1 Unu kara iboudiai na Morodekai vada e diba; bena ia ese ena dabua e daredia, puse dabuadia e hahedokilai, bona kahu ai e hebubu tao. Bena hanua bogaragina ela, e tai lolololo, e tai hahane; 2 bena ma ela, ela bona hanua pavapavana ena ikoukou vairanai, badina be puse dabuana e hahedokilaia tauna ta na hanua pavapavana ena ikoukou lalonai basine raka vareai diba. 3 Bona hanua pavapavana ena hahedua herevadia bona ena haheḡani e kau basileiadia iboudiai lalodiai, Iuda taudia na e tai noho tai nohova, e anivagava, e taitaiva, e tai hahane-hahaneva; bona hutuma na puse dabuadia e hahedokilaiva bona kahu ai e hebubu taova, bena e hekure nohova.

4 Eseta ena hesiai kekenidia bona ena hesiai taudia na dekena ema, bona e hamaoroa; bena pavapava hahinena na lalona e hisihisi bada. Ia ese dabua haida e siaidia, Morodekai ese ena puse dabuadia baule doki oho bona unu dabua baine hahedokilai eto; to ia ese se abidia. 5 Bena Eseta ese Hataka, hanua pavapavana ena hesiai tauna ta, hanua pavapavana ese vada e hagania ia isiaina baine lao heni tauna, e boiria, e haḡania, Morodekai dekena bainela, baine diba una kara be dahaka bona anina be dahaka. 6 Bena Hataka na e raka lasi, Morodekai dekena ela, hanua ariarana ai, hanua pavapavana ena ikoukou vairanai. 7 Bena Morodekai ese ienai vada e vara ḡaudia iboudiai e hamaorolaia, bona e hamaoroa danu moni hida Hamana ese vada e gwauraia hamata, hanua pavapavana ena kohu-habou gabuna ai baine atoa, Iuda taudia ihabua-taridia davana. 8 Morodekai ese danu haheḡani pepadia, Susa ai e tore ḡaudia, ta e henia, Eseta baine haheitalaia totona; bona e hamaoroa anina na baine hadibalaia, bona baine noia, ia na hanua pavapavana dekenai baine raka vareai, baine noinoi, ena bese taudia daidiai baine noia.

9 Bena Hataka na ela, Morodekai ena hereva na Eseta e hamaorolaia. 10 Bena Eseta ese Hataka e hereva henia, gwaukau herevana e henia Morodekai ena, eto, 11 Hanua pavapavana ena hesiai taudia bona ena basileia taudia iboudiai na dibadia tau ta eiava hahine ta na laloma maḡuna ai baine raka vareai hanua pavapavana dekenai, se boiria negana ai, taravatuna be tamona: iboudiai na bae karadia heḡereḡere, bae aladia mase mo. Ḡau tamona, hanua pavapavana ese ena dagi auna, gold ḡauna, amo ta baine dudui henia, una tau eiava una hahine na baine mauri. Bona lau na dina toi-ahui asie boirigu, hanua pavapavana dekenai baina raka vareai totona. 12 Bena idia ese Eseta ena hereva na Morodekai e hamaorolaia.

13 Bena Morodekai ese e hamaorodia, ina haere na bae laohaia, Eseta bae henia, baeto: Basioto hanua pavapavana ena ruma ai oi na ba roho maun, a Iuda taumai iboumai ai baia mase. 14 Badina be nega inihetomana ai udumu boma hakapua, hekaha bona hahemauri na idau kaha amo bae hedinarai Iuda taudia edia, a oi bona tamamu ena iduhu taudia na ba mase. Daika dibana, oi na reana nega inihetomana bagunai dagi vada o abia ina basileia lalonai.

15 Bena Eseta ese e hamaorodia, Morodekai na bae haere henia, baeto: 16 Aola, Iuda taudia iboudiai Susa ai ba davandia na ba haboudia, lau daigu ai bavanivaga; dina toi hanuaboi toi basio aniani bona ranu basio inua. Lau bona egu hesiai kekenidia danu baia anivaga, umui heḡereḡeremui. Una murinai, ena be vada e taravatua to hanua pavapavana dekenai baina raka vareai; bama mase be vada baina mase.

17 Bena Morodekai na e raka oho, ḡau iboudiai e kara, Eseta ese e haḡania heḡereḡerena.