16
Jerusalem haeonec jaŋere moneŋ bâfuaniŋte jazawec
1 Mitiŋic jaŋere moneŋ râezo murâ ine Galatia mâreŋkonec kikefuŋ guru jaza mutâc epo ijaha enʒepieŋ. 2 Ŋoŋe moneŋ hotâckekicne irec sâc manahuc Sondane Sondane tucne bâtâc barâ buc buc râe guruc ehuc junʒepieŋ, mâc juhapie fâ fisipe moneŋ qânusuckeniŋte âecke guruc enʒipiŋte. 3 Ŋoŋerao fâpe ŋic mucjopaniŋmu jaŋe papia jarehuc sorec-jopape bubiaŋte wiac-ŋeŋic Jerusalem haeo baranʒepieŋ. 4 Me moneŋ bocjaha eme nohec mâmâc ranʒepeneŋ.
Paulo e jaŋerao raocte ʒâfo bajarewec
5 No Makedonia mâreŋ fotâcne-fârerâ ŋoŋerao fâpemu, Makedonia mâreŋko boc mi jupemu, i mâc fotâcnepemu. 6 Ŋoŋerao fârâ piticne jupemu, me jufehape hoemaŋ taraocmu mecne. Eme ŋoŋe hatare baficnupie ira me ira razepac. 7 No dameŋ ʒiŋuczia mâc fofotâc fâhuc honec-ŋopape mi sâckeocmu, irec Wofuŋzi manaha ŋoŋerao fârâ piticne jupemurâ mukopac. 8 No ʒi Efeso haeo juhape Mâro Hombaŋ maickeocmu. 9 Ʒira Wofuŋzi mitire hata bâʒâweme gie sâko-nane fuakac. Erâ mitire kisâ bocjaha juŋgopieŋ wâc.
10 Timoteozi ŋoŋerao fâme âgo ecnepie hâwic sahac mi juzejec. E no Wofuŋte gie baekopac iŋuc jaha baekac. 11 Irec ere manapie wawahane mi ezejec. Erâ aimuŋ ecnerâ bârisiepie norao mocwâc warezejec; no â opâ ruac gâcne woŋec-ticne juŋgopeneŋ.
12 Âgo-nâŋec Apolo e opâ ruac gâcne jaŋehec ŋoŋerao fâocte âzâcne sorec epe sâcne mi afeckekac; e ʒiŋuczia mâcne, dameŋ mocte maname sâckeme ŋoŋerao fâocmu.
Miti gie bapaŋic sâsec-jopazo
13 Ŋoŋe rucjaric-ŋeŋic bahuc mamanasiŋko qiŋ henʒepieŋ, ehuc hâbi-ŋeŋic rorâ sanaŋkenʒepieŋ. 14 Erâ wiac sasawa maŋjauŋhec enʒepieŋ. 15 Erâ âgofâc-nane, dâŋ moc ŋazape mananiŋ: Ŋoŋe Stefana â wiacfâc-ticne jaŋere manaeŋgopieŋ, jaŋe Akaia mâreŋko micne barâ miti manambiŋ, erâ mitiŋic ŋoŋerao kiŋaŋ qaqa gie baeŋgopieŋ. 16 Irec ŋoŋe jaŋe mecne â gâcne miti gie bahuc ʒâic manaeŋgopieŋ honec-jopapie micnefâc-ŋeŋic enʒepieŋ. 17 Stefana â Fotunato â Akaiko jaŋe norao fisipie bunane biaŋkewec. Jaŋe ŋoŋere âkehoc dâŋjauŋ enarembiŋ. 18 Ehuc no â ŋoŋe mâmâc maŋuruc qanârembiŋ. Ŋoŋe ŋic iŋucne jaŋere manapie biaŋkezejec.
19 Asia mâreŋ masunao kikefuŋ guru jaŋe ŋoŋere mamanac juŋgopieŋ. Aqila â Prisika â ficjekicko mitire tumaŋneeŋgopieŋ jaŋe Wofuŋte erâ mu ʒeri boc eŋareeŋgopieŋ. 20 Opâ ruac mâmâc sasawa mu ʒeri eŋare-fâreŋgopieŋ. Ŋoŋe ŋaŋac mitio meo babac enʒepieŋ. 21 Ʒi Paulo no nahac mu ʒeri eŋarehuc ʒâŋe qâreŋ-nane râekopac. 22 Moc e Wofuŋte takickeme hârâcte biŋe ezejec. Wofuŋ-nâŋec go warezemec. 23 Wofuŋ Jesure aki anonoczi ŋoŋerao fozejec. 24 Maŋjauŋ-nanezi Kristo Jesure erâ ŋoŋerao fofârekac.