1 Gie bapa jajahec tarame Kana haeo Galilaia mâreŋko ŋic ŋokac jajahec muturec-jofaniŋte irec tiwâ bâzi qapie fisiwec. 2 Ehuc Jesu neŋgoc-ticne erâ e jahacne â motecfâc-ticne mâmâc hefârec-jopapie fisimbiŋ. 3 Eme tumaŋnerâ bâzihec waiŋ nâpie ʒickeme Jesu neŋgoc-ticnezi e âzâcnerâ muwec: “Waiŋ-jeŋic omaekac.” 4 Mume Jesuzi ʒiŋuc âzâcnewec: “Ŋokac, i nâhâcne wiac me? Dameŋ-nane miŋecnea maickeocmu.” 5 Eme neŋgoc-ticnezi kiŋaŋ qaqa ʒiŋuc jazawec: “Wiac mocte ŋazame enʒepieŋ.” 6 Eme fic ira opâ pake 6 ŋewec. Judaŋic jaŋe me sahac-jeŋic gâbâ ʒure jumbieŋte fic sâc opâ pake iŋuc ŋerawec. Pake i piticne mâcne, kâcɋene sâko. 7 Eme Jesuzi kiŋaŋ qaqa ʒiŋuc jazawec: “Ŋoŋe opâ fiarâ pakeo qapie huoc.” Eme jaŋe iŋuc erâ opâ qapie hurâ pake micnao qafârewec. 8 Iŋuc epie ʒiŋuc jazawec: “Ŋoŋe tucne fiarâ nânâ soŋaŋtao baraniŋ.” 9 Eme jaŋe fiarâ barahapie opâzi waiŋ eme nânâ soŋaŋzi nâhonerâ kâuc bawec. Kiŋaŋ motec opâ fiarâ pakeo qapie huwec jaŋe sawazi waiŋte fuŋne mana tarambiŋ. Eme nânâ soŋaŋzi ŋic ŋokac bawec, e hefârerâ 10 ʒiŋuc âzâcnewec: “Qanaŋ waiŋ aŋacne gumec-jopapene nâkupie maŋjeŋic bibiriwazo eme ʒâhec waiŋ oomane gumec-jopaeŋgopeneŋ, hata-nâŋec iŋuc fokac. Go ine qac qâtikic ehuc aŋacne hefacketec ŋeku ʒâhec fuakac.”

11 Jesu e Kana haeo Galilaia mâreŋko ira hâcne mâsi bapa gie-ticne fuŋkehuc Wofuŋ qâreŋ-ticnere foŋ bararuŋkewec. Eme motecfâcne jaŋe honerâ e manasiŋkembiŋ.

12 Eme Jesu e Kana haeonec Kafanaum haeo rame neŋgoc ɋafâc-ticne â motecfâc-ticne mâmâc bâjâperâ rafârembiŋ. Eme ira boc mi jumbiŋ. 13 Judaŋic aakic hombaŋ-jeŋic bembeŋkewecte Jesuzi Jerusalem haeo rafewec. 14 Eme taha ufuŋ ʒuhucnao lama bulimakao â hapâ wiac badomahuc nareŋ gareŋ embiŋ, ehuc irec moneŋ teboo wose biric embiŋ. 15 Iŋuc epie Jesuzi honec-joparâ repa mizeme ʒika eme ŋic mecne lama bulimakao mecne jâpec-jopame wisepie moneŋ tie-jarerâ irec tebo herândiŋkewec. 16 Erâ hapâ badomambiŋ jaŋe ʒiŋuc jazawec: “Ŋoŋe Mamac-nanere ficko wiac kosa mi epie situâc fic ezejec.” 17 Jesu e iŋuc eme motecfâcne jaŋe miti papiao dâŋqâreŋ kecʒiŋuc fokac irec manasumbiŋ: “Gore ficte erâ bunane ʒoc ʒarâ ʒâfitacnukac.” 18 Eme Judaŋic jaŋe wiocnerâ mumbiŋ: “Go iŋuc ekomeczi wemo mâsi moc bahuc fuŋnege bataniŋke-nârecmu?” 19 Eme micjeŋicko rorâ ʒiŋuc jazawec: “Ŋoŋe taha ufuŋ kecʒi heropiepie noni ʒoaŋ jahec â moc eha mocwâc bâzickepemu.” 20 Iŋuc muhuc jazame mumbiŋ, “Kâcɋenefâc-nâŋec jaŋe taha ufuŋ ʒi jara 46 baku bâzickembiŋ, eme goki ʒoaŋ jahec â moc sawa ira bâzickezo mukomec me?” 21 Jesu eki ine sahac-ticnere ufuŋko ɋetickehuc muwec. 22 Juku hâmockonec ɋârerâ fahareme motecfâcne jaŋe dâŋ i manasumbiŋ. Ehuc ufuŋte muwec, â miti papiao ere dâŋ gâcne mukicne, irec mâmâc manapie fârine eha mana ʒakiembiŋ.

23 Jesu e aakic hombaŋko Jerusalem haeo juhuc fuŋne qaqa mâsi bame ŋic bocjahazi honerâ ʒâŋe-ticne mana sakac embiŋ. 24 Jesu e jahac ine ŋic hone tarac-jopa-fârewecte jaŋerao mi fohorewec. 25 E ŋic mocte fuŋne manaocte gâcne mu indiŋ mi ejarewec, e jahaczia ŋic maŋjeŋic hone ʒâŋitac ejare-fârewec.