1 Sâcmutâc dâŋko wiac mukicne i mâc ʒâhec fârine fuaocmu irec mumucne sawa fuakac, fârine jâmbâŋ mâcne. Irec taha bapa jaŋe sâcmutâc dâŋ reŋkehuc jarane jarane taha barâ ba epie ŋic ira Anutu mai ecneeŋgopieŋ jaŋe sâcne maŋfuru mi bacjopaekac. 2 Iŋuc eme muzac, taha bâzi ririke omaezac i¡ Ira Anutu mai ecneeŋgopieŋ jaŋe kiŋfâsâc enʒapiŋ muzac, kiŋjeŋicte manabâc mocwâc mi enʒapiŋ. 3 Taha bâzi izi ine jarane jarane fuame kiŋjeŋicte manasueŋgopieŋ. 4 Noniŋ bulimakao soczi wemocko kiŋjeŋic bâtâmirezac? I aricne. 5 Irec hâcne Kristo mâreŋko wahaocte dâŋ ʒiŋuc muwec:

11 Taha bapa sasawa jaŋe ʒoaŋne ʒoaŋne gie-jeŋic bahuc bâzi ijaha hati rikerâ rike ehuc jueŋgopieŋ, eme izi kiŋ bahac sâcne moc mi bâtâmireekac. 12 Kristozi ine sâqocne-nâŋecte taha mocjaha bame tarame faic Anutu mefârenao fewec jukac. 13 Eme ira râsifâc-ticne dockerâ waha fohuc kike-ticnere ââtesiŋ eniŋte woŋec juekac. 14 Maŋfuru eere hatao juŋgopieŋ jaŋere taha mocjaha bahuc bâbâpiaŋ-jeŋicte gie batarawec. 15 Eme Tiri Mârozi irec dâŋ mufua-nârekac wâc. Qanaŋ dâŋ ʒiŋuc fokac, Wofuŋ e kecʒiŋuc mukac:

19 Âgofâc, Jesu e socticnezi motâc ronârewecte furu ufuŋko fenaŋte maŋnâŋe. afeckekac. 20 Irec hatane ɋâricne â jujune ine e jahac bâʒâwe-nârewec. Ehuc ââketâc fowec, sahac-ticne hâcne, i fotâcnerâ fewec. 21 Eme taha bapa fekicne Anuture ufuŋ qizeckerâ junârekac. 22 Irec nâŋâc mamanasiŋzi maŋnâŋec baafeckeha siocmâc mai ecnehuc junʒepeneŋ. Ine qanaŋ maŋnâŋec kiŋzi hegâpârekicne i socticnezi ruacneme taniŋkeha â sahac-nâŋec opâ ɋaɋaczi ʒureha iŋuc sâcne enaŋmu. 23 Erâ mume sasanaŋzi wiac biŋe qanârewecte biŋedâŋ i kiki papaŋ jaha bajuhuc muhaŋnenʒepeneŋ. 24 Erâ wâc sosoŋaŋ ehuc maŋjauŋte â eehâmo giere qaqafeŋ enʒepeneŋ. 25 Ehuc mitire tutumaŋko gâcnezi mi fisihuc qâoma eeŋgopieŋ iŋuc mi ezo. Dameŋ sâko bâqiŋ-nâpokac, iŋuc hâcne manahuc ʒoɋac erâ faŋ qaqac enʒepeneŋ.

26 Nâŋâc dâŋ fâri qizecnezi maŋnâŋec âke tamaehame sâqocne mana jaŋgeŋkehuc bapene mozi irec taha bame tâmireocmu? Aricne, iŋuc mi fokac, 27 ine okacne hâhâwicne â ʒocbâruŋ sâko izi sawa woŋec-nâŋec foocmu. Ʒocbâruŋ izi mitire râsifâc ʒâmiziec-jopaocmu hâcne. 28 Ŋic moczi Mosere sâcmutâc dâŋ mana suahuc qame ŋic jajahec me jahec â moczi mujaŋgeŋkepie acmâc jaha qapie hâmoekac. 29 Eme ŋic moc e Anuture Ŋokâ ro waha âte ecnehuc, ʒâʒâficte soc ruarâ maŋfuru ewec i mana suahuc aki anonoc rune Mâro musoriŋkeocmu, e okacne mo iŋucne fisicneocmu muŋgopieŋ? 30 Nâŋâc dâŋ kecʒiŋuc muwec ere fuŋne manaeŋgopeneŋ: “Kiŋ babatara i nore gie, okacne babazu i noni epemu.” Erâ moc ʒiŋuc fokac: “Wofuŋ e ŋicfâc-ticne jaŋere dâŋ mutara-jareocmu.” 31 Anutu jujune ere meo fefe i wiac hâhâwicne jâmbâŋ.

32 Ŋoŋe mârâc wiac ejumbieŋ irec manasunʒepieŋ. Dameŋ ira maŋŋeŋiczi hae furehame fific guguriŋ maŋko juju gie sâko bahuc sanaŋkembiŋ. 33 Eme gâcne ŋoŋe imaŋ gomaŋ â ʒâic busâqoc fai-ŋeŋicko feme ŋic jaŋere maio mamakâc embiŋ, â gâcne ŋoŋe ine âgofâc-ŋeŋic wiac iŋucne ejarepie ʒâic-jeŋic mâmâc manambiŋ. 34 Ŋoŋe âgofâc-ŋeŋic kâpâcwâru ficko fepie jaŋere erâ buheric fua-ŋarewec, â moneŋ mafa ŋowac ropie ine mafa fârine fofone fonârekac muhuc manapie bubiaŋnehec ewec. 35 Eme ʒi hâbi-ŋeŋic mi goroŋkezejec, hâbihec juku furine kâcɋene rozo. 36 Irec ŋoŋe sasanaŋ bâfuarâ Anuture micdâŋkoa juku wiac biŋe qaŋarekicne irec fârine ronʒepieŋ.