1 Osifavemoa hagelimo agegayalega hetino mainegena nagaya Yonina agogeno nagola kefo afai afua hage lipiti vayi higena age-mainoe. Ani kefo afai afumo anumoa sevenia (7) anuyaga hanegeno tenia (10) aveyagamo anupitila hai-mainegeno ani aveyagamotela ala sauve kanomo tumano kuyaga tenia (10) tumano ku vailine. Ani sevenia (7) anutela kefo afai afumo agia hanegeno ani agiyagamoa Anumaya Kotifena kamuge hatageya vaiteya hu-haviya hutaya agiyaga kae-malageno hane. 2 Ani kefo afai afumona agoana maa humaine. Nagola afai pusimo agia lepatie nehaya afu kana huno aiyamoa nago ala afai kalamo agia peamo aiya kana humaine. Avayamoa laiyoni afumo avaya kana hu-mainegena age-mainoe. Agogeno ani ala osifavemoa agaia tokiyaaene ala kava hisia siaaene ani kefo afai afumona amine. 3 Amigeno ani kefo afai afumona nago anuna ago hae-malenaya falitesea afugula haneanagi amuna ageno ago eteno kanale hutene. Kanale hutegeya ageteya mukia ma mopafi veamoya ageteya amamayo aigeya ani kefo afai afumona akave umainae. 4 Ala osifavemoa agaia tokiya kefo afai afumona aminea yafe mukia veamoya ani kefo afai afumofena “Alati maine.” huya agia alisaga humainae. Kefo afai afumo agiene alisaga nehuya mage huya hae “Hana kanomoa kefo afai afumo tokiyaamoma hia kavala huno hugahie? Ta agaienema tuma hisia tokiyaa hane?” huya hae.

5 Hageno Anumaya Kotia mage huno hie “Atalegeno tagufa (3) kafuene sikisia (6) ikaene kava yagaino.” huno higeno ani kefo afai afumoa agaia agia alisaga huno Anumaya Kotifena tusiya huno kamugea hatageno vaitene. 6 Ani kefo afai afumoa avaya aka-naka huno Anumaya Kotina kamugea hu neateno Anumaya Koti agiene nemaiya kumaaene ikapinagama mainaya veaaenena hu-haviya humatene. 7 Hu neamategeno Anumaya Kotia atalegeno Yisasina amakua aminaya veanene tua huno amakaseteno mukia alu kote alu kote veanene, alu make lu make neaiya veanene, alu maugafa lu maugafa kalimai veanene, kava humatesia tokiya amigeno kava yagaino maine. 8 Kava yagai-maineanagiya mukia ma mopafi veamoyama agia alisaga hugahayanagi maige maige hisaya hamaimuma hanea veamogami amakima hanea avopi amaki kae-malenea veamoya agia alisaga ohugahae. Ani avona Anumaya Kotia ma mopama taloma ohunea kanafina mage huno hu-maineane “Nagai Sipi sipi nafanea, Yisasia, faligahie.” huno hutenea kanomo avone.

9 Nagi tamakesama hanesimo-gatama mani kea havilama hutama hiho. 10 Anumaya Kotia “E.” huno hisigeya nagoa veamoya kina nopina ugahae Anumaya Kotia “Naepe kayoteti haetama falimato.” huno hisigeya nagoa veamoya naepeleti falilamategahae. Ani auava yamoma falote hisigetama Anumaya Koti kea haviya amakupima malenaya veamogatama tokiya vaitama mani kea ali lokiya vaitama atafa hu-litama maiho.

11 Nagaya Yonina agogeno nago kefo afai afumoa mopamo agusafiti evayi humaine. Ani kefo afai afumo anupina tole avela, sipi sipi nafanemo ave kana ave haneanagi agema aiyana tusia puku pukumo age kana huno agea aimaine. 12 Neaigeno hagote kefo afai afumoa tokiyaa amigeno ani himamuleti mukia ma mopafi veamogamitela kava humaineno anima nago kefo afai afumoa mukia ma mopafi mainaya veamogamifena mage huno hie “Hagote kefo afai afumona anupina haeya falitesaya kava hageno amuna ale-maineanagino eteno kanale hutenea afumo agia alisaga hiho.” huno humaine. 13 Nehuno anima nago kefo afai afumoa mukia alua augafa tokiyaage avame yana nehuno atamofena “Ikapinagati elavio.” hunoma hiana veamoya neagageno atamoa ikapinagati mopafina elavi-maine. 14 Elavigeno hagote kefo afai afumoa “Naa huo.” huno tokiya amigeno nago afai afumoa tokiya avame yama nehia yateti veala aye mavataga hiaamo ani veafena mage huno humaine “Tamakaya hagote kefo afai afua, naepeleti honomu ayageno faliteno eteno mainea afumo agia alisaga hisaya yafe yosaleti avamename hutama amena talo hiho.” huno humaine. 15 Higeya taloma hayana Anumaya Kotia atalegeya nago kefo afai afumo amena yosaleti talo humalaya kefo afai afumo amela haimula amigeno aepa heno nagoa veamoya agai agima alisaga nohageno haegeya fali-maine. 16 Ani kefo afai afumoa mage huno hie “Mukia veamogamina, amakima omale veanene, amakima hanea veanene, miyaami hanea veanene, miyaamima omale veanene, nofipi maineya miya oali aliya nealiya veanene, amakaiami miya alisaya aliyama nealiya veanene tamaga amayatelo hamanilelo ohananesia avona kaemateho.” huno higeya kasagoya veamo-gamina ani avomoa hamanileti kae-male kae-male humaine. 17 Higeya ani avona hagote kefo afai afumo agio ifi ani agimo napamao amaugafalema ani alegana yama omalenesaya veamoya nago yana alu veaneletila miya ohigeya amakaiami yana alu veamoya miya ohugahae.

18 Nagoa veama kanale havi haviyaami hanea veamoya ani hagote kefo afai afumo napamaa hapaliya havilama hisae. Ani napana nago kanomo agimo napamaa hane. Ani agimo napana sikisi hataleti sikisiti sikisia (666) napamaa hane.