1 Sonda uupicte hae fure pârâckezo ehame ŋokac jaŋe wiac âsu biaŋ bâmockembiŋ i ʒâŋeruŋko amecke rambiŋ. 2 Ra fisirâ honembiŋ: Qânâ sâko e rârieme hawec aaŋ fowec. 3 Eme ʒâŋeruŋ maŋko raʒirâ Wofuŋ Jesu qâŋɋâŋ-ticne basambiŋ. 4 Basarâ weaŋkerâ domahapie ŋic jajahec ŋaqi-jekic bâric bâricnekicne mi maŋfuŋ-jeŋicko fuarâ domazepirec i¡ 5 Eme ŋokac jaŋe hâwic-jopame dunduŋ domahapie ŋic jahe ʒiŋuc jazapic: “ŋoŋe wemocte ɋârine jukac e hâmokicne jaŋerao basaŋgopieŋ? 6 E ʒira mi fokac, e ɋârerâ faharejec, Galilaia mâreŋko juhuc dâŋ kecʒiŋuc ŋazawec i manasuniŋ: 7 ‘Mamac-nanezi ŋic Fâri Wâtuŋne e sâqocne bapa jaŋere meo râeme qapie hâmorâ ʒoaŋ jahec â moc eha ɋârerâ fahareocmu.” 8 Iŋuc mupire ŋokaŋ jaŋe dâŋ i manasuhuc 9 ʒâŋeruŋkonec risierâ haeo fisirâ motecfâcne 11 â ŋic ŋokac gâcne dâŋ binaŋ ejarembiŋ. 10 Ŋokac ʒâŋe-jeŋic Maria Madala haeonec â Johana â Maria Jakobore neŋgoc erâ âgofâc-jeŋic gâcne mâmâc jumbiŋ. Izi hâcne aposolo biŋedâŋ jazambiŋ. 11 Jazapie dâŋjeŋic manapie pacgoroŋ dâŋ eme mi mana ʒakiembiŋ. 12 Á Petoro e ine fahare ʒâŋeruŋko gasacke rarâ okarierâ fime raʒime qoruc râpâ sawa honewec. Erâ wiac fuawec i mana warec ehuc haeo risie rawec.

13 Eme ʒoaŋ ijaha Jesure kikefuŋfâc jaŋeraonec ŋic jajahec Emausi haeo ranicte rapic. Hae i ʒoricko mi ŋewec, Judaŋic jaŋe qâqâtâc bembeŋkeme Jerusalem haeonec rârâ ʒoaŋ otewezo ehame fisi jumbieŋ. 14 Eme ŋic jahe hatao rahuc wiac fuawec irec muc manac epic. 15 Mu gufuc ehuc muc manac rahapire Jesu e jahac rarâ bâfuac-jofame mâmâc rambiŋ. 16 Eme ʒâŋe-jekic bâsâockekicnere mi hone tarapic. 17 Iŋuc ehapire wio-jacterâ muwec: “Ŋohe wemo wiacte nazaŋ gazaŋ ehuc jukopirec?” Mume jahe ʒâŋe mai-jekic sorondoŋ eha domapic. 18 Ehuc jaheraonec moc ʒâŋene Keleopa eki muwec, “Jerusalem haeo ŋic hombaŋte fisimbiŋ jaŋe dâŋ biŋe sâko hazec sâc mana-fârehapie go mocjahazi weniŋuc erâ hazec furu jukomec.” 19 Eme eki wio-jacterâ muwec, “Wemo wiac?” Mume jahe mupic, “Wiac Jesu Nazarete haeonec ere binaŋ. E porofete sâko juhuc Anuture maio â ŋicmaio wiac tâpiri jaha mu bac ehuc juwec. 20 Ehame taha bapa micne â fekicnefâc-nâŋec jaŋe hâmoocte mutaracnehuc kiarao râepie mume maripoŋko qambiŋ. 21 Nâŋe ine ere mamanac juhuc ʒiŋuc mumbeŋ: ‘Eki hâcne Israe ŋic nâŋâc niŋgiŋkonec firuec-nâpozejec. Eme qapie hâmome juhapene biac ʒoaŋ gie bapa jahec â moc ekac. 22 Ehame miŋecgac nâŋeraonec ŋokac gâcne bu qâqânduc dâŋ nâzâmbieŋ. Jaŋe furicte ʒâŋeruŋko rarâ 23 qâŋɋâŋ-ticne basarâ risierâ ʒiŋuc mumbieŋ: ‘Aŋelo jajahec fua-nârehuc, Jesu ɋârerâ faharejec, iŋuc nâzâkopirec. 24 Eme dâŋ i manarâ nâŋeraonec ŋic âgofâc-nâŋec tucnezi rarâ ŋokac mumbieŋ sâc bâfuambieŋ â e jahacne ine mi honembieŋ.” 25 Dâŋ iŋuc muhuc âzâcnepire eki muwec: “Porofete jaŋe dâŋ mu qâreŋ embiŋ i ŋoŋe wemocte mutuc â maŋ mâmâcne juhuc mi mana ʒakieeŋgopieŋ? 26 Kristo e wemocko hâmoc ʒâic tâmiric juku sambâŋ tatamac-ticnao raʒizac?” 27 Iŋuc murâ Mose â porofete dâŋ erao iticnehuc qâreŋkembiŋ, irec fuŋne ritu-jacte-fârewec. 28 Eme raku Emausi hae bâqiŋkembiŋ. Ehuc eki hae fotâcnerâ raocte eme 29 jahe sakarehuc mupic, “Ʒoaŋ biac rifireha hae ŋafezo ekacte go nâhehec juc.” Eme jahehec juocte mana-jacteme ficko mâmâc fembiŋ. 30 Eme nânâ nâniŋte waha ŋerâ poroŋ rorâ jambuŋkehuc bazurâ jactewec. 31 Ehame ʒâŋe-jekic raruŋkeme hone tarapic. Hone tarapire izia sipuac ewec. 32 Eme jahe nazaŋ gazaŋ erâ kecʒiŋuc mupic: “Hatao dâŋ nâsâhuc mitire fuŋne ritu-nâcteme bunâhec bâruŋkejec hâcne ine.” 33 Iŋuc murâ izia faharerâ Jerusalem haeo risie rapic. Ra fisirâ e jahacne motec 11 â âgofâc-jeŋic gâcne tumaŋnerâ ŋehapie bâfuac-jopapire 34 jaŋe biac ʒiŋuc jasambiŋ: “Wofuŋ e jâmbomac faharerâ Simoŋ fuacnejec.” 35 Eme jahe iŋuc jaha Wofuŋzi hatao bâfuac-jofarâ ficko poroŋ bazume ʒâŋitapic, irec dâŋ binaŋ ejarepic.

