1 Moc e mitire micne bapa juocte muocmu, e gie furi sâkore ecnekac muzo, dâŋ i jâmbomac. 2 Eme mitire micne bapazi bahacmâc juhuc ŋokac mocjahahec juzejec, erâ maŋsowa juzejec, eesifuc tâmiric metâne juzejec, jauŋhec juzejec, qaqazu gie basarickehuc bapane, 3 waiŋ opâ âmbâŋ mi nâzejec, ʒikafac aricne, urucne â wamane juzejec, moneŋ mafare mubâre mi ezejec, 4 e jahacne wiacfâc sâcne soŋaŋ-jopazejec erâ pectâc juhuc naru motecfâcne mu bâtiŋ ejareme micrereŋhec junʒepieŋ. 5 Moc e wiacfâc-ticne sâcne mi soŋaŋ-jopaocmu, e wemocko Anuture kikefuŋ mamac ejareocmu. 6 Erâ opâ ruac ɋâricne moczi mitire micne bapa mi juzejec, iŋucnezi penaroŋ eme Sataŋzi doc bazacte. 7 Ŋic ŋokac kikefuŋko mi raʒimbiŋ jaŋe wâc manacnepie sâckeekac ŋic iŋucnezi mitire micne juzejec, jaŋe musoriŋkepie Sataŋzi maŋne bâsifuckeme ere bitiŋko kizacte.

8 Babafic jaŋe iŋuc jaha ŋic metâne junʒepieŋ, nameŋ sosohoc mi junʒepieŋ, waiŋ opâ nâ âmbâŋ mi enʒepieŋ, moneŋ mafare mubâre mi enʒepieŋ. 9 Miti boreŋ soŋsoŋ fowarehuc juwec i maŋɋaɋacko duckepie fozejec. 10 Jaŋe wâc qanaŋ ba esâic ejarezo; eme fuŋne-jeŋic hone manac epie sâckeme gie jarezo. 11 Ŋonâŋfâc-jeŋic jaŋe iŋuc jaha metâne junʒepieŋ, gupe micko âkec mi enʒepieŋ, maŋsowa juhuc wiac sasawa mu bac epie fâri fideteŋ efârezejec. 12 Babafic moc e ŋokac mocjahahec juzejec. Naru motecfâc-ticne â wiacfâc-ticne sâcne soŋaŋ-jopazejec. 13 Eme babafic moc e gie-ticne bame biaŋkeme maŋte juju ʒae biaŋne bâfuaocmu â Kristo Jesurao qohotahuc giere afecke-hâmoocmu.

14 No gorao biac fâpemurâ manasuhuc sifu kecʒiŋucte dâŋ ʒi qâreŋke-garekopac: 15 Wiac moczi niŋgiŋnume jupe ʒorame Anuture ficko ju bac ezore fuŋne kâuc bazic. Anutu jujune ere kikefuŋfâc jaŋe hâcne ficticne erâ wâc dâŋ fâri qizecnere gumi â hobeteŋne juŋgopieŋ. 16 Miti-nâŋecte fuŋne qame hukicne mutaniŋkeeŋgopeneŋ i qeŋ bipinehec: