1 Âgo biaŋfâc-nane, maŋnane ŋoŋere boc ecneekac, ŋoŋe hâcne eri bubiaŋfâc-nane, ŋoŋe Wofuŋtao qohota sanaŋkenʒepieŋ, jorocfâc-mae. 2 Euodia â Sintike ŋokac jahec jahe Wofuŋte erâ maŋ mocjaha erâ juzepirec. 3 Á babafic fâri-nane go ine ŋokac jahec hâcne hone maiŋ ejactezemec. Jahe mecne â Kelemento â âgo gâcne jaŋe Biŋebiaŋte giere dopecnumbiŋ. Ʒâŋe-jeŋic juju sanaŋte papia qizecko fofârekac.

4 Ŋoŋe Wofuŋte erâ ʒeri bubiaŋ manahuc junʒepieŋ, no harierâ mupe, ʒeri bubiaŋ mananʒepieŋ. 5 Wofuŋzi bâqiŋ-nâpokacte ŋic sasawa wamane ejarenʒepieŋ. 6 Wiac irec me irec mana mezac mi ee maŋŋeŋicte dâŋ fuŋne fuŋne i Anutu daŋge nunumu ecnehuc mutaniŋkecnenʒepieŋ. 7 Eme Anuture wama e ŋic mamana sirickeekaczi maŋ mamanasu-ŋeŋic qâzuckeme Kristore fosanaŋkeocmu.

8 Erâ âgofâc, dâŋ moc mupe: Wiac fârine â wiac araŋ bapanehec, wiac tiŋne â wiac ɋaɋacne, wiac hohone ʒiziwene â wiac mamana ʒiziwene, wiac eesaricne â wiac bubiaŋ bâbâfuane, wiac i sasaware henʒiriŋnehuc junʒepieŋ. 9 No wiac mu qazuc â ŋaza ŋowatuc epe hone manac embiŋ, ijaha ehuc jupie Anutu wama runezi ŋoŋehec juocmu.

10 Ŋoŋe ŋondeŋne moc mâc juwareku ʒi nore mocwâc manasurâ buafec-ŋeŋicte ehâmo-narembiŋ, irec manape Wofuŋtao qacneme bubiaŋ kâcɋene manakopac. Ŋoŋe nore mamanasu i manasumbiŋ, mâc wiac enareniŋte hata basarâ quŋkembiŋ. 11 No kâroŋ qaŋarehuc mi mukopac, no wiac i me i basarâ mâc juhuc manape mi sâqoreekac. 12 No qafec qawahac juju me fofo dunduŋ fonareha juju, iŋuc me iŋuc juzo murâ sâcne jupemu. Nâ gapehec juju â natac qatac juju, mâriri faio juju â roroc faio juju, irec fuŋne mâmâc manaekopac. 13 Tâpiri nareme sanaŋkeekopac, ere erâ jupe bape sâcke-fâreekac. 14 Ŋoŋe ine busâqocko juhape ehâmo-narembiŋte manape biaŋkekac.

15 Filipi haeonec ŋic ŋokac ŋoŋe manaŋgopieŋ, no Biŋebiaŋte gie fufuŋke dameŋko Makedonia mâreŋ behepoo kikefuŋ gâcnezi mâc juhapie ŋoŋe buc nohec nareŋ gareŋ embeŋ. 16 Erâ Tesalonike haeo juhape sahacte wiaczi dopecnuhuc jumbiŋ wâc. 17 No moneŋ mafare mi mukopac, mâc miti-ŋeŋicte fârine fuaocte mukopac, eme fârine izi ŋoŋeraopec hamârekao hâcne. 18 Ʒi wiac bâfuacnu-fârewec, bocjaha fonarekac. Epafoditozi ŋoŋeraonec wiac bafisi-nareme mâririhec epo jukopac. Ŋoŋe no wiac enarembiŋ, irec manape Wofuŋ taha bâzi biaŋ âsu mumundoŋnehec ecnembiŋ ekac. 19 Anutu-nane e mâriri bâbâfuazi Kristo Jesure erâ wiac hezu heŋareme hâmoc huriaŋ tâmiric juniŋmu. 20 Anutu Mamac-nâŋec erao ine mumuteŋzi mumuteŋ foraʒihuc juzejec sanaŋ. Jâmbomac.

21 No Kristo Jesure erâ manasuc-ŋopakopac, i mitiŋic ŋokac jaza-fârenʒepieŋ. Á âgofâc-nane nohec juŋgopieŋ jaŋe wâc manasuc-ŋopaŋgopieŋ. 22 Mitiŋic sasawa â Sisare ŋicfâc jaŋe wâc boc manasuc-ŋopaŋgopieŋ. 23 Wofuŋ Jesu Kristo ere aki anonoczi maŋ qâqâtâc-ŋeŋicko fofârezejec. Jâmbomac.