6
Paulo e Anuture ŋic juhuc wiac bocjaha erahuc fuŋne-ticne bataniŋkewec
1 Anuture babaficfâc nâŋe mu âkesiŋ eŋarehuc ʒiŋuc ŋazaeŋgopeneŋ: “Anuture aki anonoc tahac-ŋopakicne i fârimâc mi ezejec.” 2 Dâŋ ʒiŋuc hâcne fokac:
“No dameŋ biaŋko mana-garepo
â bâbâpiaŋ dameŋko baficgupo.”
Manaŋgopieŋ, dameŋ biaŋ jâmbâŋ ʒine hâcne, â bâbâpiaŋ dameŋ iŋuc jaha ʒine hâcne. 3 Nâŋe ŋic jaŋe gie bapa-nâŋec surenʒipiŋte gâŋ ŋezic mi ejareeŋgopeneŋ. 4 Nâŋe Anuture gieŋic jueŋgopeneŋ irec fuŋne bataniŋkehuc wiac ʒiŋuc eraeŋgopeneŋ: Ʒâicmaŋko maŋuruc jueŋgopeneŋ, ʒârâ hâriŋ faio jueŋgopeneŋ, fific guguriŋ faio jueŋgopeneŋ, hâhâwic maŋko jueŋgopeneŋ, 5 ʒika faio jueŋgopeneŋ, kâpâcwâru ficko ŋeeŋgopeneŋ, râsi ŋondeŋko jueŋgopeneŋ, giere ʒâic manaeŋgopeneŋ, guŋɋâri jueŋgopeneŋ, nânâ tâmiricko jueŋgopeneŋ, 6 bahac fâsâc jueŋgopeneŋ, mamana tarahec jueŋgopeneŋ, bumâteŋ jueŋgopeneŋ, âgo jauŋ ejareeŋgopeneŋ, Tiri Mârohec jueŋgopeneŋ, maŋjauŋ fârihec jueŋgopeneŋ, 7 dâŋ fâri qizecne mueŋgopeneŋ, Anuture tâpirio jueŋgopeneŋ, mitire sându marohec jueŋgopeneŋ, 8 mumumbiaŋ â mimi qaqa ŋoŋondeŋko jueŋgopeneŋ, mu bâsâoc â mufec muriŋ ŋoŋondeŋko jueŋgopeneŋ, burecŋic munârehapie siocmâc jueŋgopeneŋ, 9 fuŋne-nâŋec basahapie biŋe rarahec jueŋgopeneŋ, hâmozo eeŋgopeneŋzi sifu ɋâricne jueŋgopeneŋ, nâpo sipiric ekicnezi sifu mi omaeeŋgopeneŋ, 10 busâqoc enârekicnezi sifu bubiaŋko jueŋgopeneŋ. hapetaczi sifu ŋic bocjaha bâmec bajareeŋgopeneŋ, wiac babasanezi sifu mâriri sâkohec jueŋgopeneŋ.
Paulo e Korinti ŋic jaŋere maŋne kâcɋene domawec
11 O Korinti ŋicbureŋ, maŋnâŋec ŋoŋerea kâcɋene domame micnâŋec afeckekac hâcne. 12 Maŋzi sanaŋnea ʒâfic-ŋopaŋgopeneŋ, ŋoŋere maŋjauŋ ine afecne mac fokac. 13 Eme no naru motecfâc-nane ŋoŋe ŋazape: Ŋoŋe okacne bazuhuc iŋuc jaha maŋŋeŋic nâŋere râepie kâcɋenea domazejec.
Sâqocne â biaŋne jahe ââgo mi enicmu
14 Ŋic qâpuc jaŋe jâcjeŋic reŋkepie ŋoŋe mi bafic-jopanʒepieŋ. Tiŋne â hehesic jahe wemocko ââgo enicmu? Me tatamac â dapâc jahe wemocko ʒâʒâfic enicmu? 15 Me Kristo â râsi qizec-ticne jahe wemocko maŋ mocjaha enicmu? Me opâ ruac â qâpuc jaŋe wemocko qâfâsâeniŋmu? 16 Me Anuture ufuŋ â nemuɋâŋ jahe wemocko ʒuʒuhuc enicmu? Manaŋgopieŋ, Anutu jujunere ufuŋ i nâŋâc. Anutuzi ʒiŋuc hâcne muwec:
“No ŋondeŋ-jeŋicko ŋeŋe juju epemu,
ehuc Anutu-jeŋic ehape
jaŋe ŋicfâc-nane junʒepieŋ.
17 Irec qâpuc behec-joparâ
bâtâcko junʒepieŋ, Wofuŋzi iŋuc mukac.
Erâ wiac mamakâcne ba bâuac mi enʒepieŋ,
eme noni hezu hewâneŋ eŋarepemu.
18 Erâ mamac eŋarehape
naru motecfâc-nane erâ junʒepieŋ.
Wofuŋ bapa-fâre e dâŋ iŋuc mukac.”