1 Jesu e aposolo 12 hefârec-jopame fisipie ŋic demoŋ jâpe-jareniŋte â huc bâniniŋke-jareniŋte tâpiri qikiŋne-jarewec. 2 Erâ ŋic Anuture uucmaŋ irec dâŋ jazahuc huchec ɋiɋicne bacjopaniŋte sorec-joparâ 3 dâŋ ʒiŋuc mutâcne-jarewec: “Ŋoŋe hatao gunu me he me nânâ me moneŋ me ŋaqi jajahec mi bajunʒepieŋ. 4 Hae mocko fisirâ fic feniŋmu ijaha ŋeŋe juju eku waha ranʒepieŋ. 5 Erâ mocko fisipie qikiŋ-ŋopapie hae i râpeckerâ gâc wândoc kike-ŋeŋickonec âteickepie wahame jaŋe fuŋne-jeŋic mananʒepieŋ.” 6 Iŋuc muhuc jazame jaŋe ʒawierâ rambiŋ. Ehuc haene haene jufârehuc ŋic miti jazambiŋ â huc ʒâic bâniniŋke-jarembiŋ.

7 Ŋicwofuŋ Herode e Jesuzi wiac ewec bawec, irec biŋe maname quŋkewec. I ŋic jaŋe kecʒiŋuc mumbiŋte ewec: “Johane e hâmockonec ɋârewec juhuc wiac i bakac.” 8 Gâcnezi ine mumbiŋ, “Eliazi mocwâc fuawec jukac.” Á gâcnezi ine mumbiŋ, “Porofete mimiŋne moczi ɋârewec jukac.” 9 Mupie manarâ Herodezi ʒiŋuc muwec: “Johane e noni mupe upene hetâcnembiŋ. Ehame mozi iŋuc eme biŋene manaekopac?” Iŋuc murâ Jesu honeocte boc ecnewec.

10 Eme aposolo jaŋe juku risierâ gie bambiŋ irec dâŋ binaŋ Jesu ecnembiŋ. Dâŋ binaŋ ecnepie Jesuzi rocjopame Besaida hae mâreŋko buc juniŋte rambiŋ. 11 Rapie ŋic jaŋe honec-joparâ bâjâpec-jopambiŋ. Erâ Jesurao fisipie âgo ejareme jumbiŋ. Juhapie Anuture uucmaŋ irec dâŋ jazawec, â huc ʒâichec ɋiɋicne bacjopawec. 12 Iŋuc ehuc juhame ʒoaŋ ŋetarazo eme motecfâcne jaŋe erao rarâ ʒiŋuc âzâcnembiŋ: “Ʒira tuhuo juŋgopeneŋte go ŋic râec-jopatec hae ŋerakac ira rarâ fic â nânâ bâfuanʒepieŋ.” 13 Mupie ʒiŋuc jazawec: “Ŋaŋac moc nânâ gumec-jopaniŋ me!” Eme jaŋe ʒiŋuc âzâcnembiŋ: “Poroŋ memoc â opâ qowi jajahec iŋuc mac fonârekac. Irec weniŋuc enaŋ? Haeo rarâ ŋic guru sâko ʒi jaŋere nânâ sâcne furine banaŋmu me?” 14 Ŋic 5 tauseŋ jumbiŋte motec jaŋe iŋuc mumbiŋ. Mupie ʒiŋuc jazawec: “Ŋic ejarepie birine birine 50 qâzuckerâ ŋeranʒepieŋ.” 15 Mume jaŋe ejarepie iŋuc epie 16 poroŋ memoc â opâ qowi jajahec rorâ sambâŋko fime fehame jambuŋkewec. Jambuŋkerâ poroŋ bazurâ motec jareme jaŋe bârâwiŋnerâ ŋic jarembiŋ. 17 Eme jaŋe mâmâc sasawa nâ gapec efârembiŋ. Eme tiwâne ŋerawec, i ropie hurâ sasac 12 fusewec.

18 Juku Jesu e motecfâc-ticne jaŋehec buc juhuc nunumu gie bawec. Eku wio-jarerâ muwec: “Ŋic jaŋe nore mo mueŋgopieŋ?” 19 Wio-jareme ʒiŋuc âzâcnembiŋ: “Gâcne jaŋe Johane Miti Opâ fufuŋke mugareeŋgopieŋ, gâcne jaŋe Elia mugareeŋgopieŋ, â gâcne jaŋe porofete mimiŋne moczi ɋârewec jukac, iŋuc mugareeŋgopieŋ.” 20 Mupie jaŋacne indiŋ-joparâ muwec, “Á ŋoŋe ine nore mo mueŋgopieŋ?” Eme Petorozi ʒiŋuc muwec: “Go Anuturaonec Kristo jâmbâŋ.” 21 Mume ŋic moc mi mufua-jareniŋte mic muac sanaŋne ejarewec. 22 Erâ ʒiŋuc ʒuhuckerâ Jazawec: “Ŋic Fâri Wâtuŋnezi Juku ʒâic serereŋ bocjaha manaocmu. Soŋaŋ â taha bapa micne â miti qaqazu jaŋe e kiarao qikiŋnepie qame hâmorâ ʒoaŋ jahec â moc eha fahareocmu.”

