hugahie.” huno hie. 27 Higeno ani amoa mage huno hie “Ala kanomogae tamage nehananagi kalamogamina neamafaya nenageya kalamoya sipaletima asaga hu-lavia atupaa yogiya nenae. Kagaya ani kava huka nagaya Isaleli a omainogi osia nahamao.” huno hie. 28 Higeno Yisasia mage hie “Amogae tusiya huka nagaifena havika kagupi maleka kametiti hanafe nahavigana yana kamigahue.” huno nehigeno ani kana kanoale munaamona kanale hu-tene.
Yisasia kasagoya kali veane alino kanale hu-ma-tene.
29 Yisasia ani kumala ataleno Kalili ti kotumo agegayalega uteno nago agoyafi haino mopale maine. 30 Mainegeya kasagoya veala agaite melitalu nehuya aiya avayu hu-mainea veanene aiya aya haviya hu-mainea veanene amaulaga asu hu-mainea veanene age tagane-mai veanene nagoa kali veanene amavaleya Yisasina aiyafi mematageno alino kanale hu-ma-tene. 31 Kanale hu-ma-tegeya mukia veala agayana higeya tusia amamayo ai-mainae. Age tagane-mai veamoya kaiyeke hageya amaiya amayamo kayagi-mai veamogamina amaiya amayamoa kanale higeya amaiya haviya hu-mainea veamogami amaiyamoa kanale higeya nevageya amaulaga asu hu-mainea veamogami amaulagamoa kanale higeya amaulaga age-mainae. Naama haya yate ageteya Isaleli veamogami Anumaya Koti agia alisaga hu-mainae.
Yisasia fo tausenia vaya (4,000) kave amamine.
32 Yisasia agaiaenema tokaeya nemaiya anagafe ke higeya ageno mage hie “Mani veamoya talia (3) yupa nagaiene mainageno nesaya kaveamia omalea yafe nahau hu-neama-toe. Havigu amatalesugeya katega nevisageno amakatesigeya amaugetunatu huya takatiyafena nonahaiye.” huno hie. 33 Higeya agaiaenema tokaeya nemaiya anagamoya mage huya hapaiye “Mani kotega vaya omai kotegagi hanateti kosa hesia maya alita ani veanea amamisune?” huya havigae. 34 Hageno Yisasia mage huno hama-vige “Tamakaya namagi maya hane?” huno higeya mage hae “Tagaya sevenia (7) mayaage hanegi nagola osi noyame kanoa hane.” huya hapaiye. 35 Hageno Yisasia mukia veafena “Mopale maiho.” huno hama-paigeya mopale mainae. 36 Mopale mainageno Yisasia ani sevenia (7) mayaene noyamene alino Anumayamotega muse huno havigeteno kolite kolite huno agaiaenema tokaeya nemaiya anagala amamigeya mukia veamogamina amaminae. 37 Amamigeya mukia veala nageno amamu higeya atalaya maya atupayaga agaiaenema tokaeya nemaiya anagamoya alitalu huteya sevenia (7) kupi ai-hava-te-mainae. 38 Ani kavema ne-mainaya venenea fo tausenia (4,000) vemoya ne-mainae. Nafaneyagaamiene aneyagaamiene nayanagi ohapalinae.
39 Netageno Yisasia hu-mategeya utageno agaia tipi kalefi haisaga hu-maino Magatana kaiyaga umaine.