TIMOTEO I
Timoteo e Lisitera haeo fuawec. Mimi-ticne â neŋgoc-ticne jahe Juda ŋokac. Neŋgoc-ticne e Miti Opâ ruacnekicne (Aposolo 16:1-13) mamac-ticne ine ŋic qâpuc (Timoteo II 1:5). Timoteo e ɋieonecteaŋ miti manahuc juku sokawec (Timoteo II 3:15). Paulo e miti kiŋaŋ ʒâʒâŋiŋ raku Lisitera haeo fisirâ Timoteo motec bawec. Eme izia Paulo bâjâpehuc juwec sanaŋ. Ehuc miti giere bafickewec â kiŋaŋ rac warec ehuc juwec. Paulo e fuŋne-ticne Filipi 2:19-22 ira qâreŋkewec. Juku Timoteo soreme Efeso haeo miti mamana guru hone soŋaŋ â hume keteŋ ejarewec. E jahac ine Makedonia mâreŋko juhuc papia qâreŋkecnewec (gaŋ 1:3). Timoteo e Paulozi hâmohame Efeso haeoa juwec.
Efeso haeo ŋic tucnezi miti qâsuahuc dâŋ hehesicne mupie haŋ bawec. Jaŋe qâpucdâŋ â Judaŋic jaŋere dâŋ â mitidâŋ i mâmâc bâturepie sisifucne ewec. Eme Timoteo e dâŋ i hehâmoocte Paulozi bufac qacnewec (gaŋ 1). Erâ tutumaŋ-jeŋicko gae nunumure â miti mumure dâŋ mutâcnecnewec (gaŋ 2). Erâ mitire micne bapa â babafic juju bapa-jeŋicte dâŋ ʒuhuckewec (gaŋ 3). Erâ Timoteo e jahacne juju bapare mâmâc qâreŋkewec (gaŋ 4). Ʒâhec ine hozec jaŋere dâŋ â soŋaŋ kiŋaŋ qaqa jaŋere dâŋ mutâcnecnewec (gaŋ 5 â 6:1-2) erâ ŋic hehesicne jaŋere fuŋne rituwec (gaŋ 6:3-10), â Timoteo e sâmbâŋ boreŋte fotarieocte bufac qacnewec wâc (gaŋ 6:11-21).
1
Jambuŋdâŋ
1 Paulo no Anutu bâbâpiaŋ-nâŋecte micte â Kristo Jesu mamanac-nâŋecte micte Kristo Jesure aposolo juekopaczi 2 mitio motec jâmbâŋ-nane Timoteo go papia ʒi qâreŋke-garekopac. Anutu Mamac â Wofuŋ-nâŋec Kristo Jesu eraonec aki anonoc â uruc jauŋ â wama gorao fotâcnerâ fozejec.
Mitire numusifuc irec dâŋ
3 No Makedonia mâreŋko razo ehuc gazapo iŋuc ezemec, ehuc Efeso haeo ʒuhuckerâ juhuc, ŋic tucnezi miti musifuckeeŋgopieŋ jaŋe qatara-jaretec behenʒepieŋ. 4 Jaŋe nemu binaŋ bahuc ŋic gaŋne gaŋne juwefumbiŋ irec fuŋne qapie raʒic wefuc eme mu qaqataranehec fuaekac. Iŋuc epie Anutu manasiŋkehuc kiŋaŋ qaqacne i wahame sâqoreekac. 5 Miti mumure fârine ine ʒiŋuc fuame sâckeocmu: Maŋtaniŋ â maŋʒuruc â maŋ mamanasiŋhec juhuc maŋjauŋ bâfuazo. 6 Ŋic tucnezi ine miti hata i qâsorierâ dâŋ jawane fârimâc bâfuambiŋ bajuŋgopieŋ. 7 Erâ jaŋacnere ʒiŋuc mueŋgopieŋ: Nâŋe Mosere sâcmutâc dâŋ irec qaqazu, iŋuc murâ dâŋ kosa muhuc irec sasanaŋ bâfuaeŋgopieŋ.
