11
Anumaya Kotia nago kaiyaga Isaleli veala ali kayone humatene.
1 Tamahavigoe Anumaya Kotia agaia anagaa amanati-talenefi? Tamage naa ohune. Nagayaenena Isaleli kano mainoe. Nagaya Apalahamu kola mainena Penisamini nofi kano mainoe. 2 Mani anagala nayona Anumaya Kotia ehema hapali-malenea anagaa amanati-oatalene. Ilaiya avagea Anumaya Koti avopima hanea kea ohavinao? Ilaiyaa Isaleli anagafe nunamuna mage huno Anumayamotega havige-maineane. 3 “Anumayamogae veamoya kagai amaune veamogamina hamaeya falimateya kagaife afu heya kae-salamana hunegataya ata haluya helagaya vaineatalageya hagena nagainige nagoke mainogeya nahaegahe tusiya huya natineayae.” huno humaineane. 4 Higeno Anumaya Kotia anonaalema humainea kea havilinao? Agai avopina mage huno kae-maleneane
“Kagaikage omainanagi Seveni tausenia (7,000) veamoya onatalenae. Yafateti talo humalenaya Anumayamo agia Palie agia alisaga huya amakua oaminaya anagania mainae.” huno humaineane.
5 Anima humainea kate meni kanaene Anumaya Kotia agaia kayone yamaaleti osi anagaa agaia veane maisayafe ago hapali-malene. 6 Anumaya Kotia agaia kayone yamaaleti hapalimatenegi kanale auava yama nehaya yateti hapalimateleasina agaia kayone yamaamoa afa ya kana hileasinagi agaia kayone yamaaleti hapalimatene. 7 Naa humaineanagita naane hisune? Isaleli veamoya Anumaya Kotia “Fatago veane mainae.” huno humatesiafe kasageke huge hugetayana oalitafa huya oaligeno Anumaya Kotia osi vea kanoa hapalimatenea veafe ani kea humatenegi nagoa veamoya ohavisayafene huno amakua alino aitalako humalene. 8 Anumaya Koti avopina mage huno humaineane
“Anumaya Kotia amakuamona alino amaukalo kalo humateno amaulaga alino asu humateno amakesa alino aililemateno higeya kea ohaviya maime maime eya meni kanaene ani kavakeya huya mainae.” huno humaineane.
9 Tevitia ani avopina mage huno humaineane
“Ala imulema maisayana Anumaya Kotia kalifu hanagi-malesigeno amatafa hisigeya vailiya asaga hulaviya havi yaamimo anonaamia aligahae. 10 Amaulagamoa hanikomako hisigeya oagetafa hisae. Mukia kana yama alimainayafe amakaveyamoene agola fago-koko huya vaiyesae.” huno humaineane.
Anumaya Kotia Yuta veala omainaya vayamogami amaku amamena aligatimaine.
11 Isaleli veamoya Yisasi kea amakaveno hutenayafe vailiya asaga hulaviya agola amakoya faimainao? Aao tamage huya naa ohunae. Yisasi kea amakaveno hutenaya yateti Anumaya Kotia Yuta vea omainaya veamogami amaku amamena aligatisigeya Isaleli veamoya ageteya “Tagaienena tagu tamena alilatisie.” huya age hamaye hugahae. 12 Tamage Isaleli veamoya kefo kava huya yagalaya yafe nagoa ma mopafi veamoya kanale yana alimainae. Isaleli veamoya Yisasi kea amakaveno hutenayafe Yuta veapi omainaya veamoya kanale yana alimainae. Kasagoya Isaleli veamoya eteya Anumayamo kea haviya akave malesayana tusia kanale kanamoa falote humategahie. 13 Nagaifena “Yuta vea omainaya veamogamite Yisasi kea huhaleka hamapaiyo.” huno higena Aposolo kano mainoafe muse nehuna mani aliyana nealua yafe tamakaya Yuta vea omainaya veamogatama tamakaife nehue. 14 Manima nenahaiya aliyanialeti nagainia anagala, Isaleli anaga, nagoa alihetimatesugeya age hamaye hisageno Anumaya Kotia amaku amamena aligatisie huna nehue. 15 Anumaya Kotia Isaleli anagala amanati-taleneafe mukia ma mopafi veafena mage huno humaine “Aigetamatena yuna helamatena nagoke taipa kalisune.” huno humaineanagi Anumaya Kotia eteno Isaleli veanema amavalesiana fali-mainafiti hetiya augafa kava hugahae. 16 Hagoteya talo haya kai hamemo atupaa Anumaya Koti neamiyane mukia tamaaenena Anumaya Koti yane. Nagi yosamo hafuyama Anumaya Koti yama hanesiana mukia yosa akopayagae-nena Anumaya Koti yane. 17 Anumaya Kotia agaia hoyafi hanea Olivi yosamona akopaa aye sasaeneataleno tamakaila Yuta veane omainaya veamogatamina, afai Olivi yosamo akopa kana hutama mainageno tamavaleno fukiteti aye kamaelamateteno nofi kilamategetama mainetama ani yosafiti timaa aitama nenae. 18 Ani yafe tamakaya aye sasaetalenea akopaahena “Afa veane mainagi tagaya tamakaseta ala veane mainone.” hutama hu oamateho. Tamakaya akopamogatama timaa aitama tama yosamona amigeno nonegi hafuyafiti timaa aitama nenae. 