23 Jesu e ŋic mâmâc sâko-jeŋic ʒiŋuc jazawec: “Ŋic moczi no bâjâpecnuzo murâ maŋ sahac-ticnere dâŋ râpeckerâ maripoŋ-ticne ʒoaŋne ʒoaŋne hâporâ bâjâpecnuzejec. 24 Moc e juju-ticne sakareme sifuckecneocmu â moc e nore erâ qikiŋneme fuacneocmu. 25 Moc e mâreŋte wiac sasawa hure-fâreku kinduŋ bânduŋ bajuhame juju-ticne kihâmome sipirickeme wemo wiac fârine focneocmu? 26 Moc e no nahacnere me miti-nanere maname mimi gaŋgaŋnehec eocmu, ine Ŋic Fâri Wâtuŋnezi Juku Mamac-ticne â tiri aŋelo jaŋere huririzi uucne erao riŋkehame sambâŋ tatamac-ticnehec fisirâ ŋic iŋucnere iŋuc Jaha maname mimi gaŋgaŋnehec eocmu. 27 No ine jâmbomac ŋazape mananiŋ: Domaŋgopieŋ ʒi jaŋeraonec gâcne hâmoc mi bâfuahapie Anuture Wofuŋ qâreŋ fua taniŋkeme honenʒoŋgopieŋ.”

28 Jesu e dâŋ i murâ juhame ʒoaŋ gie bapa 8 tarame numuocte Petoro â Johane â Jakobo rocjopame tikio fembiŋ. 29 Ferâ numuhame ʒâŋe mai-ticne hawarine fuŋmoc ewec. Ehame ŋaqi-ticne tamaerâ ɋaɋac taeŋne jâmbâŋ ewec. 30 Eme mi ŋic jajahec fuarâ ehec dâŋ muc manac enʒepieŋ i¡ Ŋic ʒâŋe-jekic Mose â Elia. 31 Jahe sambâŋ tatamac-jekichec fisirâ Jesu Jerusalem haeo mâreŋko juju-ticne jutararâ raocmu irec dâŋ mumbiŋ. 32 Muhapie Petoro â âgo jahec-ticne jaŋe guŋ te mâretec ejare-bipieme ʒâŋe fitâcnerâ Jesu huriri qâreŋ-ticnehec â ŋic jahec ehec domapire honec-jopambiŋ. 33 Eme jahe razo epire Petorozi Jezu ʒiŋuc âzâcnewec: “Qaqazu, sowine ʒira juŋgopeneŋ. Irec manatec boze jahec â moc banaŋ, gore moc, Mosere moc â Eliare moc.” E dâŋ mi mana tarahuc iŋuc muwec. 34 Muhame karorac moczi waharâ sâoc-jopawec. Sâoc-joparâ foŋjopame motec jaŋe me kike fâfâc ehuc domambiŋ. 35 Eme karorac maŋko dâŋ ʒiŋuc fuawec: “Keci joroc Ŋokâ-nane, ŋoŋe dâŋticne mananʒepieŋ.” 36 Eme dâŋ mana manahuc ʒâŋe firâ Jesu buc domame honembiŋ. Eme motec jaŋe wiac honembiŋ i dameŋ ira ŋic mi jajaza mâc maŋkerâ jumbiŋ.

37 Hae fureme tikionec wahapie ŋic guru sâkozi ehec bâbâfuac embiŋ. 38 Eme izia ŋic jaŋere ŋondeŋkonec moczi ʒiŋuc muhuc Jesu wâsickewec: “Qaqazu, go dâŋnane manarâ ŋokâ-nane bafickec, e mocjaha mae. 39 Manakic, demoŋ moczi hâpome ɋeŋfâfâc jaha owackeekac. Erâ ro fârec ecneme mic tâferu-ticne wefuekac. Eme demoŋzi motec jâpec mi bebehe ba âkejac ecneku mâretec bâdockeekac. 40 Eme motecfâcge jaŋe jâpecneniŋte numu-jarepe eipiembieŋ.” 41 Mume Jesuzi ʒiŋuc muwec: “O ŋicguru mamanasiŋ tâmiric â maŋsanaŋ, no ŋoŋehec hati jurâ ju ehuc âsi qataŋ eŋarepemu me? Ŋokâge bawarec.” 42 Eme motec Jesurao barahame demoŋzi fâreme mi kikene miŋgeŋkewec. Eme Jesuzi demoŋ dâŋ mucneme wiseme motec biaŋkeme mamac-ticne râcnewec. 43 Eme ŋic jaŋe Anutu tâpiri sâko-ticnere fuŋne honerâ warecke sâqorembiŋ.

