1 E Iesu taum ana nuna kakak a asasaer la han mitingia pa la hanot ting na hanua ane Iesu. 2 Ana Pukakiar Sabat i asaer a tarai la ting na rumai lotu, pa a galis a tarai ning la longori la kulkulan kol, pa la kabah mang, “A barsan ne i los pas a tastasmanla ne taha? Esi na ngas a tastasman ning di ka saran tari tana sur ir tol a tatatnan utna na kulkulan? 3 I a tena tol rumai ka, a nat e Maria. Na tastasna otleng, e Jems, e Josep, e Judas pa e Saimon, pa na tastasna hane kanet dala laun taum te.” Pa bel ma la gas ono. 4 E Iesu i atai la mang, “Di hanrawai a propet ting na hanua masik, ma ika la ot ting na hanua ngasna, na mainala pa la ot ting na rumai ngasna bel la hanrawai i.” 5 E Iesu bel i tolsot pas al galis a utna na kulkulan tingia, ika i sua naur a kuna ana dingla na tinsaman, pa i alangolango pas la. 6 Pa e Iesu i kulkulan mang bel la tortorot ono.

Lamur e Iesu i han taltal ting na hanhanuala pa i asaer a taraila. 7 I kabah pas ning a bonot pa pisir naur a kakak a asasaerla, pa i sune naunaur on la, pa i saran tar a rakrakai tan la sur lar kepsen a motla. 8 I atai la mang, “Gong mulo los tar al utna ana numulo na tinan, mulo los ka a bulse. Gong mulo los al utna na hangan, gong ta bek pa gong mulo los tar al mani ting na bak. 9 Mulor han ka ana su ting na ham mulo, pa gong mulo los al kelkeles.” 10 I atai la otleng mange, “Ning mulor kes ting ana ta rumai, mulor kes ot tingia tuk ana pukakiar ning mulor han kusun a hanua ning. 11 Ning ta hanua bel lar gasgas pas mulo, pa bel lar longor anumulo na warwarala, ning mulor han kusun a hanua ning, mulor daplan sen a kubus kusun a ham mulo, lar a akinalang na wetewete tetek la.”

12 Pa la han pa la warawai tetek a taraila sur lar lingir a nuknukinla. 13 La kepsen a galis a mot, la sabar a galis a tinsaman ana wel, pa la alangolango pas la.

14 King Herot i longor a warwara o e Iesu, anasa a tarai la rop la ka tasman e Iesu. Dingla la atongi ono mang, “A barsan ne i ka e Jon a Tena Baptais, ka laun ulak kusun a minat sur i maining i tol a ututnala na kulkulan ne.” 15 Dingla la mang, “Ai e Elaija.” Dingla otleng la atongi ono mang, “E Iesu i ning a propet arlar ana propetla tagun nating.” 16 Ika ning e Herot i longor a ututnala ne o e Iesu, i atongi mange, “Ia ka umsem tar a pukul e Jon, pa ne ka laun ulak kusun a minat!”

17-18 Lanigo e Herot i sune anuna tena harumla pa la tong pas e Jon, la dot pasi pa la akasi ting na rumai dodot, anasa e Jon i usuri o e Herot mang, “Bel i tostos ning u taulai e Herodias, e harimlik.”

E Jon i atongi larne anasa e Herot i dat pas e Herodias, a hane anune Pilip e tasnalik, pa i taulai i. 19 E Herodias i nget e Jon pa i mang sur dir umkoli anasa i warwara on diau ana nundiau a tinaulai. Bel i tolsot pasi sur ir umkoli, 20 anasa e Herot i matatan e Jon, pa i tasmani mang i a wakak a barsan pa a tena tostos. Pa e Herot i tai alar e Jon. I gas sur ir longor anuna na warwara, maika i loklokron a nuknukna ono.

21 E Herot i nuk pas a pukakiar ning di agoni ono, pa i tol a tnan ngasa. Io, e Herodias i nuk pas ning a ngas sur dir umkol e Jon. E Herot i tol a tnan ngasa sur a ningnigola tagun anuna matanitu, pa a ningnigola anuna tena harumla, pa ningnigola mitisa e Galili. 22 Ning la kes ana ngasa, e nat na hane Herodias i kas pa i tortor tan la. E Herot pa a taraila ning la hangan taum ano, la gas kol ono. Pa i atai a basbas ning mange, “Ar tabar u ana ta utna ning ur mang suri tak.” 23 Pa i lele rakrakai tana mange, “Asa kama ning ur nunung iau suri ar sarani tam. Ning ur nunung iau sur ta tuk a matanitu ar sarani ka.” 24 Pa i han tetek e tana pa i dekeni mang, “Asa ning ar nunung suri?” E tana i kelesi mang, “Ur nunungi sur a pukul e Jon a Tena Baptais.” 25 Aiapiapka a basbas ning i kas tektek e King Herot, pa i atai i mange, “Ano otne ur sua a pukul e Jon a Tena Baptais ana ta pelet pa ur tabar iau ono.”

