1 Jesuzi motecfâc-ticne binaŋ moc ʒiŋuc bajarewec: “Ŋicbomboŋ sâko moc ere moneŋ mafa soŋaŋ moc juwec. Eme juku ere ʒiŋuc mupie manawec: ‘Soŋaŋ e mafa ro bâsifuc eekac. 2 Iŋuc manarâ hefârerâ âzâcnewec: ‘No gore dâŋ weniŋuc mupie manapac? Go iŋucnezi soŋaŋ mocwâc mi jucmurâ mukopacte papiage bawaretec moneŋ mafare fuŋne bataniŋkezo. 3 Mume soŋaŋ e maŋnezi ʒiŋuc muwec: ‘Ʒi bomboŋ-nanezi soŋaŋ gie nowac rome wenac epemu? Gie he sarac ezore takicnukac, qafec qawahac juzore mimiekopac. 4 Miŋecne manakopac, bomboŋ-nanezi jâpecnume ŋic âgofâc-nane hezu hefâroc enarepie ficjeŋicko ŋeŋe epemurâ wiac ejarezepac. 5 Iŋuc murâ bomboŋ-ticnere tofa bajumbiŋ i jaŋe buc buc hefârec-jopawec. Ehuc moc wiocnerâ muwec, ‘Bomboŋ-nanere tofa gorao wezimuc fokac? 6 Eme eki muwec, ‘Qowitiŋ 100. Mume ʒiŋuc âzâcnewec: ‘Ajoc, papia ʒi rorâ 50 qâreŋkec. 7 Iŋuc murâ moc wiocnewec, ‘Bomboŋ-nanere tofa gorao wezimuc fokac? Eme eki muwec, ‘Padi târu 100. Mume ʒiŋuc âzâcnewec: ‘Ajoc, papia ʒi rorâ 80 qâreŋkec. 8 Iŋuc eme bomboŋ e manarâ soŋaŋ bâkiri bapa maŋfânâŋ-ticnere muteŋkewec. Miti tâmiric jaŋe âgofâc-jeŋic jaŋehec wiac eniŋte maŋfânâŋ-jeŋic kâcɋene fokac, mitihec ŋoŋe sâc iŋucne mi foŋarekac. 9 Irec mupe mananiŋ, ŋoŋe iŋuc jaha moneŋ mafa jawane ŋic qikiŋne-jarepie jaŋe âgo bacŋoparâ juku i babaju dameŋne tarame juju sanaŋ ficjeŋicko hefârec-ŋopapie junʒepieŋ.

10 “Moc e wiac omane metâo sâcne soŋaŋkeocmu, eki wiac fârine iŋuc jaha metâo sâcne soŋaŋkeocmu. Á moc e wiac omane bâsifuckeocmu, eki wiac fârine iŋuc jaha bâsifuckeocmu. 11 Ŋoŋe moneŋ mafa jawane metâo sâcne mi bajupie wiac fârine mozi ŋareocmu? 12 Á wiac jaba ŋarekicne i sâcne mi bajupie ŋaŋacne biŋe i mozi ŋareocmu? 13 Motec mocjahazi jajahec jahere kiŋaŋ sâcne mi qaocmu. E moc âgo ecnehuc moc hone takireocmu, â moctao qohotahuc moc râpeckeocmu. Ŋoŋe iŋuc jaha Anuture gie mecne â moneŋ mafa qâqâhâc sâko irec gie mecne sâckoa sâcne mi bacjofaniŋmu.”

14 Jesu e dâŋ i mume farisaio jaŋe moneŋ mafare sasec embiŋzi manarâ dâŋticne surembiŋ. 15 Epie ʒiŋuc jazawec; “Ŋoŋe hâcne ŋic jaŋere maio tiŋne hawari juniŋte ʒoɋac eeŋgopieŋ. Anutuzi ine maŋŋeŋicte fuŋne manaekac. Ŋic jaŋe wiac honepie tiŋne hawari eekac, i Anutuzi honeme mamakâcne eekac. 16 Sâcmutâc dâŋqâhâc â porofete dâŋ irec hata fowareku Johanerao mickewec. Irec faicnao ine Anuture uucmaŋ irec Biŋebiaŋ haŋ barakac. Eme ɋicwânʒâŋ eeŋgopieŋzi raʒieŋgopieŋ. 17 Sambâŋ â mâreŋ jahe sirowezo murâ sirowenicmu, â sâcmutâc dâŋ irec huŋgaŋne mac moc mâc foku arictac eene ine mi fokac. 18 Ŋic moc e ŋonâŋ-ticne beherâ moc roocmu, e ʒuʒuhuc-jekic bâtâcnehuc kiŋsâko hureocmu. Á moc e ŋokac behekicne i roocmu, e iŋuc jaha ʒuhuc bâtâcte kiŋ hureocmu.

19 “Ŋicbomboŋ moc juwec e ŋaqi erinehec furi sâko sasawa rojuwec, erâ ʒoaŋne ʒoaŋne tiwa ʒepec nâ ʒeri ehuc juwec. 20 Ehame ŋic hapetac moc juwec, ʒâŋene Lazaro. E sahacne wic sasawa. Eme eki ŋicbomboŋte fic rurumaŋko fojujec. 21 Ehame ŋicbomboŋte fickonec nâkitâc wahame i nâocte aŋac focne jujec. Fohame qâto jaŋe fisirâ wicticne apurumbiŋ. 22 Eme juku hapetaczi hâmome aŋelo jaŋe jowa ferâ Abrahamte qicfuŋko râepie juwec Eme ʒâhec ŋicbomboŋ e wâc hâmome duckembiŋ. 23 Eme e hârâcko hurâ ʒâic fâro sâko manahuc fime feme Abrahamte qicfuŋko Lazaro honewec. 24 Honerâ wirahuc muwec: ‘Abraham mamac-nane, nore buge sâqoreme Lazaro soretec mebotâŋne sawa opâo âke uruckerâ ware nameŋ-naneo bame mâteŋkezejec. No ʒira ʒocbâruŋko ʒâic serereŋ sâqocne manahuc jukopac. 25 Mume Abrahamzi muwec: ‘Ŋokâ-nane manakic, go mâreŋko aŋac faio jumeŋ i tarawec. Á Lazaro busâqoc faio juwec i iŋuc jaha tarawec. Eme irec e bubiaŋhec juekac â go ine ʒâichec juekic. 26 Erâ wâc ŋondeŋ-nâŋecko hârâc sâko domakac, irec ʒireczi ŋoŋerao wemocko hufâzo â ŋoŋeraoneczi ʒira wemocko wefuzo. 27 Eme ŋicbomboŋzi muwec, ‘Mamac-nane, moc mupe mana-narec; 28 ocna nore haeo ɋafâc-nane memoc juŋgopieŋ, jaŋe ʒâic haeo ʒira warenʒipiŋte Lazaro soretec ra uŋdâŋ hazec qâuŋ jazazejec. 29 Mume Abrahamzi muwec, ‘Aricne, Mose â porofete jaŋere micdâŋ fokac i mananʒepieŋ. 30 Eme muwec, ‘Mamac-nane Abraham, iŋuc mâcne, hâmokicne moczi ra jazame maŋjeŋic sâcne bârisieniŋmu. 31 Eme muwec, ‘Jaŋe Mose â porofete jaŋere dâŋ qikiŋneeŋgopieŋko hâmokicne moczi ra jazame iŋuc jaha qikiŋneniŋmu.”