Ujuni
Uţup ujuni
Ulibra uŧeek wi Uţup wi Naşibaţi katim ki wa kawo « Ujuni » ţiki uji uţiiniyaan ujuni wi umundu, na iko bŧi inwooŋ abot aţiiniyaan pntaali pi Iŧrayel panwooŋ pi Naşibaţi. Kafah 1 te 11: Hum di ñaaŋ akdooŋ kadoo kame umundu wi ŋwooŋ wi? In awooŋ ñaaŋ? We uwooŋ ulempul këme we ukaaŋ kë abi ţi umundu? We ukaaŋ kë bañaaŋ baji baban ţuŋ kawo ţi pŋom na bkujar na ugut? We uhinanuŋ kapënan uko mënţ? Iko mënţ yi yi kafah kaŧeek ki ulibra ujuni wi kakdooŋ na pŧeem. Ñiinţ na Ñaaţ jibi baţakadiiri (1-2); pgar pi bagaruŋ na Naşibaţi (3); Kayin na Abel (4) Nowe ţi wal wi uşubal uweek (6-9); Katoh kaweek ki ŋşoobra ki Babel (11). Iko impiiŧuŋ ţi, ñaaŋ aanhil kaţup bnuura wal wi iţëpuŋ na manjoonan jibi bañaaŋ bajën bajaaŋ bado hënkuŋ. Ifah 12 te 50 ikakalëş jibi Naşibaţi akţijuŋ umundu mbuur wi aduuŋ bantohi baŧeek biki Iŧrayel bado kalempara : Abraham (12.1–25.18), anwooŋ ñaaŋ anfiyaaruŋ bnuura abot aji ţaş Naşibaţi awo i bañaaŋ bado katen ţi a. Iŧaak awooŋ abukul. Ababul Yakob (25.19–36.43) i i babiiŋ aţu katim ki Iŧrayel. Yoŧef (37.1–50.26) anwooŋ aloŋ ţi babuk Yakob, abiiŋ ado kë Yakob na babukul bandukiiŋ na babuk baka bŧi kë baya afëţ du Ejiptu. Ulibra ujuni uwo duna pjukan ţi uko wi Naşibaţi adoluŋ. Ujunna aţup kë Naşibaţi apaşuŋ umundu, kë uko mënţ ukdiiman mndëm mi wa, kë umundu bŧi uşë wo ţi iñen yi Naşibaţi, ul akşihuŋ wa. Ulibra ubaana ţi kahoŋ ki Naşibaţi ahoŋuŋ aji ado katen pntaali pi nul. Du ujuni te uba ulibra wi, Naşibaţi awooŋ i bakţiiniyaanuŋ: Ado kë bañaaŋ bame a, aji wayëş, aji ţoŋ kabot kaţënk pntaali pi nul, aji boman iko bŧi yi pntaali pi nul. Kë aşë ji ŋal bañaaŋ bafiyaara bakuţ bafiyaar kahoŋ ki ahoŋuŋ, bado kaţaş uko wi aţuuŋ pdo na bgah bi nul. Ulibra wi ujej idolade yi unjon yi Iŧrayel kadolna bañaaŋ bayikrën bnuura hum di pntaali mënţ pabiiŋ awo ţi pfiyaar, jibi padoluŋ kë pfiyaar mënţ paliinŧ abot ajoonan.
1
Upaşa umundu
1 Du ujuni Naşibaţi apaş baţi na mboş.
2 Kë mboş manşë wo mnjinţ kë nin ukoolan uunwo ţi ma, bdëm bawun bnjiir, kë uyook umpënnuŋ du Naşibaţi uşë fuuţ ţi meel duuţ.
3 Naşibaţi aji wal mënţ: « Bjeehi bawoon » kë bjeehi bawoo. 4 Naşibaţi awin kë bjeehi banuuraa, aşë paţëş bjeehi na bdëm. 5 Naşibaţi adu bjeehi aji « unuur » adu bdëm « uŧejan. » Utaakal uwoo, nfa kë mankuţ awo : unuur mënţ uwooŋ uŧeek.
6 Kë Naşibaţi aşë ji : « Uko uloŋ unnaamuŋ ji kanjan uwoon ţi pŧoof pi meel, upaţëşaan ma » kë uwo haŋ. 7 Naşibaţi ado uko mënţ kë upaţëş meel, kë mloŋ manwo ţi uţeeh kë mnloŋ manwo du bko duuţ. 8 Naşibaţi adu uko mënţ aji « baţi. » Utaakal uwoo, nfa kë mankuţ awo : unuur mënţ uwooŋ utëbanţën.
