1 Ani Sipi sipi nafanemoa haenagalafana menimo fukiteti aye kamae-malenea yana melino hakao higena agogeno mukia ikapinagama hanea yamoa kanage kanagela ohuya mukia yamoa kea ohigeno vaniagi hafu aovamoa eumaine. 2 Eutegena anile agoana sevenia (7) ensole veamoya Anumaya Koti aule hetiya mainageno sevenia (7) ufena amamigena age-mainoe.

3 Agogeno nago ensole kanomoa nagola kanileta yafateti talo hu-malenea yopa ayapi ali-linegeno afuma heya folamole kae salamana huya nemalaya folamo kana folamole heti-mainegeno kasagoya manaage nehia tanefamo halinamoene Yisasina amakua aminaya veamoya nunamuma huya havigaya nunamuene ani yopafina ali malesigeno ailokaenoma haisiana Anumayamoa kanale manaa havisiafene huno sauve kanomo siamo aulega kanileta yafateti talo hu-malenea folamo hanea folamole mo malene. 4 Momalegeno ani manaage halinamoene Anumaymona amakuama aminaya veamogami nunamuyagaene ani ensole kanomo ayapitila ataleya Anumayamo aule haimainae. 5 Haigeno ani ensole kanomoa kanileta yafateti talo humale yopa alino folamole atama nelea ata ani yopafi maleno havateteno alino ani ata ikapinagati ma mopafi hagayu hu-talegeno elavigeno ikapinagatila akali kalu huno aulumayala nealigeno nagola ala agegefa neaigeno imila ali-maine.

6 Sevenia (7) ufema atafa hu-linaya ensole vayamoya ani ufema hisaya yafe talo tala humainae. 7 Hagote ensole kanomoa agaia ufena higeno komopamoene atamoene kolamoene atagufe-lavino mopafi tavigeno mukia ma mopa tagufale (3) ali fako hu-malageno anifiti nagokema ali fako hu-malaya haupa kaiyaga mukia mopafi hanea yaene mukia yosayagaene mukia apeene atamoa teno asagali-talene.

8 Asagali-talegeno tu (2) molia ensole kanomoa agaia ufena higeno ala agoya kana yana ata nelegeno hagelipi tavi-maine. Ani hagelimona tagufale (3) ali fako hu-malageno anifiti nago haupa kaiyaga hanea timoa kolamaage huno vali vali humaine. 9 Kolamoa vali vali higeno ani haupa kaiyagama mainaya noyameyagaene tipi yagaene fali hano hageno ani haupa kaiyagama hanea tipi kaleyaga ali haviya hu-talageno anifima mainaya veala fali hano humainae. 10-11 Faligeno tali (3) molia ensole kanomoa agaia ufena nehigeno kanefila ala kanefekefamo agia “Atuage nehuno satuage kanefile.” huya nehayanaginoa kanimoma nelea avamete huno ikapinagatila elaviaamo mukia ma mopamona tagufafi (3) melino fako hu-malageno anifiti nago haupa kaiyagama hanea tiyagaene tima kapaima nehagea ti komufi hanea timoene atuage higeya mukia ani lima ne-mainaya veanea fali-mainae.

12 Faligeno fo (4) molia ensole kanomoa agaia ufena nehigeno yagemoa tagufafi (3) ali fako hu-malageno anifiti nago haupa kaiyaga asu humaine. Ania huya ikana tagufafi (3) ali fako humalageno anifiti nago haupa kaiyaga ania huno asu humaine. Kanefiyaga tagufafi (3) ali fako hu-malageno anifiti nago haupa kaiyaga ania huno asu humaine. Asu hu-maigeno felugama aye vasa nehia yaamimoa tagufafi (3) ali fako hu-malageno anifiti nago kanafina asu higeno kegela tagufafi (3) ali fako hu-malageno anifiti nago kanafina ikaene kanefiene asu higeno tusia haniki-maine.

13 Nagaya Yonina agogeno nagola ala hakiki kana nama ikamo amunote haleno vigena age-mainoe. Neagogeno ala kegefafiti mage huno hie “Avonio avonio tagufa (3) ensole anagamoya ufena nehisageno tusia kana yamoa ma mopafi mainaya veamogatamile falote hugahe higena tusia nahau hu nelamatoe.” huno higena havue.