1 No ʒiŋuc ine jâmbomac mupie manaekopac: Ŋoŋerao mamakâc hâhâwicne, qâpuc jaŋerao mi fufuane, iŋucne fuawec fokac. Ŋic moczi mamac-ticnere ŋonâŋhec juekac, irec mukopac. 2 Eme ŋoŋe wemocte wiac iŋucne fuarâ fohame pepecne eeŋgopieŋ? Ŋoŋe busâqoc manahuc ŋic wiac ewec e behenʒapiŋ me¡ 3 No sahac-nanezi wiwicko juhuc maŋnanezi iqic-ŋoparâ ŋic wiac ewec ere dâŋ ŋondeŋ-ŋeŋicko juhuc tinac kecʒiŋuc mutarapo: 4 Ŋoŋe Wofuŋ Jesu ere ʒâŋeo tumaŋnehapie no ere tâpirio ŋesiŋnehuc maŋnanezi iqic-ŋopape 5 ŋic e Sataŋ qikiŋnecnepene maŋ sahac raŋɋa-ticne sipirickezejec, eme Wofuŋ Jesure dameŋ maickeme mâro-ticnezi aakic bâfuazejec.

6 Wiac iŋucne foipiehame sahac-ŋeŋic bafeeŋgopieŋte manape sâqorekac. Bec hâhâtâne i wiac piticnezi fârine ruacneme rikepie isirickeme hâtâne efâreocmu, i mi manaeŋgopieŋ me? 7 Irec hâhâtâne wosâerâ behepie rahame fârine nocne enʒepieŋ. Ŋoŋe hâhâtâ-ŋeŋic ŋowac rofârekicne. Nâŋâcne aakic lama okac-nâŋec qakicne wâc, Kristo hâcne. 8 Irec hombaŋ-ticne ŋenaŋte wiac hâhâtâne behenʒepeneŋ. Mamakâc â sindaŋ irec hâhâtâne qikiŋnerâ wiac ɋaɋacne â tiŋne irec fârine nocne bajuhuc hombaŋ-ticne ŋezo.

9 No mârâc papia moc ʒiŋuc qâreŋke-ŋarepo: “Ŋoŋe sasecŋic jaŋehec wiac nâ nareŋ gareŋ â iiqic mi enʒepieŋ”, 10 i ŋic qâpuczi sasecŋic me bâkiri bapa â fiuc serereŋhec me bawe qaŋgec wiac babaju jueŋgopieŋ jaŋere mi mupo. Jaŋe mâreŋ behehuc behec-jopazo i sawa fokac. 11 No kecʒiŋucte qâreŋke-ŋarepo: Miti mamana âgo-ŋeŋic moczi sasecko sâqoreocmu me bâkiri baocmu, me bawe qaŋgec wiac bajuocmu, me fiuc serereŋ eocmu, ŋic iŋucne behehuc ehec nâ nareŋ gareŋ moc mi enʒepieŋ. 12 No ŋic râpene jueŋgopieŋ jaŋere dâŋ mumure wemocko qâreŋkezapo. ŋaŋacne ŋondeŋko miti mamana jaŋere bahacdâŋ mupie sâckeocmu. 13 Á râpene jueŋgopieŋ jaŋere bahacdâŋ i Anutuzi muocmu. Sâqocne bapa e behepie ŋondeŋ-ŋeŋicko mi juzejec.