20
Jesu ɋârerâ faharewec
(Mat 28: 1-10; Maò 16: 1-8; Luë 24: 1-12)
1 Eme Sonda hae mi fure taniŋkeha Maria Madala haeoneczi ʒâŋeruŋko rawec. Ra fisirâ honewec: Qânâ e ʒâŋeruŋkonec bârâriekicne. 2 Iŋuc honerâ gasacke rarâ Simoŋ Petoro â Jesu motec bufuŋ-ticne jasarâ muwec: “Wofuŋ qâŋɋâŋ-ticne bawisembieŋ, eme wena râembieŋ i nâŋe kâuc baŋgopeneŋ.” 3 Iŋuc mume Petoro â motec âgo-ticne jahe ʒâŋeruŋko rapic. 4 Hatao gagasac jaha rahuc âgonezi Petoro âte tariŋkerâ biac ra fisiwec. 5 Ra fisirâ hawecmaŋko mi raʒihuc mâc okarierâ fime raʒime qoruc râpâ sawa fome honewec. 6 Ehame Petoro e ʒâhec fisirâ maŋnao raʒirâ qoruc râpâ honewec 7 â qizec-ticnere foŋ moc buc bazukicne fome honewec. 8 Iŋuc eme motec âgo-ticne bâbâni ʒâŋeruŋko fisiwec eki raʒirâ iŋuc jaha hone-fârerâ manapaŋkewec. 9 Juwicnao ine jahe Jesuzi hâmockonec ɋârerâ fahareocte miti papiao findaŋdâŋ fowec i mi mana tarapic. 10 Eme jahe haeo mocwâc risie rapic.
Jesu e Maria Madala haeonec fuacnewec
(Maò 16: 9-11)
11 Eme Maria eki ʒâŋeruŋ sahacnao domahuc kiowec; kiohuc ra motâcko okarierâ ʒâŋeruŋko fime raʒime 12 aŋelo jajahec ŋaqi qaŋqaŋhec Jesure qâŋɋâŋ fofotacnao ŋepire honec-jofawec, moc e qizecne fowecko â moc e kikene fowecko ŋewec. 13 Eme jahe mupic: “Ŋokac, go wemocte kiokomec?” Eme eki muwec: “Wofuŋ-nanere qâŋɋâŋ mocko bawisepie basakopac.” 14 Iŋuc murâ forisierâ Jesu jahacne honewec. Honerâ Jesu hawarine mi hone tarawec. 15 Eme Jesuzi wiocnerâ muwec: “Ŋokac, go wemocte kiokomec? Mo basakic?” Eme eki jufu runezi domakac muhuc ʒiŋuc âzâcnewec: “Ŋicbomboŋ-nane, goki qâŋɋâŋ mocko bara râemecko mutec manarâ ra rozepac.” 16 Eme Jesuzi muwec, “Maria.” Mume e forisierâ Judadâŋko “Rabuni” muwec, nâŋâcne dâŋko qaqazu. 17 Eme Jesuzi ʒiŋuc âzâcnewec: “Bâua basanaŋ mi enarec. No Mamactao miŋecnea fepemu i¡ Go rarâ qomâfâc-nane ʒiŋuc jazac: Nore Mamaczi ŋoŋere Mamac, â nore Anutuzi ŋoŋere Anutu, eme erao hâcne fepemu.” 18 Eme Maria Madala haeoneczi risie rarâ motecfâcne ʒiŋuc jazawec: “No Wofuŋ honepe dâŋ iŋuc nazajec.”
Motec jaŋe ficmaŋko tumaŋnehapie fua-jarewec
(Maò 16: 14-18; Luë 24: 36-49)
19 Eme Sonda hae ŋafeme motec jaŋe Judaŋic jaŋere hâwic-jopame tumaŋnerâ ficmotâc ki bafârerâ ŋembiŋ. Ŋehapie Jesu e ŋondeŋ-jeŋicko fuarâ domahuc jazawec: “Wama ŋoŋerao fozejec.” 20 Iŋuc murâ mejahecne â tambaraŋne jowatuwec. Eme motec jaŋe Wofuŋ honerâ bujeŋic biaŋkewec. 21 Eme harierâ jazawec: “Wama ŋoŋerao fozejec. Mamaczi no sorecnuwec iŋuc jaha noni ŋoŋe sorec-ŋopakopac.” 22 Iŋuc murâ ficnec-joparâ muwec: “Tiri Mâro ro maŋ eniŋ, 23 ŋoŋe ŋic sâqocne-jeŋic mutâmirepie tâmire-jareocmu, mi mutâmirepie fojareocmu.”
Tomare binaŋ
24 Motec âgo-jeŋic moc ʒâŋene Toma, ʒâŋene moc Didimo, eki mocko juhame Jesuzi fua-jarewec. 25 Eme motec âgofâcne jaŋe biŋedâŋ ʒiŋuc âzâcnembiŋ: “Nâŋe Wofuŋ honembeneŋ.” Iŋuc mupie muwec: “No nahac ʒâŋe jâmbâŋ-nanezi menao biriŋ râfu honerâ menanezi râfu bahonerâ tambaraŋne bâuarâ dâŋŋeŋic manape fârine eocmu.” 26 Sonda mocwâc fuame motec jaŋe Tomahec mâmâc ficko qâzuckerâ motâc ki bafârerâ ŋembiŋ. ŋehapie Jesu e ŋondeŋ-jeŋicko mocwâc fuarâ domahuc jazawec: “Wama ŋoŋerao fozejec.” 27 Iŋuc murâ Toma âzâcnewec: “Go memotecgezi menane bahonec â mege sicnerâ tambaraŋ-naneo râec, erâ maŋjahec mocwâc mi ehuc manasiŋnuzemec.” 28 Eme Tomazi muwec: “Go Wofuŋ-nane â Anutu-nane.” 29 Mume Jesuzi ʒiŋuc âzâcnewec: “Go honecnukomecte manasiŋnukomec, mi honecnuhuc manasiŋnueŋgopieŋ jaŋere manape ʒerine ekac.”
30 Mâsi gâcne bocjaha Jesuzi motecfâcne jaŋere ʒâŋe faio bawec, i papia ʒira mi qâreŋke-fârekicne. 31 Qâreŋkekicne mac kecʒi ine ʒiŋucte qâreŋkekicne: Ŋoŋe wose manac erâ Jesu e Kristo, Anuture ŋokâ, dâŋ i mana ʒakienʒepieŋ, erâ e jahacne manasiŋkehuc ʒâŋe biŋe-ticnere erâ juju sanaŋhec enʒepieŋ.