Sâcmutâc dâŋ i ŋic hehesicne jaŋere mukicne
8 Nâŋâc sâcmutâc dâŋte ʒiŋuc manaeŋgopeneŋ: I dâŋ biaŋne, erâ fuŋneticne mana-hâmohuc bajuzo. 9 Fuŋne-ticne ine ʒiŋuc fokac: Sâcmutâc dâŋ i ŋic bahacmâc jaŋere biŋe mi ekac, ŋic sindaŋne, râŋgeŋne, araŋ bapa tâmiric, sâqocne bapa, maŋwânâŋhec, ʒaubacne, neŋgoc mamac sisipiric, ʒika qaqa, 10 boe sau ŋic, ŋiczia ŋicko sasec gie bapa, ŋic ŋokac fiuc rocjoparâ gâcne qikiŋne-jarehuc moneŋ bâbâfua, burecŋic, Wofuŋte ʒâŋe muhuc burecko mumupaŋ ee, erâ wiac gâcne moc dâŋ fari biaŋ râsi ecneekac, wiac iŋucne eeŋgopieŋ jaŋere hâcne sâcmutâc dâŋ mukicne. 11 Anutu juju aŋac rune ere Biŋebiaŋ eri tatamacnehec tahacnukicne izi hâcne iŋuc mufuakac.
Jesuzi Paulo kiŋticne behehuc miti gie mucnewec
12 Tâpiri narehuc basanaŋnuwec Wofuŋ-nâŋec Kristo Jesu e daŋge âzâcneekopac. Eki mana-nareme sâckeme betoŋnuhuc miti gie munarewec hâcne. 13 Juwicnao e musoriŋkehuc ŋicfâcne râsi ejarerâ jopa qâʒâic ejarehape sifu iŋuc enarewec. No Wofuŋte fuŋne kâuc bahuc mamanasiŋ-nane tâmiricte iŋuc epore akicnuwec. 14 Eme Wofuŋ-nâŋecte aki anonoczi norao qaja fuseme Kristo Jesuraonec mamanasiŋ â maŋjauŋhec epo. 15 Jesu Kristo e sâqocne bapa bâpiaŋ-nâpoocte mâreŋko wahawec, dâŋ i fârine jâmbâŋ â mâmâc sâko ro maŋ eenere sâc. Sâqocne bapa jaŋere micne no hâcne. 16 Eme Jesu Kristo e akicnurâ, uruc jauŋ-ticne ŋemâcne fokac, irec fuŋne norao furu jaha bataniŋkewec i mâc mâcne, ŋic ʒâhec mâsi i hâcne norao honerâ e manasiŋkerâ juju sanaŋko fisiniŋte iŋuc enarewec. 17 Juju sanaŋte Wofuŋ Sâko, mi hâhâmone â mi hohonene, Anutu sâko mocjaha hâcne, ere ʒâŋe biŋe â eri tatamac foraʒihuc juzejec sanaŋ. Jâmbomac.
Mitire momori gie bazo
18 Motec-nane Timoteo, qanaŋ gore findaŋdâŋ fuawec irec sâcko dâŋ mutâcne-garekicne i hâcne râe-garekopac. Go i bajuhuc momori gie biaŋ sanaŋkerâ bazemec. 19 Erâ mamanasiŋge foʒakierâ fohame maŋge soŋaŋketec ɋaɋacnea fozejec. Ŋic tucnezi maŋɋaɋac juju râpeckembiŋte mamanasiŋ-jeŋic ŋeŋgoroŋkeme qâsoriembiŋ. 20 Jaŋeraonec moc Himenaio â moc Alesande, eme jahe Sataŋzi bâʒâic-jofakume mumusoriŋ-jekic behenicte erao râec-jofapo.