4
Wiac omanere kiŋaŋ qaqazi Anuture naru motecfâc embeŋ
1 Moc ʒiŋuc mupe mananiŋ: Motec ɋiene moc e mamac hâmocnere merâfâc raucke-bipiehuc sifu kiŋaŋ motec hawari juocmu. 2 Ehame wawa rau â âgo tofazi merâfâc qâzuckerâ bacne juhapie dameŋ mamaczi bawec i maickeocmu. 3 Nâŋâcne sâc ijaha fokac. Mârâc jaha maŋzi ɋiene juhuc mâreŋte wiac omanere kiŋaŋ qajumbeneŋ. 4 Eme ʒâhecko dameŋ bakicne i qosackeme Anutuzi Ŋokâ-ticne soreme ŋokackonec fuawec â sâcmutâc dâŋte kiŋaŋ qawec. 5 Ine nâŋâc sâcmutâc dâŋte niŋgiŋkonec goroŋ-nâpome Anuture naru motecfâc enaŋte iŋuc ewec. 6 Eme ŋoŋe naru motecfâc-ticne eŋgopieŋte Anutuzi Ŋokâ-ticnere Mâro maŋnâŋecko soreme hurâ ʒiŋuc wirâ wâwâsic eekac: “O Mamac biaŋ.” 7 Irec go kiŋaŋ qaqa-ticne mâcne, motec-ticne juekic. Erâ motec-ticne juhuc Anutu katucmâc-ticnere erâ merâfâc rune wâc juekic.
Wiac fârimâc râpeckekicne i mocwâc mi maickezo
8 Ŋoŋe mârâc jaha Anuture kâuc bahuc nemu, Wofuŋ fârine mi jujune, jaŋe kiŋaŋ qajare jumbieŋ. 9 Eme ʒâhec Anutuzi hone ʒâŋitac eŋareme ŋoŋe e wâc hone tarambiŋ. Ehame wiac tâpiri tâmiric â fârimâc i wemocte mocwâc maickehuc kiŋaŋne qaŋgopieŋ? 10 Ehuc hombaŋ fuŋne fuŋnere manapie fârine eme ŋeeŋgopieŋ. 11 Gie-nanezi ŋoŋerao fârimâc ezacte mana mezac boc eekopac.
Galata ŋic jaŋe Paulo râpeckezo embiŋ
12 Âgofâc-nane, no numu-ŋarehuc mupe: No ŋoŋere sâc epore ŋoŋe nore sâc enʒepieŋ. Ŋoŋe ʒi juwarehuc wiac hehesicne moc mi enarembiŋ. 13 Ŋoŋe manaŋgopieŋ, no mârâcko huc ʒâic enarehame Biŋebiaŋ ŋazapo. 14 Eme sahac dodoc mâretec enareme ŋoŋe nore sifu tatakicne mi eŋarewec â mi mamakâc-ŋopawec. Aricne, ŋoŋe honecnupie Anuture aŋelo tinac epo, opoŋ, Kristo Jesu tinac epe hefârecnumbiŋ. 15 Joi, dameŋ ira mu ʒeri embiŋ i weniŋucte omaekac? Ŋoŋe ʒâŋe hândâŋ-ŋeŋic unuckerâ no nanarene fome muzac enʒapiŋ, i jâmbomac manahuc mukopac. 16 Eme dameŋ ʒiŋuczia dâŋ fârine ŋazape honecnupie râsi-ŋeŋic ekopac me? 17 Ŋic gâcnezi ŋoŋere harac baeŋgopieŋ i âke râwiŋ-nâpopie ŋoŋe jaŋere harac eniŋte manasuhuc eeŋgopieŋ. Ine hâcne sioc ehuc ŋoŋere harac baeŋgopieŋ. 18 Wiac biaŋnere erâ harac ee i biaŋne. Ine ŋoŋerao fârâ juhape sawa mâcne, dameŋ sâc epie biaŋkeocmu. 19 Naru motecfâc-nane, no ŋoŋere erâ gozi kicnuha ʒâic manapo, ijaha harierâ manakopac, erâ Kristore hawari ŋoŋerao fua tâcneocte ʒâic i mana rahuc jupemu. 20 No ŋoŋere mana guruc boc ekopacte ŋoŋerao biac fârâ dâŋ mu hetikic ehuc ŋazazore enarekac.
Sara ere ŋokâ â Hagare ŋokâ jahe fuŋne-jekic bârâwiŋ
21 Wio-ŋarepe nazaniŋ, sâcmutâc dâŋte kiŋaŋ qazo mueŋgopieŋzi irec papia wose manac mi eeŋgopieŋ me? 22 Ira hâcne ʒiŋuc qâreŋkekicne: Abrahamte ŋokâ jajahec fuapic, moc i kiŋaŋ naruzi rowec â moc i ŋonâŋzi rowec. 23 Eme kiŋaŋ naruzi rowec e omanao fuawec, â ŋonâŋzi rowec e Anuture biŋedâŋte sâcko fuawec. 24 Eme dâŋ irec ŋifecne ʒiŋuc fokac: Ŋokac jahe mitire ʒâʒâfic jajahec irec sâsâcne epic. Ʒâʒâfic moc Sinai tikio ekicne, ere kikefuŋzi ine kiŋaŋ qaqa embiŋ, eme irec sâsâcne Hagazi ewec. 25 Haga i Sinai tiki, Arabia mâreŋko ŋekac, irec ʒâŋe moc. Á Jerusalem hae i Sinai tikihec sâcjekic mocjaha ekopirec, ere kikefuŋ jaŋe kiŋaŋ qaqa jaha wâc eŋgopieŋ hâcne. 26 Á Jerusalem hae faic ŋekac izi Sara ere sâc, hae izi hâcne neŋgoc jâmbâŋ-nâŋec ekac. 27 Dâŋqâreŋ ʒiŋuc hâcne fokac:
“Ŋokac hufiŋne, motec mi roro go bubiaŋ manazemec,
gozi mi kicguekac go ʒeri ehuc kiwaezemec.
Ŋokac ŋichec e ɋâric afecne fuacnehapie
me sawanezi naru motec bocjaha rocjopaocmu.”
28 Âgofâc-nane, ŋoŋe Isakare sâc erâ biŋedâŋte fuambiŋ. 29 Eme mârâc jaha motec omanao fuakicnezi Mârore dâŋte fuakicne e râsi ecnewec, sâc ijaha miŋecgac fokac. 30 Eme miti papiao dâŋ weniŋuc fokac? “Kiŋaŋ naru e ŋokâ-ticnehec jâpec-jofatec ranic, kiŋaŋ narure ŋokâzi ŋonâŋte ŋokâhec merâfâc mi rauckezejec.” 31 Âgofâc-nane, nâŋâc kiŋaŋ narure ɋârifâc aricne, nâŋâc ŋonâŋte ɋâricfâc.