1 Pentekoso dameŋ maickeha jaŋe mâmâc sasawa fic mocjahao qâzuckerâ ŋefârembiŋ. 2 Ŋehapie sambâŋkonec fânâŋ moc mâŋâŋ hâhâwicne ere fânâŋ tinac ɋeŋfâfâc jaha fânâŋke wahawec. Waharâ fic ŋembiŋ ira raʒirâ fusucmawec. 3 Ehame jaŋerao wiac moc hawarine ʒocnameŋ tinac fuarâ domahuc ŋeratierâ ŋic ŋokac qizec-jeŋic sâc biricke rawec. 4 Eme Tiri Mârozi maŋjeŋicko hurâ fusucmame dâŋmarac fuŋne fuŋne dâŋembiŋ, Mârozi ru sâc bâfua-jareme dâŋe rambiŋ.

5 Eme dameŋ ira Jerusalem haeo mâreŋ sâc irecnec Judaŋic mitine jumbiŋ. 6 Eme jaŋe fânâŋ sâko i manarâ mâretec fisirâ tumaŋnehuc bipic tatara embiŋ. Ehuc aposolo jaŋe dâŋjeŋic sâc dâŋepie 7 manarâ maŋjeŋic goroŋkeme wareckerâ mumbiŋ, “Ŋic dâŋeŋgopieŋ ʒi jaŋe Galilaia ŋic sasawa, 8 jaŋe weniŋuc erâ dâŋnâŋec sâc dâŋepie manapene dâŋrune marac efârekac? 9 Nâŋâc ʒi Pataŋic â Medeŋic â Elamŋic, erâ Mesopotamia mâreŋkonec â Judaia mâreŋkonec â Kapadokia mâreŋkonec â Ponto mâreŋkonec â Asia mâreŋkonec 10 â Frigia mâreŋkonec â Pamfilia mâreŋkonec â Aigita mâreŋkonec â Africa mâreŋkonec Kirene hae rârec rârec irecnec, nâŋâc Romaŋic 11 â Judaŋic mafa â hae fâri erâ Kretaŋic â Arabia ŋic. Nâŋâc iŋuczi juhuc dâŋnâŋec sâc Anutu mâsi sâko-ticnere biŋedâŋ mupie manaŋgopeneŋ.” 12 Ŋic jaŋe iŋuc murâ maŋjeŋic goroŋkeme kâuc barâ nazaŋ gazaŋ erâ mumbiŋ, “I wemo mâsi mo?” 13 Gâcnezi ine aposolo mufec muriŋ ejarehuc mumbiŋ, “Jaŋe waiŋ opâ gapecmâc nâmbieŋte maŋjeŋic bibiriwakac.”

14 Eme Petoro e âgofâcne 11 jaŋehec domahuc dâŋ hahaŋne barâ ʒiŋuc jazawec “Judaŋic â Jerusalem haeo juŋgopieŋ sasawa, no dâŋ ŋazape hazec-ŋeŋic râerâ mananiŋ. 15 Ŋoŋe ŋic kecʒi jaŋere muŋgopieŋ ‘Waiŋ opâ nâku maŋjeŋic bibiriwakac. Iŋuc aricne. Hae miŋecne furekacte wemocko waiŋ opâ nanʒapeŋ. 16 Porofete Joelezi findaŋdâŋ kecʒiŋuc qâreŋkewec i sanaŋkekac hâcne:

22 “Israe ŋicbureŋ no ŋazape mananiŋ: Jesu Nazarete haeonec e Anutuzi neŋgoc ŋesiŋ ŋecnehame ŋondeŋ-ŋeŋicko tâpiri sâko-ticnezi mâsi â wiac ʒâŋe furu bahuc, Anuturaonec wahawec, irec fuŋne-ticne bataniŋkeme honembiŋ. 23 E hâcne Anutuzi mârâc jaha maname fowecte hata mutaracnewec irec sâcko ŋoŋe wiac ecnehuc doc barâ ŋic qâpuc jaŋerao râepie maripoŋko qapie hâmowec. 24 E hâcne hâmoczi gozi kime Anutuzi gozi bacneme ɋârerâ faharewec. Hâmoczi e wemocko sakarezac. 25 Dawidizi ere hâcne kecʒiŋuc muwec:

29 “Âgo bureŋ, no mimiŋne-nâŋec Dawidi ere acmâc ŋazape, e hâmome duckembiŋ, eme ʒâŋeruŋ-ticne hone manac ehuc jueŋgopeneŋ. 30 E porofete juweczi ʒiŋuc manawec: Anutu e ɋâricfâc-nane jaŋeraonec moc âkendâŋneme nore ŋicwofuŋ ŋeŋetacko ŋeocte mupaŋke-narewec. 31 I manahuc juwicnao Kristo fafahare-ticnere hâcne muwec, ‘E hâmoc mi qikiŋnecneocmu â sahac-ticne gârecke ʒaŋ mi eocmu. 32 Eme Jesu e hâcne Anutuzi baɋâreme fahareme nâŋe ʒâŋe fâri-nâŋeczi hone-fârembeŋ. 33 Eme Anutu mefârenao risie feme Tiri Mâro biŋe qanâre-kicne e hâcne Mamaczi qikiŋnecneme soreme wahame fuŋne-ticne hone manac eŋgopieŋ ʒine hâcne. 34 Dawidi e jahacne sambâŋko mi fewec, mâc dâŋ kecʒiŋuc ine muwec:

37 Petorozi dâŋ iŋuc jazame maŋjeŋic henʒaŋneme e jahacne â aposolo gâcne ʒiŋuc mu wioc ejarembiŋ: “Ŋic âgofâc, nâŋe weniŋuc epene sâckeocmu?” 38 Mupie Petorozi ʒiŋuc jazawec: “Ŋoŋe maŋŋeŋic bârisierâ Jesu Kristo ʒâŋene biŋeckehuc Miti Opâ ruapie sâqocne-ŋeŋic tâmirezejec, eme Anutuzi Tiri Mâro tahacke-ŋareocmu wâc. 39 Ŋaŋacne â ɋâricfâc-ŋeŋic â ʒoricko juraŋgopieŋ, Wofuŋ Anutu-nâŋeczi hefârec-ŋopaocmu sâc, ŋoŋe hâcne Tiri Mâro biŋe qaŋare-fârekicne.” 40 Petoro e iŋuc murâ dâŋ gâcne ʒuhuckerâ uŋ sawaŋ ejarehuc ʒiŋuc jazawec: “Ŋoŋe ŋic bâbâsifucne jaŋere guruonec wiserâ wefupie rocŋopazo.” 41 Eme ʒoaŋ gie bapa ira ŋic 3 tauseŋ jaŋe Petorore mitidâŋ mana ʒakiepie Miti Opâ rua-jarepie Jesure kikefuŋfâc jaŋerao ʒuhuckembiŋ.

42 Eme aposolo jaŋe miti jaza qazuc epie mananiŋte henʒiriŋnehuc jumbiŋ, ehuc maŋzi roroc bâmbândeŋ erâ tiwâre â nunumure gâbâ tumaŋne jumbieŋ. 43 Eme ŋic ŋokac ʒeŋgoma hâwic sahac efârembiŋ â aposolo jaŋe mâsi fuŋne fuŋne bahuc jumbiŋ. 44 Opâ ruac jaŋe maŋzi ʒâʒâfic erâ wiac sasawa-jeŋic wirec bajumbiŋ. 45 Á gâcne jaŋe ine jufu mafa wiac-jeŋic qikiŋnepie moneŋ kitâcneme âgofâc-jeŋic waha qaqane wiac basambiŋ sâc bâtâc bajarembiŋ. 46 Jaŋe ʒoaŋ gie bapa sâc taha ufuŋko maŋ mocjaha erâ tumaŋne jumbieŋ â tiwâ i ficjeŋic sâc nâjumbieŋ. Ehuc nânâ-jeŋic bubiaŋko bâtâc tâmiric nâhuc jumbiŋ. 47 Erâ Anutu mumbiaŋkehuc jumbiŋ. Iŋuc epie ŋic gâcnezi hone ʒiziwec-jopambiŋ. Eme Wofuŋ e ʒoaŋne ʒoaŋne ŋic mitizi bâpiaŋ-jopahame guru-jeŋicko ro ʒuhuc ejarewec.