26 A king i nuk lingiri. Ika bel ma i tolsot sur ir ngongoio, anasa ka lele tar mang asa kama ning ir nunung suri, ir sarani ot, pa a tarai ning la kes taum ano ana ngasa, la ka longor tar anuna warwara. 27 I sune kapit ning a tena harum sur ir los tar a pukul e Jon teteki. A tena harum i kas uting na rumai dodot, pa i umsem pas a pukul e Jon. 28 I sua pasi ana pelet pa i losi tetek a basbas ning, pa i sarani ta e tana. 29 Pa ning a kakak a asasaerla ane Jon la longori, la hanot pa la los pas a minatna pa la akasi ting na kulam a minat.

30 Pa a aposella, la atalilis pas e Iesu, pa la atai i ana ututna rop ning la ka tol tari, pa la ka asaer tar a taraila ono. 31 Pa e Iesu i atai la, “Mulo lamut, dalar han sur a hanua bel, sur mulor manah pas.” I atongi larne anasa a galis a tarai la hananot, pa bel ta pukakiar sur e Iesu pa nuna aposella lar hangan ono. 32 Pa la kas ana mon pa la han uting na hanua bel. 33 A galis a tarai ning la oroi pas a mon, la oroi lalan pas e Iesu taum ana nuna kakak a asasaerla. La dun kusun a hanhanuala, pa la nigo ot ting na pukna ning lar sot ono. 34 Ning e Iesu i sot tingia, i oroi a tnan kunum a taraila. I maris kol la, anasa la arlar ana sipsipla ning bel anun la ta tena tai alar. Pa i turpasi sur ir asaer la ana galis a ututnala. 35 Ning ka rah anuna kakak a asasaer la han tekteki, pa la atai i mange, “A hanua bel ka ine, pa ka rah otleng. 36 Ur sune sen a taraila ne sur lar han uting anal hanhanua milau, pa tatatnan hanua otleng sur lar lou pas al utna na hangan sur lar ieni.”

37 E Iesu i keles la mange, “Mulo ot mulor tabar la.” La atai i mang, “Ning milar titol al galis a kalang a mani ning milar kubasi, bel ir tolsot sur dalar lolou tabar la ono.” 38 E Iesu i deken la mang, “Naisa bret kaning mulo losi? Mulor han pa mulor tai.” Ning la ka talapor pas, la atai e Iesu mang, “Dilima na bret pa naur a sis.”

39 Pa e Iesu i sune anuna kakak a asasaerla sur lar atai a taraila, sur lar kes ana taktakai kunum ting na ulai. 40 Pa la kes ana taktakai kunum, dingla na kunum taktakai a mar, pa dingla dildilima na bonot. 41 Pa e Iesu i los pas dilima na bret pa naur a sis, i tadai usaot na langit, i atong wakak tetek e God ono. I kibik pas dilima na bret ning, pa i sarani tana nuna kakak a asasaerla sur lar tabar a taraila ono. I tabar la otleng ana naur a sis. 42 La rop la hangan pa la masur. 43 Pa la song bukus pas ning a bonot pa pisir naur a rat ana mah na bret pa sis. 44 A tarai galis kol, maika a wawas ana barsanla ka i arlar ana dilima na arip.

45 Aiapiap ka e Iesu i sune sen anuna kakak a asasaerla sur lar kas ana mon pa lar nigo utumo e Betsaida ting na ris a puka tasi. Pa i, i kes ot sur ir sune sen a taraila. 46 Ning a tarai la ka han sarara, e Iesu i han usaot na mangir sur ir nunung. 47 Ning ka sirtektek, a mon i han potor a puka tasi, pa e Iesu kama i kes tumokorot latasi. 48 E Iesu i oroi la mang ka tekes la ana ulusu, anasa a kabakup i harum misa lanigo. Ana lar, e Iesu i han saot na palai a puka tasi tetek la. Pa siklik ir han bolos la. 49 Ning la oroi pasi ning i han saot na palai a puka tasi, la nuki mang a mot, pa la kukukuk, 50 anasa la rop la oroi, pa la matmataut kol. Pa e Iesu i warwara kapit tetek la mang, “A balamulo ir talapor. Gong mulo matmataut, iau kane.” 51 Ning e Iesu ka kas tetek la uting na mon, a kabakup i rop kakat. Pa la kulkulan kol, 52 anasa bel la tastasman wakak ana utna na kulkulan ning e Iesu ka tol tari ana dilima na bret pa naur a sis. Anasa bel la mang sur lar kubasi.

53 Ning la ka han bolos, la sot tumo e Genesaret ana ris a puka tasi pa la dot akes tar a mon. 54 Ning la purum kusun a mon, a tarai la oroi lalan kapit pas e Iesu. 55 La dun sur a tinsamanla ting ana hanhanua rop ana papar ning. Pa ning la longori mang e Iesu kaning i kes ting ana ta hanua, la los a tinsamanla ana logola sur a hanua ning. 56 Ana natnatar a hanhanua pa tatatnan hanhanua ning e Iesu i han ia, la aborbor a tinsamanla ting na arpotor a hanua. Pa tinsamanla la nunung e Iesu sur lar tuk tar ka a tuka kaen anunai. La rop ning la tuk tari la langolango.