9 Kë Naşibaţi aşë ji : « Meel manwoon ţi baţi uţeeh manţonkandërën ţi dko dloolan, pkay pakuţ papën pawinana » kë uwo haŋ. 10 Naşibaţi adu dko dkay aji « mboş » aşë du dko di meel « bdëk. » Naşibaţi awin kë uko mënţ unuura. 11 Naşibaţi aji : « Mboş mambukan ujaagal, ugof bŧi na mnko bŧi. Uko undoli uko wi ukdooŋ kabuk udo kawo na uhiib këme mbuk » kë uwo haŋ. 12 Mboş kë mambuk ujaagal, ugof bŧi na mnko bŧi. Ujaagal unwooŋ, uji uwo na kanaamare ki wa, bgof banwooŋ baji bawo na kanaamare ki ba, bko bandooŋ kawo na kanaamare ki ba ; uko undoli uji uwo na mbuk këme uhiib. Naşibaţi awin kë uko mënţ unuura. 13 Utaakal uwoo, nfa kë mankuţ awo : unuur mënţ uwooŋ uwajanţën.
14 Naşibaţi kë aşë ji : « Iko iloŋ inkdooŋ kajeehan iwoon du baţi duuţ ipaţëşaan unuur na uŧejan! Idoon kadiiman wal wi ŋfeŧtu, ŋnuur, na ŋşubal ; 15 iwoon du baţi duuţ ido kajeehan mboş! » kë uwo haŋ. 16 Naşibaţi ado iko itëb iweek injaaŋ ijeehan, uweek uji upën kaşih na nfa te utaakal, umpoţi kapën kaşih na uŧejan. Ado kak ŋjah. 17 Naşibaţi aţu ya du baţi duuţ ido kajeehan mboş, 18 ido kaşih pnak na uŧejan, ipaţëşaan bjeehi na bdëm. Naşibaţi awin kë uko mënţ uwo unuura. 19 Utaakal uwoo, nfa kë mankuţ awo : unuur mënţ uwooŋ ubaakanţën.
20 Kë Naşibaţi aşë ji : « Meel manŧum ŋko, ŋkaŧ ŋabot ŋado kayiţ du baţi, ţi mboş duuţ! » 21 Naşibaţi apaş ŋko ŋweek ŋyibanaan ŋi bdëk na ŋko ŋanwooŋ ţi meel bŧi kë ŋaŧum maakan, akak apaş ŋkaŧ bŧi. Naşibaţi awin kë uko mënţ uwo unuura. 22 Naşibaţi awul ŋa bnuura aji : « An ŋko ŋi meel, kabuk kajoobëţ na an, nabuk maakan naŧuman meel mi idëk. Kë an ŋkaŧ, nabukan naŧuman mboş! » 23 Utaakal uwoo, nfa kë mankuţ awo : unuur mënţ uwooŋ uñeenanţën.
24 Naşibaţi aji : « Mboş manwulan ŋko bŧi : Ŋnŧaam ŋi katoh, ŋko ŋmpoţi na ŋko ŋi uţeeh bŧi » kë uwo haŋ. 25 Naşibaţi ado ŋko ŋi uţeeh bŧi, ŋnŧaam ŋi katoh bŧi na ŋko ŋmpoţi bŧi. Naşibaţi awin kë uko mënţ unuura.
26 Naşibaţi aji : « Nawulan ŋdo ñaaŋ anaamun, awo ji un, aşih ŋţëb ŋi bdëk, ŋkaŧ ŋi baţi, ŋnŧaam ŋi katoh, na ŋko bŧi ŋanjaaŋ ŋapula ţi mboş. »
27 Naşibaţi apaş bañaaŋ kë banaam na a :
bapaşana anaam na Naşibaţi,
apaş baka kë bawo ñiinţ na ñaaţ.
28 Naşibaţi awul baka bnuura aji : « Kabuk kajoobëţ na an, nabukan maakan, naŧuman mboş nabot naşih ma. Naşihan ŋţëb ŋi bdëk, ŋkaŧ ŋi baţi na ŋko bŧi ŋanwooŋ ţi mboş. » 29 Naşibaţi aji : « Natenan, dwulan ujaagal unwooŋ na mbuk na uko wi ugof na mnko bŧi manjaaŋ mambuk nado kade. 30 Dwul kak iko mënţ ŋko bŧi ŋanwooŋ na uhefënţ: ŋnko bŧi ŋanwooŋ ţi mboş, ŋkaŧ bŧi ŋi baţi na ŋko bŧi ŋankmpuliiŋ ţi mboş. Dwul ya ŋa ŋado kade » kë uwo haŋ. 31 Naşibaţi aten uko bŧi wi adoluŋ aşë win kë uwo unuura. Utaakal uwoo, nfa kë mankuţ awo : unuur mënţ uwooŋ upaajanţën.