1 Âgo bureŋ, Makedonia mâreŋkonec kikefuŋ jaŋerao Anuture jauŋ fuawec irec ŋazanaŋ. 2 Jaŋe ʒârâ hâriŋ sâkoo juhuc bahac qahameŋ erâ tac qararacne jueŋgopieŋ, ehame sifu mitire ʒeri fekicne fojareekacte bubiaŋ wiac ɋâfoŋne bâmockembiŋ. 3 No jaŋere mana-jâmbâŋkekopac, jaŋe jaŋacne maŋte afeckerâ tâpiri-jeŋicte sâc, erâ wâc sâc i jâuruhuc râembiŋ. 4 Nâŋe mi ejarehapene jaŋe jaŋac hota-nârehuc mitiŋic jaŋere bubiaŋ wiac bâfuarâ bafic-nâponiŋte mumbiŋ. 5 Erâ wiac afecne eniŋmu muhapene ʒiŋuc embiŋ: Qanaŋ maŋjeŋic Wofuŋ qikiŋnecnerâ nâŋe mâmâc Anuture erâ qikiŋne-nârembiŋ.

6 Jaŋe iŋuc embiŋte Titozi ŋoŋerao bubiaŋ gie barâ tofane râewec i bataraocte mucneŋgopeneŋ. 7 Eme mamanasiŋ â miti mumu â miti fuŋne mamana tara â giere ʒoɋac â maŋjauŋ eenare, wiac iŋucnere fârine bocjaha bâfuambiŋte bubiaŋ gie mukicne irec iŋuc jaha afeckenʒepieŋ. 8 No hotâ-ŋarehuc mi mukopac, miti mamana gâcne jaŋerao aafec fuawec, eme ŋoŋere maŋjauŋ sâc weniŋucne fokac irec fuŋne taniŋkeocte mukopac. 9 Ŋoŋe Wofuŋ-nâŋec Jesu Kristo uruc jauŋ-ticnere manaeŋgopieŋ, e mâriri sâkoheczi ŋoŋere erâ hapetac ewec, i ŋoŋe hapetac-ticnere erâ mâririhec eniŋte iŋuc hâcne ewec. 10 Eme ʒi dâŋ mâc ŋazakopac i reŋkepie fârinehec ezejec. Ŋoŋe hâcne jara raŋɋanao biac moneŋ bâtureniŋte afeckerâ fuŋkembiŋ. 11 Eme i ʒuhuckerâ etarapie aafec-ŋeŋicte fârine, wiac foŋarekac sâc fuazejec. 12 Wiac buafecte rârâe irec mamana biaŋ fuaocmu, rârâe ine moc e focnekac irec sâc râezejec, mi focnekac irec sâc mâcne. 13 Bubiaŋte wiac rârâere mukicne i jaŋe sahac mâteŋ juhapie ŋoŋe ʒocne ʒâicne mananiŋte mâcne, 14 ŋoŋere mafa mâririzi dameŋ ʒiŋuczia jaŋere roroc jâpeme wiac sâckoa fuaocte mukicne, eme juku dameŋ mocko jaŋere mâririzi ŋoŋere roroc jâpeme iŋuc jaha sâckoa fua-ŋarezejec. 15 Dâŋqâreŋ ʒiŋuc hâcne fokac: “Bocjaha nusembiŋzi mâririhec mi embiŋ, â afecne nusembiŋzi roroc mi embiŋ.”

16 Anutu e Tito esockeme, maŋnâŋezi ŋoŋere erâ bâruŋkekac sâc ijaha erao fuakacte muteŋkenaŋ. 17 Nâŋe mucnepene manawec sawa mâcne, e jahac maŋticnere afecke-jâmbâŋkerâ fâzo ekac. 18 Opâ ruac âgo-nâŋec moc, kikefuŋ sasawa jaŋe Biŋebiaŋte gie bapa-ticnere mana biaŋ eeŋgopieŋ, e mâmâc sorepene fâkopirec. 19 Kikefuŋ jaŋe ŋic e hâcne bubiaŋ moneŋ rorore bafic-nâpoocte bâwosâembiŋ. Gie i Wofuŋ sâsehuc buafec-nâŋecte baŋgopeneŋ. 20 Mumusifuc fuazacte moneŋ sâko i ʒâŋe ʒereŋko sosoŋaŋ ehuc ro qâzuc eeŋgopeneŋ. 21 Nâŋe wiac epene Wofuŋzia maname biaŋkeocte mâcne, ŋiczi mâmâc manapie sâckeocte mueŋgopeneŋ. 22 Nâŋe jahehec âgo-nâŋec moc mâmâc sorec-jopapene fâŋgopieŋ, ŋic e dameŋ gâcnao esâicke honepene ʒoɋac-ticnere fuŋne taniŋkewec, ʒi ine ŋoŋere bubiaŋ manahuc ʒoɋac fekicne bâfuakac. 23 Ŋoŋe Titore manaeŋgopieŋ, e âgo babafic-nane, mâmâc gie bapa ŋicjahec-ŋeŋic jukoperec, â âgo jahec-nâŋec jahere wâc manaŋgopieŋ, jahe kikefuŋ jaŋe sorec-jofaŋgopieŋ, erâ jahe Kristore ʒuŋe gâpiŋ hâcne. 24 Nâŋe ŋoŋe muafec-ŋopaeŋgopeneŋ irec dâŋ i fârinehec eocte ŋic iŋucnezi fâpie âgo jauŋ ejarepie kikefuŋ gâcne jaŋe mananʒepieŋ.