36 Motec jaŋe irec dâŋ binaŋ ehuc ŋehapie Jesu e jahac ŋondeŋ-jeŋicko fuarâ domawec. 37 Eme jaŋe honerâ fâfârerâ hâwic-jopame mumbiŋ, “Bawezi fuakac.” 38 Eme eki ʒiŋuc jazawec: “Ŋoŋe wemocte fâfârerâ maŋjahec eŋgopieŋ? 39 ʒi no nahac jâmbâŋ jukopac, ŋoŋe me kike-nane honeniŋ, ehuc ware bâuacnurâ hone-hâmocnuniŋ, no sahac biuc-nanehec, bawe jaŋe ijeŋichec aricne.” 40 Dâŋ iŋuc jazarâ, mejahecne â kike jahecne jowatuwec. 41 Eme jaŋe bujeŋic biaŋkeme dâŋticne mi mamana mâc wareckehuc ŋepie wio-jarerâ muwec: 42 “Nânâ-ŋeŋic moc fokac me?” Eme jaŋe opâ qowi ʒegoc ʒakicne moc râcnerâ 43 honehapie ro nâc ewec.

44 Erâ ʒiŋuc jazawec: “No ŋoŋehec juhuc kecʒiŋuc ŋaza jupac: ‘Mosere sâcmutâc dâŋqâhâcko â porofete jaŋere papiao â miti mânecko nore findaŋdâŋ qâreŋkekicne, i fârinehec efâreocmu.” 45 Eme miti papiao dâŋqâreŋ fokac irec fuŋne ritu-jarekume maŋjeŋic uŋtowec. 46 Ehuc jazawec, “Kristore ʒiŋuc qâreŋkekicne: ‘E ʒâic manaku hâmorâ ʒoaŋ jahec â moc eha hâmockonec ɋârerâ fahareocmu. 47 Á ʒâŋe biŋe-ticne ŋic mâreŋ sâc jaŋerao rame maŋ bâbârisie â sâqocne mumutâmire fua raocte mukicne. Gie i Jerusalem haeo fuŋkerâ barazo. 48 Wiac irec mumutaniŋ ŋic ŋoŋe hâcne. 49 Erâ manaŋgopieŋ, Mamac-nanezi wiac biŋe qaŋarewec i sorepe waha-ŋareocmu. Irec ŋoŋe hae ʒi mi behehuc mâc woŋec juhapie faic irec tâpiri heŋarepe huzejec.”

50 Eme haeonec jowac-jopa rarâ Betania hae mendâŋko fisirâ meticne sicnehuc jambuŋ-jopawec. 51 Jambuŋ-jopahuc behec-joparâ fewec. 52 Eme jaŋe bubiaŋ kâcɋene manahuc Jerusalem haeo risiembiŋ. 53 Risierâ taha ufuŋko hati jurâ ju ehuc Anutu muteŋkembiŋ.