1 Irec nâŋâc ʒi Kristore dâŋ maine, fufuŋkeo mumune, i râepene foha dâŋ hukicne, wiac efehuc mumune, i moc ʒuhuckenaŋ. Wemocte miti hobeteŋne i hâsine râehuc maŋ bâbârisie â juju raŋɋa bebehe â Anutu mamanasiŋ, 2 â Miti Opâ â qizecko me rârâe â hâmockonec fafahare â bâtâc sanaŋ irec dâŋ mocwâc fuŋkezo? 3 Anutuzi maname sâckeme dâŋ moc ʒuhuckenaŋ.

4 Ŋic mitizi maŋjeŋic batamaeme sambâŋkonec nânâ nâhonembiŋ â Tiri Mârohec embiŋ, 5 erâ Anuture dâŋbiaŋ â juju sanaŋte tâpiri mana aŋac embiŋ, 6 ŋic iŋucne jaŋe miti behe sanaŋkehuc Anuture Ŋokâ jaŋacne maŋte mocwâc maripoŋko qahuc mamakâc ecnepie mitio bâbârisiec-jopane mi fokac. 7 Mâreŋ moc hoezi gâbâ hehuc bâgunuckekume, ŋic sara mamac eeŋgopieŋ jaŋere biŋe nânâ monʒaŋ bâfuaekac, i Anutu jambuŋ-ticnere fârine fuacneekac. 8 Á mâreŋ mocko hofâ qinʒiŋ sawa fuaocmu, ine fârimâc ekacte sâwec fâreme juku ʒoczi ʒaocmu.

9 Âgofâc, no dâŋ mukopac i ŋoŋe sipirickeniŋmu manahuc mâcne, mitio biaŋke-hâmoniŋmu, iŋuc manahuc mukopac. 10 Anutu e eesifucne mâcne; ŋoŋe ere erâ ŋicfâc-ticne hone bafic ejarehuc jauŋ bacjopambiŋ erâ eeŋgopieŋ jaha irec wemocko nikeckeocmu. 11 Ŋoŋe ʒiŋuc eniŋte enârekac: ŋoŋe mâmâc sasawa sâc ijaha ɋicwânʒâŋ epie sambâŋ ʒeŋaŋ bâbâfuare buâkec mi omaezejec, fofehame dameŋ tarazejec. 12 Eme mi rokawehuc, mitiŋic gâcne mamanasiŋ â sasanaŋhec juhuc wiac biŋec-nâpokicne rauckeeŋgopieŋ, jaŋere hata âteniŋmu.

13 Jaŋeraonec moc Abraham e Anutuzi biŋedâŋ âzâcnerâ femicne mocte maio mupaŋkeocte basarâ e jahacnao râehuc mupaŋkewec. 14 Ehuc ʒiŋuc muwec: “No jambuŋgurâ jambuŋgu epemu â basawecgurâ basawecgu epemu.” 15 Eme Abraham e mumupaŋ dâŋ irec woŋec tatakic tâmiriŋ juku fârine rowec. 16 Ŋiczi fekicne moc ere maio mumupaŋ dâŋ mupene mu qaqatarac eene mi fuaocmu. 17 Irec Anutu e ŋic biŋe qajareme maŋjahec enʒipiŋte, maŋticnezi sanaŋkeha muwec irec fuŋne bataniŋkehuc biŋedâŋ irec fainao mumupaŋ dâŋ ʒuhuckewec. 18 Anutu e burec tâmiriczi dâŋsanaŋ jajahec âkendâŋ-jofahuc nâŋâcnao suru râewec, i ere dapeŋko raʒimbeŋzi wiac biŋe qanârekicne irec fârine fotarierâ ronaŋte manasuhuc ewec. 19 Biŋe qanârekicne irec fârinezi juju-nâŋecte aŋga sanaŋne â tâtâcne tâmiric iŋucne ekac, erâ aŋga izi faic qoruc ââketâc irec râpenao râekicne fokac. 20 Ââketâc i micne bapa-nâŋec Jesu eki bânie-nârehuc fotâcnerâ maŋnao raʒiwec. E Melikisede ere sâcko taha bapa erâ jusanaŋkeekaczi iŋuc ewec hâcne.