4
Jujumana hae mâreŋko fisinaŋte munârekicne
1 Jujumana hae mâreŋ-ticnao raʒinaŋte mukicne. biŋedâŋ i mi hetâtieme omaewec, irec ŋoŋeraonec moczi hatao sifuckezacte mezac-nâpozejec. 2 Biŋe biaŋ dâŋ jaŋe jazakicne sâc ijaha nâŋâc nazakicne. Jaŋe ine dâŋ i manarâ maŋjeŋicko mi râepie hurâ fowecte jaŋerao fârimâc ewec. 3 Nâŋâc miti mana ʒakieeŋgopeneŋzi jujumana hae mâreŋko raʒieŋgopeneŋ. E ʒiŋuc muwec:
“No kimbeŋ qajarehuc mumupaŋ dâŋ ʒiŋuc mupo:
Jaŋe nore jujumana hae mâreŋko moc mi raʒinʒepieŋ”,
i mâreŋ hobeteŋne râehuc wiac sasawa bafârerâ sifu iŋuc muwec. 4 Irec ʒoaŋ namba 7 irec dâŋ moc ʒiŋuc muwec: “Anutu e wiac sasawa bafârereâ ʒoaŋ 7 ira jumanawec.” 5 Ehame faic honembeneŋ ine ʒiŋuc muwec: “Jaŋe nore jujumana hae mâreŋko moc mi raʒinʒepieŋ.”
6 Eme ʒi ŋic gâcnezi jujumana hae mâreŋko raraʒinere hata fokac jaha, â mârâc raraʒire biŋe biaŋ jazakicne jaŋe qikiŋnehuc mi raʒimbiŋ; 7 irec “miŋecgac” ʒâfo i mocwâc bahuc ʒâhec Dawidire micko dâŋ mupac i râeme ʒiŋuc muwec:
“Ŋoŋe miŋecgac dâŋticne manaŋgopieŋko
maŋbâzic mi junʒepieŋ.”
8 Josuazi jujumana hae mâreŋ fârine bâfua-jareme muzac, Anutuzi ʒâhec dameŋ mocte mi muzac. 9 Irec ʒiŋuc mananʒepeneŋ: Anuture ŋicfâc jaŋere jujumana hombaŋ moc fokac. 10 Anutuzi gie batararâ jumanawec, iŋuc jaha ŋic moc Anuture jujumanao raʒiocmuzi gie-ticne hetararâ jumanaocmu.
Anutu dâŋticnere fuŋne
11 Eme nâŋâcnaonec moczi docke sâqorec erâ ŋic mârâc qaqatara hata âtembiŋ ijaha âtezacte jujumana hae mâreŋko raʒinaŋte ʒoɋac enʒepeneŋ. 12 Anuture dâŋ i jujuhec â tâpirihec, erâ sâqe moc bune râpene micnehec irec sâc jâuruhuc mictara jâmbâŋ. Izi nâhuku qâqâtâc â maŋ, bibiric â siec wamboŋ ʒuʒuhuc-jeŋic nâtâcneekac, ehuc maŋte mamanasu â mamana wosâc irec fuŋne bataniŋkeekac. 13 Eme wiac bâfuakicne moczi moc Anuture maio soŋsoŋ mi foekac, erao wiac sasawa tâtâc â foŋ tâmiric foekac. Erao hâcne dâŋgie banaŋmu.
Jesu taha bapa sâko-nâŋec e maŋafec Jaha iqickenʒepeneŋ
14 Taha bapa sâko hahaŋnehec moc junârekac, e sambâŋ fotâcne-fârerâ fewec jukac, Jesu Anuture Ŋokâ hâcne, eme iŋucne junârekacte ʒâŋe-ticne murâ rereŋ enʒepeneŋ. 15 Erâ taha bapa sâko-nâŋec e dodocne enâreme hone qâoma mi enâreekac, nâŋâcnao eesâic fuaekac iŋuc jaha wâc erao eesâic fuŋne fuŋne fuawec, eesâicko dodocke mocjaha ine mi ewec. 16 Irec nâŋâc aki anonoc ŋeŋe rowaŋnao maŋafec jaha fisihuc junʒepeneŋ, eme wiac izi me izi maic maic-nâpoha eki buuruc enârehuc aki anonoc-ticnere erâ bafic-nâpozejec.