Eme ŋic jaŋe Jesuzi wiac ewec bawec irec wareckehuc juhapie Jesuzi motecfâcne bucko ʒiŋuc jazawec: 44 “Dâŋ ʒi ŋazape manapaŋkeniŋ, Ŋic Fâri Wâtuŋne e ŋic jaŋere meo feocte dameŋ bembeŋkezo ekac.” 45 Iŋuc muhuc jazame motec jaŋe dâŋ i manapie qeŋ bipinehec eme fuŋne kâuc bambiŋ. Erâ wiocneniŋte hâwic-jopame behembiŋ.

46 Motec jaŋe nâŋâcnaonec mozi micne sâko jukac muhuc hehefaric embiŋ. 47 Iŋuc epie Jesuzi maŋjeŋicte fuŋne manarâ motec piticne moc rorâ maŋfuŋnao râerâ 48 ʒiŋuc jazawec: “Moczi motec piticne kecʒiŋucne moc nore erâ mamac rau ecneocmu, e no mamac rau enareocmu. Á no mamac rau enareocmuzi sorecnuwec e mâmâc mamac rau ecneocmu. Erâ ŋoŋeraonec moczi wahakicne jâmbâŋ juocmu, ere fekicne muzo.”

49 Eme Johanezi ʒiŋuc âzâcnewec: “Qaqazu, nâŋe ŋic moc gore ʒâŋe muhuc demoŋ jâpec-jopame honembeneŋ, erâ e nâŋerao ʒuhuckerâ go mi bâjâpecguekacte qataracnembeneŋ.” 50 Mume Jesuzi ʒiŋuc âzâcnewec: “Mi qataracnezo. Gie-ŋeŋic mi hetâtiecmuzi âgo babafic-ŋeŋic eocmu.”

51 Jesu e sambâŋko risiocte dameŋ bembeŋkezo ehame Jerusalem haeo raocte mupaŋkewec. 52 Mupaŋkerâ kiŋaŋ sorec-jopame bâniembiŋ. Bânierâ raku Samaria ŋic jaŋere hae mocko fisirâ Jesure biŋe fic moc bâfuaniŋte jazambiŋ. 53 Eme Jesu e Jerusalem haeo raocmu, iŋuc manarâ fic sakarembiŋ. 54 Fic sakarepie motec jahec-ticne Jakobo â Johane jahe i manarâ Jesu wiocnerâ mupic: “Wofuŋ, go manatec mupere sambâŋkonec ʒoc waharâ ʒacjopazejec me?” 55 Mupire forisierâ qatara-jactewec. 56 Eme hae mocko rambiŋ.

57 Rahapie ŋic moczi bâfuac-joparâ Jesu ʒiŋuc âzâcnewec: “Go ira me ira razo mutecne bâjâpecgupemu.” 58 Mume Jesuzi ʒiŋuc âzâcnewec: “Qowi jaŋe hawec-jeŋichec, â sawa wipe jaŋe sareŋ-jeŋichec, Ŋic Fâri Wâtuŋne e ine fofo roŋgâŋ basaekac.” 59 Eme Jesuzi ŋic moc bâfuarâ ʒiŋuc âzâcnewec: “Go ware bâjâpecnuc.” Mume ŋic e ʒiŋuc âzâcnewec: “Wofuŋ, manatec qanaŋ rarâ mamac-nane duckezepac.” 60 Eme Jesuzi ʒiŋuc âzâcnewec: “Behec-jopatec qâŋɋâŋzia qâŋɋâŋfâc-jeŋic buc ducjopanʒepieŋ. Go ine rarâ Anuture uucmaŋ irec dâŋ muromackezemec.” 61 Ŋic moczi ine Jesu ʒiŋuc âzâcnewec: “Wofuŋ, no bâjâpecguzore enarekac. Erâ manatec qanaŋ risierâ wiacfâc-nane mâzoc-joparâ warezepac.” 62 Mume Jesuzi ʒiŋuc âzâcnewec: “Moc e woke guriŋne bahuc rârâpe fiocmu, iŋucnezi Anuture uucmaŋko gie bapare sâc mi eocmu.”