19 Tamakaya mage hutama nehae “Tagaya kanale veane mainonafe tagai akopama aye gamae-malesia yafena Isaleli akopala ago aye sasaetalene.” hutama nehae. 20 Tamage Yisasife haviya amakupi omalaya yateti aye sasae-talegetama tamakaya Yisasife havitama tamakupi maletama tamametiti humainayafe aye gamae-malene. Tamakaila naa humaleneafe “Ala veane mainone.” hutama tamaugafa alitama ohaitama koli hutama tamakupi maletama tamametiti humainaya yama atalesayafe tamamayoa aino. 21 Anumaya Kotia agaia Isaleli veamogamina akopa-tafamaa alino asasae-taleneanagino tamakaila ani kavama hisagenoa tamayoa okigahianagino ani kava huno tamakaila alino asasae-talegahie. 22 Ani yafe Anumaya Kotia kayone hulate yamaaene kaiyeke hulateno haviyama anonaa tamisia yamaaene agelama hisune. Agaia kanale auava yamaa neatalaya veala kaiyeke humateno tusiya huno havi yana anonaa amamiyanagi tamakaila kayone hunelamate. Tamakaila kayone hulamateneafe tamametiti hisageno Anumaya Kotia nagoene kayone hulamategahigi naa ohisagenoa tamakaienena ago alino asasae-talegahie. 23 Nagi alinoma asasae-talenea Isaleli veala akopayagamoyama ke nohavia yaamima atalesagenoa Anumaya Kotia eteno alino aigamaematesia tokiyaa hanegeno eteno amavaleno me maleno aigamaemategahie. 24 Tamakaya Yuta veane omainaya veamogatama hagotetama afai Olivi yosafiti falote humainea akopa mainageno Anumaya Kotia vayamoya nohaya kava huno tamavaleno Isaleli veamogami Olivi yosale aigamaelamatene. Tamage mani akopayagamogamina tamaamoya Isaleli veamogamina amavaleno eteno hagote yosaamile maleno aigamaemategahie.
Anumaya Kotia mukia veala kayone yamaa amaveligahe humaine.
25 Mukia nafunaganagatama nagola falaki-mainea kema havilama hutetama aneginagi ohisae huna tamahanepauve. Nago kaiyagaa Isaleli anagamoya “Yisasi kea ohavigahune.” huya tokiya vaimainagi ani kavala agola ohugahagi Anumaya Kotia hapali-malenea Yuta vea omainaya veamogatama mukia Anumaya Kotina tamakua amisageno hiyama hinagenoa Isaleli veamoya eteya Yisasi kea havigahae. Havigu tamakaitamihe “Tagaya mukia ago havitafa huta havilinone.” hutama hisaya yafe mamona falaki-mainea ke tamahanepauve. 26 Anumaya Kotia mukia Isaleli veala amaku amamena aligatigahie. Anumaya Koti autamafina mage huya kae-malenayane
“Yelusalemuti nagola amaku amamema aligatisia kanamoa falote huteno veamogamina kefo auava yaamia alitalegahie.” 27 Anumaya Kotia mage huno humaine “Mani kea amakaiene alina nagokepi alina hagelafi nelamatoe. Mage huna hugahue mukia kefo yatamia alitaletena alina hagelafilamategahue.” huno humaine.
28 Isaleli veamoya Yisasia hulatenea yafena amakaveno hutenayafe Anumaya Kotina kame veaa mainae. Ania humainaya yateti tamakaila Yuta vea omainaya veamogatamina tamaya humainegi nayona Anumaya Kotia amakinagomogamife hamapaimaine. Isaleli veala hapalimateno amakaifena “Nahau nayamopafi nenagea veane mainae.” huno humaine. 29 Tamage Anumaya Kotia hagoteno nagoa veala hapali-maleteno “Kanale ya hulamategahue.” huno huteno haenagaa agu agesa eteno havino aiyahae ohugahie. 30 Hagotetama tamakaya Yuta vea omainaya veamogatama Anumaya Kotina tamakaveno hutenagi menia Isaleli veamoya ania huya Anumaya Koti kea akave omalayafe Anumaya Kotia tamakaila kalagi ailamatene. 31 Tamakaila kalagi ailamatenageya agesayafe menia Isaleli veamoya Anumaya Koti kea akave omalenaleti eteya kalagi ailamategetama alimainaya yana amakaiene aligahae. 32 Anumaya Kotia mukia veamogamina kalagi aimatesiafe hagoteno mukia veala agai kema akave omalaya yateti nofila humatene.
Tagaya Anumaya Koti agia alisaga hisune.
33 Namayo Anumaya Kotia ala agu agesaene kano maineno mukia yana haviline. Veamoya Anumaya Kotia “Naa maa hugahue.” huno hisia agu agesamo aepaamoa afe yapi tavimaineanagiya ohavigahae. 34 Anumaya Koti autamamoa mage huno humaineane
“Hana veamoya Anumayamo agu agesa havilinae? ‘Naa huo.’ huno agu agesa ta Anumaya Kotina amileasine? 35 Tae ‘Nagaya Anumaya Kotina nago yana amisugeno Anumaya Kotia eteno anonaa namigahie?’ huno humaine?”
36 Aao Anumaya Kotia mukia yama talo humalenea kanogino aepaa maine. Mukia yana agaia haumainea yamaage haneanagita tagaya agola mukia kanaaene kanaaene Anumaya Kotina agaiage agi alisaga hisune. Tamage.